ភ្នំពេញ ៖ ចោរឆក់០២នាក់ត្រូវបានកម្លាំងកងរាជអាវុធហត្ថខណ្ឌដូនពេញឃាត់ខ្លួន បន្ទាប់ពីធ្វើសកម្មភាពឆក់ទូរស័ព្ទដៃពីជនជាតិបរទេសកាលពីវេលាម៉ោង០២និង១០នាទីរសៀលថ្ងៃទី២៩ ខែវិច្ឆិកា ឆ្នាំ២០១៥ ស្ថិតនៅតាមបណ្ដោយផ្លូវលេខ១០៨កែងនឹងផ្លូវលេខ៥១ ក្បែរនឹងរង្វង់មូលវត្តភ្នំ ក្នុងសង្កាត់វត្តភ្នំ ខណ្ឌដូនពេញ រាជធានីភ្នំពេញ។
កម្លាំងកងរាជអាវុធហត្ថខណ្ឌដូនពេញបានឲ្យដឹងថា ជនសង្ស័យទី១ មានឈ្មោះ ឈុន ឌី ភេទប្រុស អាយុ២៦ឆ្នាំ ស្នាក់នៅម្ដុំទួលសង្កែ ក្នុងសង្កាត់ទួលសង្កែ ខណ្ឌឫស្សីកែវ មុខរបរជាងសំណង់។ ទី២ឈ្មោះ ង៉ូវ ដានីន ភេទប្រុស អាយុ២១ឆ្នាំ ស្នាក់នៅម្ដុំផ្សារសាំហាន់ ក្នុងសង្កាត់ទួលសង្កែ ខណ្ឌឫស្សីកែវ មុខរបរមិនពិតប្រាកដ។
កម្លាំងកងរាជអាវុធហត្ថខណ្ឌដូនពេញបន្តឲ្យដឹងបន្ថែមទៀតថា នៅមុនពេលកើតហេតុ ជនរងគ្រោះបានជិះម៉ូតូ១គ្រឿងតាមបណ្ដោយផ្លូវ១០៨ កំពុងនិយាយទូរស័ព្ទបណ្ដើរ ខណៈនោះក៏មានជនសង្ស័យ២នាក់ជិះម៉ូតូ១គ្រឿង ម៉ាកវីវ៉ាសេ១២៥ ពណ៌ក្រហមលាយខ្មៅ ពាក់ស្លាក់លេខភ្នំពេញ 1FJ-0386 ធ្វើដំណើរមកតាមក្រោយរួចជិះអែបក្បែរធ្វើសកម្មភាពឆក់ទូរស័ព្ទពីដៃជនរងគ្រោះកំពុងនិយាយបណ្ដាលឲ្យជនរងគ្រោះដួលម៉ូតូរងរបួសរលាត់ជើងបន្តិច ហើយជនសង្ស័យបានព្យាយាមជិះគេចខ្លួន ពេលនោះកម្លាំងកងរាជអាវុធហត្ថខណ្ឌកំពុងល្បាតនៅគោលដៅក្បែរក៏ប្រទះឃើញហេតុការណ៍ជាក់ស្ដែងបានដេញតាមជនសង្ស័យ ខណៈនោះជនសង្ស័យភ័យស្លន់ស្លោក៏ដួលម៉ូតូត្រូវបានកម្លាំងកងរាជអាវុធហត្ថដែលជិះដេញ ឃាត់ខ្លួនបានភ្លាមៗតែម្ដង។
មន្ត្រីអាវុធហត្ថបានបញ្ជាក់ទៀតថា ក្រុមជនសង្ស័យត្រូវបានកម្លាំងកងរាជអាវុធហត្ថនាំយកមកឃុំខ្លួនបណ្ដោះអាសន្ននៅទីបញ្ជាការអាវុធហត្ថខណ្ឌដូនពេញ ដើម្បីសួរនាំបន្ថែមចាត់ការតាមនីតិវិធីច្បាប់៕
PM ឃាត់ខ្លួនជនសង្ស័យ០២នាក់ បន្ទាប់ពីឆក់ទូរស័ព្ទដៃជនបរទេស
0 Comments