បាត់ដំបង ៖ រឿង ដែលកម្រនឹងជួបប្រទះមួយបានកើតឡើង ដោយសារតែមាន សាស័រមួយគ្រឿង បានបើកទៅបុកនឹងរថយន្តច្នៃចំពីក្រោយ ខណៈដែលរថយន្តច្នៃនោះកំពុងខូច ហើយមានមនុស្សមួយក្រុមកំពុងតែរុញរថយន្តនោះក្នុងគោលបំណងយកទៅជួសជុល បណ្តាលឲ្យមនុស្សដែលកំពុងរុញនោះរងគ្រោះដួលដេកស្លាប់មួយ និងរបួសធ្ងន់ស្រាល៥នាក់។
ហេតុការណ៍ដែលកម្រជួបនេះបានកើតឡើងកាលពីថ្ងៃទី២៩ ខែវិច្ឆិកា ឆ្នាំ២០១៥ វេលាម៉ោង ១២និង៤៥នាទីថ្ងៃត្រង់ ស្ថិតក្នុងភូមិបួរ ឃុំបួរ ស្រុកភ្នំព្រឹក ខេត្តបាត់ដំបង បង្កឡើងដោយគ្រឿងចក្រសាស័រមួយគ្រឿង ដែលបើកបរដោយឈ្មោះ ចាន់ ភារ៉ន ភេទប្រុសអាយុ២៤ឆ្នាំ រស់នៅភូមិម៉ាឡៃ ឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ។
តាមការរៀបរាប់ពីឈ្មោះ រ៉ា បុល ភេទប្រុស អាយុ២៧ឆ្នាំ ជាអ្នកបើកបររថយន្តច្នៃបាននិយាយថា នៅមុនពេលកើតហេតុ គឺរថយន្តច្នៃរបស់ខ្លួនបានខូច ដោយខ្លួនបានរកអ្នកភូមិជាច្រើននាក់ឲ្យមកជួយរុញ ក្នុងគោលបំណងយកទៅឲ្យជាងជួសជុល។ នៅក្នុងពេលដែលពួកគេកំពុងតែរុញនោះ ក៏ស្រាប់តែមានគ្រឿងចក្រសាស័រមួយគ្រឿង បានបើកបរ យ៉ាងលឿនក្នុងទិសដៅស្របគ្នា រួចក៏បានរេចង្កូតទៅបុកនឹងរថយន្តច្នៃរបស់ខ្លួនដែលកំពុងតែមានមនុស្សរុញផងនោះ បណ្តាលឲ្យមនុស្សមួយចំនួនដួលទៅលើដីហើយត្រូវសាស័រនោះកិនបន្ថែម ធ្វើឲ្យមានម្នាក់ត្រូវបានស្លាប់ និង៥នាក់ទៀតរងរបួសផងដែរ។
ជនរងគ្រោះទាំងអស់នោះគឺ១. ឈ្មោះ ខន ភេទប្រុស អាយុ២១ ឆ្នាំ រស់នៅភូមិណងចាន់ ខេត្តបន្ទាយមានជ័យ (ស្លាប់) ២. រដ្ឋ ឡុង ភេទប្រុស អាយុ២១ ឆ្នាំ រស់នៅភូមិថ្មី ឃុំទឹកជោរ ស្រុកព្រះនេត្រព្រះ ខេត្តបន្ទាយមានជ័យ របួសធ្ងន់ ៣ .ទៀង បួយ ភេទប្រុសអាយុ២៦ឆ្នាំ នៅភូមិអូរជ្រៃ ឃុំបារាំងធ្លាក់ ស្រុកភ្នំព្រឹក ខេត្តបាត់ដំបង របួសស្រាល ៤. សុខ ពន្លក ភេទប្រុស អាយុ៣៥ឆ្នាំ រស់នៅភូមិគ្រួសក្រហម ឃុំអូរំដួល ស្រុកភ្នំព្រឹកខេត្តបាត់ដំបង របួសស្រាល ៥ .វា បុល ភេទប្រុស អាយុ២៧ឆ្នាំ នៅភូមិអូរជ្រៃ ឃុំបារាំងធ្លាក់ ស្រុកភ្នំព្រឹក ខេត្តបាត់ដំបង របួសស្រាល (ជាតៃកុងរថយន្តច្នៃ) និង៦. ទេព ណាម ភេទប្រុសអាយុ៣៤ឆ្នាំ នៅភូមស្ពានទំនាប ឃុំបារាំងធ្លាក់ ស្រុកភ្នំព្រឹក ខេត្តបាត់ដំបង ដោយបច្ចុប្បន្នជនរងគ្រោះត្រូវបានបញ្ជូនទៅកាន់មន្ទីរពេទ្យខេត្តបាត់ដំបងហើយដើម្បីសង្គ្រោះ ដោយឡែកអ្នកស្លាប់ត្រូវក្រុមគ្រួសារទទួលយកទៅធ្វើបុណ្យតាមប្រពៃណី។ ចំណែកសារស័រ និងរថយន្តច្នៃត្រូវបានរក្សាទុកនៅប៉ុស្តិ៍នគរបាលឃុំបួររង់ចាំការដោះស្រាយជាក្រោយ៕
សាស័រ បុករថយន្តច្នៃពីក្រោយបណ្ដាលឲ្យមនុស្សស្លាប់ម្នាក់ និងរបួស៥នាក់
0 Comments