*ឌុម កែវដា ជួប Kamlai Yuk
ឡុង សុភី ម្ចាស់ខ្សែក្រវាត់ខារ៉ាបាវវគ្គ ១ ទម្ងន់៦៩គីឡូក្រាមនៃក្លិបសាលវ័ន្តកីឡា ត្រូវអ្នករៀបចំកម្មវិធីប្រដាល់នៅប៉ុស្តិ៍អាស៊ីអាគ្នេយ៍ ផ្គូផ្គងឲ្យជួបប្រកួតជាមួយអ្នកប្រដាល់ថៃ នាល្ងាចថ្ងៃសៅរ៍ ទី២៨ ខែវិច្ឆិកា ឆ្នាំ២០១៥ នៅលើសង្វៀនK.cement របស់SEA-TV ។
សុភី នឹងប្រកួតក្នុងប្រភេទទម្ងន់៦៩គ.ក្រ ជាមួយ Kamlai Phath ។ អ្នកប្រដាល់ថៃឈ្មោះ Kamlai Phath នេះ ធ្លាប់មកប្រកួតនៅភ្នំពេញម្តងហើយ ដោយជួបប្រកួតជាមួយជើងខ្លាំងនៅស្រុកខ្មែរគឺរឿង សោភ័ណ្ឌ ក្លិបម្កុដរាជសីហ៍ ហើយបានយកឈ្នះ រឿង សោភ័ណ្ឌ ដោយពិន្ទុ កាលពីថ្ងៃទី១៩ ខែកញ្ញាឆ្នាំ២០១៥។ ឡុង សុភី មានកាតព្វកិច្ចត្រូវសងសឹកជួសឲ្យ រឿង សោភ័ណ្ឌ ហើយ។
Kamlai Phath ឈ្នះ រឿង សោភ័ណ្ឌ ហើយ គឺមិនធម្មតានោះទេ។ គេមានកំរិតសមត្ថភាព និងបច្ចេកទេសខ្ពស់គឺគេជាជើងខ្លាំងម្នាក់ប្រចាំនៅស្រុកថៃ។ ការប្រកួតលើរេញរបស់គេ បានចំនួន៩៧លើក វាយឈ្នះ៧៧លើកទៅហើយ ដោយចាញ់១៨ និងស្មើ០២លើក។
ចំពោះ អ្នកប្រដាល់ ឡុង សុភី វិញ គេធ្លាប់ប្រកួតជាមួយអ្នកប្រដាល់ថៃរាប់ភ្លេចហើយបើគិតត្រួសៗប្រមាណ២២នាក់ហើយ ប្រកួតនៅក្នុងស្រុកដែលក្នុង២២លើកនេះ គេវាយឈ្នះថៃ១៩នាក់ ស្មើ១នាក់ និងចាញ់១នាក់។ ប្រកួតជាមួយថៃលើកចុងក្រោយគេ គឺ សុភី វាយឈ្នះTom Tam ក្នុងទឹកទី៤នៅលើសង្វៀន SEA-TVនេះកាលពីថ្ងៃទី០១ ខែវិច្ឆិកា កន្លងមកនេះ។
សម្រាប់ការប្រកួតលើកនេះ គេមានទំនុកចិត្តថា ឡុង សុភី អាចផ្ដួលអ្នកប្រដាល់ថៃ Kamlai Phath បានម្នាក់ទៀតមិនខាន ព្រោះថា សុភី ឥឡូវនេះ ខ្លាំងជាងមុនទៅទៀត ដោយគេមានកម្លាំងស៊ុហ្វរឹងមាំ ដែលនេះជាកត្តាកំណត់ជ័យជំនះរបស់ ឡុង សុភី ក្នុងការប្រកួតជាមួយKamlai Phath នេះ។
អ្នកប្រដាល់កម្ពុជា ឌុម កែវដា ក្លិបម្កុដរាជសីហ៍ ត្រូវផ្គូផ្គងឲ្យជួបប្រកួតជាមួយអ្នកប្រដាល់ថៃឈ្មោះ Kamlai Yuk ដោយប្រកួតក្នុងប្រភេទទម្ងន់៦០គីឡូក្រាម។ នេះជាជំនួបលើកដំបូងរបស់កែវដា ក្នុងការជួបប្រកួតជាមួយថៃនោះ។
អ្នកប្រដាល់ថៃរូបនេះ បើតាម លោក ញាន សុធី អ្នកផ្គូផ្គងប្រដាល់ប្រចាំSEATV និយាយឲ្យដឹងនោះថា គេជាជើងខ្លាំងមួយរូបនៅប្រទេសថៃ ហើយក៏ជាប្អូនរបស់ Kamlai Phath ដែលមកប្រកួតជាមួយឡុង សុភី នោះដែរ។
Kamlai Yuk នេះ មិនធ្លាប់មកប្រកួតនៅកម្ពុជានោះទេកន្លងមក។ គេមានកម្ពស់ប្រហាក់ប្រហែល ឌុម កែវដា ឯសមត្ថភាពបច្ចេកទេសក៏ប្រដំប្រសងនឹង កែវដា ដែរ។ នេះបើតាម លោក ញាណ សុធី ឲ្យដឹង។
ទោះជាយ៉ាងណា សម្រាប់ការជួបជាមួយKamlai Yuk នេះ កែវដា មិនជាស្រួលខ្លួនប៉ុន្មានទេ ព្រោះគេទើបតែសាកល្បងលើកទី១ក្នុងការប៉ះជាមួយអ្នកប្រដាល់បរទេស។ ទោះបីជា កែវដា គេខ្លាំង និងថ្នឹករឿងវាយលើសង្វៀនក្តី។ កែវដា ប្រកួតចុងក្រោយនេះវាយឈ្នះជើងខ្លាំង គិន សំបូរ ក្លិបភីរម្យគុនខ្មែរក្នុងទឹកទី២។ ចាំមើល លើកនេះ ឌុម កែវដា អាចយកឈ្នះអ្នកប្រដាល់ថៃ Kamlai Yuk បានដែរឬអត់ ?៕
ឡុង សុភី ឡើងសងសឹក Kamlai Phath ឲ្យ រឿង សោភ័ណ្ឌ លើសង្វៀនK.cement
0 Comments