ទីភ្នាក់ងារសុខាភិបាលរបស់អង្គការសហប្រជាជាតិ កាលពីថ្ងៃអង្គារកន្លងទៅនេះ បានប្រកាសថា ការកើតមានជំងឺ Ebola នៅប្រទេសហ្គីណេ បានឆ្លតផុតហើយ គឺរយៈពេល ២ ឆ្នាំ បន្ទាប់ពីជំងឺនេះបានលេចចេញមកនាំឲ្យមានករណីស្លាប់ នៅទូទាំងតំបន់អាហ្វ្រិកខាងលិច ហើយជំរុញឲ្យសហគមន៍នៃតំបន់ឆ្ពោះទៅក្នុងសភាពរលំដួល។
ប្រទេសនេះជាប្រទេសមួយ ក្នុងចំណោមប្រទេសដ៏ក្រីក្រជាទីបំផុត នៅក្នុងពិភពលោក ជាអតីតអាណានិគមបារាំង ទើបតែឈានមកដល់សូន្យករណីនៃអ្នកជំងឺ ដែលកន្លងទៅនេះគឺកុមារម្នាក់បានក្លាយទៅជាអ្នករងគ្រោះ ហើយខាងអាជ្ញាធរសុខាភិបាលបានកត់ត្រាឃើញថា មានអត្រាស្លាប់ដល់ទៅប្រមាណ២,៥០០ នាក់។
លោក Mohamed Belhoucine តំណាងក្នុងប្រទេសរបស់អង្គការសុខភាពពិភពលោកបានប្រកាសនៅក្នុងក្រុង Conakry ថា ការចម្លងរាតត្បាតនៃជំងឺបង្កដោយវីរុស Ebola នៅក្នុងប្រទេសហ្គីណេ បានឆ្លងផុតទៅហើយ។
បើនិយាយអំពីប្រភពនៃការឆ្លងវិញ គឺបានចាប់ផ្ដើមឡើងពីខែធ្នូ ឆ្នាំ ២០១៣ ហើយបន្ដវាយលុកចូលទៅក្នុង ២ ប្រទេស ដែលនៅក្បែរខាងគ្នានោះ គឺសៀរ៉ាឡេអូន និងលីបេរីយ៉ា ជាមួយនឹងករណី ដែលកើតមានមួយចំនួនទៀតផងដែរ នៅប្រទេសម៉ាលី នីហ្សេរីយ៉ា និងសេណាហ្គាល់។
ខណៈពេលដែលអង្គការឃ្លាំមើលផ្នែកសុខភាពពិភពលោក (World Health Watchdogs) បានតស៊ូប្រយុទ្ធឆ្លើយតបតទៅទៀតនោះ ករណីស្លាប់ក៏បានកើតមាន បង្កឲ្យមានការភ័យខ្លាចទាំងនៅទ្វីបអឺរ៉ុបថែមទៀត។
មនុស្សប្រមាណ ១១,៣០០ នាក់បានស្លាប់ក្នុងចំណោមករណីឆ្លង Ebola ដល់ទៅ ២៩,០០០ នាក់។ នេះបើយោងតាមតួលេខរបស់អង្គការ WHO។
ករណីចម្លងចុងក្រោយ ដែលត្រូវបានដឹង នៅប្រទេសហ្គីណេនោះ គឺទារកម្នាក់អាយុទើបតែបាន ៣ ខែឈ្មោះ Nubia ដែលប្រសូតមកមានផ្ទុកវីរុសនោះតែម្ដង ប៉ុន្ដែការរកឃើញត្រូវបានបញ្ជាក់អះអាងនៅថ្ងៃទី១៦ ខែវិច្ឆិកា។
អង្គការ WHO បានប្រកាសការឆ្លងផុតពីជំងឺ Ebola នេះ នៅក្នុងប្រទេសសៀរ៉ាឡេអូន នៅថ្ងៃទី ៧ ខែវិច្ឆិកា ខណៈពេលដែលលីបេរីយ៉ាវិញ ត្រូវបានគេដឹងថា ករណីកើត Ebola នោះចុងក្រោយគេបង្អស់គឺនៅថ្ងៃទី៣ ធ្នូ ហើយក៏ត្រូវបានឆ្លងរួចផុតផងដែរ៕
AFP
អង្គការ WHO ប្រកាសថា ការកើតមាន Ebola នៅហ្គីណេ ឆ្លងផុតទៅហើយ
0 Comments