ប្រដាល់ ៖ អ្នកប្រដាល់ ផៃ គឹមហឿត ក្លិបគីសែមានរិទ្ធ បានក្លាយជាជើងឯក TIFFY SUPER FIGHT ទម្ងន់៦០គីឡូក្រាម ក្រោយពីគេបានយកឈ្នះ ឡុង សំណាង អ្នកប្រដាល់ក្លិបសាលវ័ន្តកីឡាដោយពិន្ទុ ក្នុងការប្រកួតផ្ដាច់ព្រ័ត្រលើសង្វៀនលើសង្វៀន TV5 Arena កាលពីយប់ថ្ងៃទី២៩ ខែវិច្ឆិកា ឆ្នាំ២០១៥។ ក្នុងការប្រកួតផ្ដាច់ព្រ័ត្រ ដែលប្រកួតតែ៣ទឹកនោះ ផៃ គឹមហឿត ឈ្នះ ឡុង សំណាង ដោយប្រផឹតប្រផើយប៉ុណ្ណោះ គឺក្នុងចំណោមចៅក្រម៥រូប មាន៣រូបផ្តល់ពិន្ទុឲ្យ គឹមហឿត ឈ្នះ ឯ២រូបទៀតឲ្យ ឡុង សំណាង ឈ្នះ ពោលគឺគឹម ហឿត ឈ្នះ៣ទល់២។ ផៃ គឹមហឿត ឆ្លងកាត់ការប្រកួតជម្រុះ៥ដំណាក់កាលកន្លងមក គេវាយឈ្នះទាំង៥ប្រកួត។ លើកទី១-គេឈ្នះ ឈាន រស្មី ក្លិបរាជសីហ៍ខេត្តរតមគិរីដោយពិន្ទុ លើកទី២ ឈ្នះ សេក ចាន់រាជ ក្លិបអង្គរមានជ័យដោយពិន្ទុ លើកទី៣ឈ្នះ ឃីម សាវ៉េត ក្លិបព្រះខ័នរាជដោយពិន្ទុ និងលើកទី៤ ដែលជាការប្រកួតពាក់កណ្ដាលផ្ដាច់ព្រ័ត្រនោះ គឹម ហឿត បានវាយឈ្នះ ញ៉េ សិទ្ធ ក្លិបអេភូថងកីឡាដោយពិន្ទុ និងប្រកួតផ្ដាច់ព្រ័ត្រនេះ វាយឈ្នះ ឡុង សំណាង ដោយពិន្ទុ។
ជាមួយនឹងការទទួលបានពានជើងឯកនេះ អ្នកប្រដាល់ ផៃ គឹមហឿត នៅបានទទួលប្រាក់រង្វាន់ចំនួន៤.០០០ដុល្លារអាមេរិកទៀត។ ឯ ឡុង សំណាង ដែលបានលេខ២ ទទួលបានពានមួយ និងប្រាក់រង្វាន់២.៥០០ដុល្លារ ហើយចំណាត់លេខ៣ ដែលបានទៅលើ ឌុន ប៊ុនធឿន ក្លិបខេត្តព្រៃវែង ដែលបានប្រកួតឈ្នះ ញ៉េ សិទ្ធ ក្លិបអេភូថងកីឡា ក្នុងទឹកទី២នោះ ទទួលបានពានមួយ និងប្រាក់រង្វាន់៧៥០ដុល្លារ និងលេខ៤ជារបស់ ញ៉េ សិទ្ធ នោះ ទទួលបានពានមួយ និងប្រាក់រង្វាន់៥០០ដុល្លារ។
*សង្វៀនអប្សរា
ប្រដាល់ ៖ អ្នកប្រដាល់ គង់ សំបូរ សមាគមប្រដាល់ក្រសួងការពារជាតិបានវាយចាញ់អ្នកប្រដាល់ថៃ Pan Phat ដោយពិន្ទុ ក្នុងការជួបប្រកួតគ្នាលើសង្វៀនអប្សរា នារសៀលថ្ងៃទី២៨ ខែវិច្ឆិកា ឆ្នាំ២០១៥ ។
ចំពោះ ឈាង ឡុង អ្នកប្រដាល់ក្លិបអេភូថងកីឡា ត្រូវអ្នកប្រដាល់ថៃ Phet Ensry ផ្ដួលឲ្យសន្លប់នៅក្នុងទឹកទី២។ រីឯអ្នកប្រដាល់កំពែងខ្មៅ ក្លិបក្រសួងកសិកម្មបានយកឈ្នះអ្នកប្រដាល់ថៃ Nam chhok បាននៅមុនស្នូរជួងបញ្ចប់ទឹកទី៤៕
ផៃ គឹមហឿត ជាជើងឯកTIFFY SUPER FIGHT ទម្ងន់៦០គ.ក្រ
0 Comments