តាកែវ ៖ លោក លឹម គានហោ រដ្ឋមន្ត្រីក្រសួងធនធានទឹកនឹងឧតុនិយមមានប្រសាសន៍កាលពីពេលថ្មីៗនេះ នៅឱកាសដែលលោកចុះពិនិត្យស្ថានភាពទឹក និងការងារបង្កបង្កើនផលស្រូវប្រាំង និងវស្សារបស់ប្រជាកសិករនៅខេត្តតាកែវឆ្នាំនេះ ដោយសារខេត្តតាកែវបានទទួលរបាយទឹកភ្លៀងរួមផ្សំនឹងការអន្តរាគមន៍ជាបន្តបន្ទាប់ មិនខ្វល់ពីកង្វះខាតទឹក ប្រជាកសិករបានបង្កបង្កើនផលស្រូវប្រាំងបានចំនួន ១៩៣.៨០០ហិកតា លើផែនការ។
លោករដ្ឋមន្ត្រីក្រសួងធនធានទឹកបានបន្តថា ក្នុងរដូវវស្សាឆ្នាំ២០១៥ នេះ ខេត្តតាកែវ ក៏ដូចជាបណ្ដាខេត្តមួយចំនួនទៀតដែរ គឺមានការប្រឈមខ្លាំងទៅនឹងគ្រោះរាំងស្ងួត។ រហូតដល់ចុងរដូវវស្សា ទើបខេត្តតាកែវទទួលរបាយទឹកភ្លៀងគួរសមឡើងវិញ។ ការប្រឈមនេះ បានតម្រូវឲ្យយើងធ្វើអន្តរាគមន៍ជាបន្តបន្ទាប់ ដើម្បីសង្គ្រោះស្រូវរបស់បងប្អូនប្រជាកសិករ។
លោករដ្ឋមន្ត្រីបន្តថា តាមរយៈកិច្ចអន្តរាគមន៍នេះ ពិសេសតាមរយៈការចាត់វិធានការនានា តាមបទបញ្ជារបស់សម្ដេចតេជោ នាយករដ្ឋមន្ត្រី ក្នុងការប្រមូលទឹកទុកសម្រាប់បម្រើឲ្យការងារបង្កបង្កើនផល មកដល់ពេលនេះ ខេត្តតាកែវ អាចធានាបានទាំងស្រុងលើបញ្ហាទឹក។
លោករដ្ឋមន្ត្រីបានបន្តថា ក្នុងឆ្នាំ២០១៥នេះ ខេត្តផលិតស្រូវវស្សាបានចំនួន១៩៣.៨០០ ហិកតា លើផែនការ ពោលគឺខេត្តបានផលិតលើសផែនការ ហើយបងប្អូនប្រជាកសិករបាននិងកំពុងច្រូតកាត់បានជាបណ្តើរៗហើយ។ ចំពោះស្រូវប្រាំងដែលខេត្តតាកែវមានផែនការផលិតចំនួន៧៥.០០០ ហិកតានោះ គឺថាមិនមានបញ្ហាទេ ព្រោះសក្ដានុពលទឹករបស់យើងអាចធានាបានទាំងស្រុង។ មកដល់ពេលនេះផ្ទៃដីស្រូវប្រាំងអនុវត្តបានប្រមាណ២៧ភាគរយ នៃផែនការហើយ៕
ខេត្តតាកែវផលិតស្រូវវស្សាបានចំនួន១៩៣ .៨០០ហិកតា លើសផែនការ
0 Comments