សៀរ៉ាឡេអូន ងើប​រួច​ផុត​ពី​សុបិនអាក្រក់ Ebola​​

ជំងឺរាតត្បាត​ Ebola ត្រូវបាន​រំពឹង​ថា ត្រូវបាន​ប្រកាស​​បានរួច​ចាក​ផុតហើយនៅប្រទេស​​សៀរ៉ា​ឡេអូន កាលពីថ្ងៃ​សៅរ៍ ពេលដែល​ប្រទេស​ស្ថិត​​នៅតំបន់​អាហ្វ្រិក​ខាងលិច​មួយ​នេះ​នឹងឆ្លង​ផុត​​​រយៈពេល​៤២​ថ្ងៃ​ ដោយមិន​មាន​ករណី​កើត​​ជំងឺ​Ebola ថ្មី​តទៅទៀត​នោះ។

នៅក្នុង​ប្រទេសនេះ Ebola បានឆក់​យកជីវិត​មនុស្ស​អស់ប្រមាណ​ដល់ទៅជាង​៤,០០០នាក់ ដែលត្រូវបាន​រាយការណ៍​ ហើយធ្លាប់​ត្រូវបាន​ទប់ស្កាត់​ដោយការ​ដាស់​តឿន​ឲ្យ​​មាន​ការ​ប្រុង​ប្រយ័ត្ន​ជាមួយពេលដែល​ប្រទេស​ហ្គីណេ នៅ​ជាប់ព្រំដែន​ជាមួយគ្នានោះវិញ នៅតែកំពុង​ប្រយុទ្ធ​ទប់ទល់​ជាមួយ Ebola នៅឡើយ។

ជំងឺ Ebola នេះ​ត្រូវ​បានរកឃើញ​ថា កើត​មាន​ទៅលើ​ស្ដ្រី​ហ្គីណេ​មួយរូប​ អាយុ​២៥ឆ្នាំ ដែល​មាន​​ផ្ទៃពោះ​ និងកូន២​នាក់ទៀតរបស់ស្ដ្រី​នេះ​​ក្នុងស្រុក Forecariah ក្បែរ​ព្រំដែន​នៃប្រទេស​សៀរ៉ាឡេអូន នៅពាក់កណ្ដាល​​ខែតុលា។

​ទារក​នៅក្នុង​​គភ៌​របស់ស្ដ្រីនោះ​​ ត្រូវរម្លូត​នៅ​ពេល​​នាង​ព្យាបាល​ជំងឺ​ហើយ ព្រោះ​តែធ្វើ​តេស្ដ​ទៅ​ឃើញលទ្ធផល​​វិជ្ជមាន។ នេះជាការលើក​​ឡើង​​ដោយអង្គការ​សុខភាព​ពិភពលោក​ (WHO) នៅក្នុងការ​​​លើកឡើង​​ពីចំនួនអ្នក​ជំងឺ​ Ebola ជា​ប្រចាំ​សប្ដាហ៍​លើកចុងក្រោយ​បង្អស់​កាលពីថ្ងៃ​ពុធ។

អង្គការ WHO និយាយថា ពេលនេះប្រទេស​ហ្គីណេ កំពុងតែ​តាមដាន​​មនុស្ស​​ដែលជា​មុខ​សញ្ញា​នៃ​ការ​មានទំនាក់ទំនង​​ដោយផ្ទាល់​ជា​មួយ​អ្នកជំងឺ Ebola ដល់ទៅ​៣៨២នាក់ហើយ​ក្នុងនោះ​មាន​១៤១នាក់ ស្ថិតនៅ​ក្នុង​ហានិភ័យ​​យ៉ាង​ខ្ពស់​បំផុត។

ចាប់តាំងពី​លេចចេញ​នូវ​ជំងឺ Ebola នេះមក​ក្នុង​ខែធ្នូ ឆ្នាំ​២០១៣ ការចម្លង​ដ៏ធ្ងន់​បំផុត​នៃ​ Ebola ជាប្រវត្ដិសាស្ដ្រ​ បានចម្លង​ដល់​មនុស្ស​​មានចំនួន​២៨,៥០០នាក់ ហើយក្នុងនោះ​មាន​ស្លាប់​១១,៣០០នាក់។ រីឯចំនួន​​ពិតប្រាកដ​​វិញ ត្រូវបានគេ​ជឿថា ច្រើនលើស​ពីតួលេខ​នេះ​ទៅ​ទៀត។ ដោយឡែកការ​ប្រកាស​កាលពីថ្ងៃសៅរ៍ ​នេះវិញ ជាការកត់សម្គាល់​​ឲ្យឃើញពីការ​បញ្ចប់​ជា​ផ្លូវការ​ក្នុងកា​រប្រយុទ្ធ​​ប្រឆាំងនឹង​ Ebola នោះ៕

AFP

សៀរ៉ាឡេអូន ងើប​រួច​ផុត​ពី​សុបិនអាក្រក់ Ebola​​