ព្រះសីហនុ ៖ កាលពីថ្ងៃទី០២ ខែវិច្ឆិកា ឆ្នាំ២០១៥នៅវេលាម៉ោង៤និង៤៥នាទីរថយន្តហាយឡែនឌ័រមួយគ្រឿងបានរងការខូចខាតផ្នែកក្បាលខាងមុខរបើក និងសើយដំបូលម៉ាស៊ីនធ្ងន់ធ្ងរ ខណៈកំពុងបើកបរលើផ្លូវជាតិស្រាប់តែសត្វគោមួយក្បាលរត់ឆ្លងផ្លូវបណ្ដាលឲ្យបុកចំពីមុខរថយន្តពេញទំហឹងនោះ។ ហេតុការណ៍នេះកើតឡើងនៅភូមិស្ទឹងច្រាល ឃុំអូរបាក់រទះ ស្រុកកំពង់សីលា ខេត្តសីហនុ។
ក្នុងករណីគ្រោះថ្នាក់ចរាចរណ៍បង្កឡើងដោយហ្វូងសត្វគោដែលម្ចាស់ព្រលែងចោរឲ្យដើរទន្ទ្រានពេញភូមិ និងដើរប្រសេចប្រសាចពេញផ្លូវជាតិនេះមិនបណ្ដាលឲ្យមនុស្សណាម្នាក់រងរបួសនោះទេគឺគ្រាន់តែខូចខាតរថយន្តផ្នែកខាងមុខ និងសត្វគោមួយក្បាលរងរបួសធ្ងន់បាក់ជើងដេកស្ងៀមនៅកន្លែងកើតហេតុ។
មន្ត្រីកងរាជអាវុធហត្ថស្រុកកំពង់សិលាបានឲ្យដឹងថា រថយន្តបុកគោនោះ ម៉ាកហាយឡែនឌ័រ ពណ៌ទឹកប្រាក់ ពាក់ស្លាកលេខ ភ្នំពេញ2AG2124 មានទិសដៅពីភ្នំពេញទៅខេត្តកោះកុង។
មន្ត្រីអាវុធហត្ថបានឲ្យដឹងទៀតថា អ្នកបើកបរឈ្មោះ ញ៉ូវ សារខន ភេទប្រុស អាយុ៥៦ឆ្នាំ មុខរបររត់តាក់ស៊ី មានទីលំនៅ ភូមិ៣ ឃុំស្មាចមានជ័យ ក្រុងខេមរភូមិន្ទ ខេត្តកោះកុង។ បច្ចុប្បន្នវត្ថុតាងត្រូវបានរក្សាទុកនៅនគរបាលប៉ុស្តិ៍រដ្ឋបាល ដើម្បីរង់ចាំធ្វើការដោះស្រាយតាមផ្លូវច្បាប់៕
ហាយឡែនឌ័របុកគោរត់ឆ្លងផ្លូវខូចខាតក្បាលរថយន្តខាងមុខធ្ងន់ធ្ងរ
0 Comments