ករណីទទួលរងការសម្លុតគំរាមតាំងពីវ័យជំទង់នោះ អាចរងបញ្ហាចំពោះសុខភាពជាច្រើនចំពោះក្មេងពេលឈានចូល ដល់ពេញវ័យ។ នេះបើ តាមការលើកជាយោបល់ តាមរយៈការសិក្សាស្រាវ ជ្រាវមួយនៅប្រទេសកាណាដា។
ក្រុមអ្នកស្រាវជ្រាវ ដែលតាមដានឃ្លាំមើលក្រុមក្មេងជំទង់ចំនួន ៦៦២ នាក់ អស់រយៈពេលពេញមួយទសវត្សរ៍តាំង ពីក្មេងៗទាំងនោះស្ថិត នៅក្នុងអាយុចន្លោះពី ១២ ទៅ ១៩ ឆ្នាំបានរកឃើញថា ទាំងការគំរាមផ្នែករូបកាយ និងផ្លូវចិត្ដ សុទ្ធតែជាប់ពាក់ព័ន្ធទៅនឹងឧបសគ្គជាច្រើនជំពូក ក្នុងនោះមាន ដូចជាទទួលរងអាការៈងាយឈឺក្បាល វិលមុខ ធេងធោង ឈឺខ្នងចង្កេះ ដេកមិនលក់ ឈឺពោះ ហើយសភាពរូបកាយក៏មិនសូវល្អទៀតផង។
ទិដ្ឋភាពជារួមនៃបញ្ហាសុខភាពពេលឈានដល់ពេញវ័យនោះ ក្រុមអ្នកស្រាវជ្រាវបានរាយការណ៍នៅក្នុង Journal of Adolescent Health។
ការសិក្សាស្រាវជ្រាវពីពេលមុនបានភ្ជាប់ភាពរងគ្រោះរបស់មនុស្សពេញវ័យនេះ ដោយប្រៀបប្រដូចទៅនឹងទ្រង់ទ្រាយនៃអាការៈតានតឹងផ្សេងៗទៀត ដែលនោះគឺជាការផ្លាស់ប្ដូរប្រែប្រួលនៅក្នុងទម្រង់ជីវសាស្ដ្រ អារម្មណ៍ ស្មារតី ឥរិយាបថ និងសង្គម។ ពេលដែលករណីបែបនេះកើតមានជាហូរហែអាចឈានដល់កើតមានបញ្ហាសុខភាពផ្លូវកាយរ៉ាំរ៉ៃ។ នេះជាការលើកឡើងដោយក្រុមអ្នកស្រាវជ្រាវ។
សម្រាប់ការសិក្សាស្រាវជ្រាវជាប្រចាំនោះ ក្រុមអ្នកស្រាវជ្រាវបានវិភាគទៅលើទិន្នន័យ ពីអ្នកធ្វើសម្ភាសន៍អំពីយុវវ័យចំនួន ៦ នាក់ ចន្លោះឆ្នាំ ២០០៣ និង ២០១៤។
ការវាស់ស្ទង់នៃសកម្មភាពសម្លុតគំរាមនោះ អ្នកចូលរួមនៅក្នុងការស្រាវជ្រាវត្រូវបានគេសួរនូវសំណួរដូចជាការលើកឡើងថា តើគេធ្លាប់ទទួលរងការរុញច្រានដោយក្រុមមនុស្សមានអាយុស្របាលគ្នាដែរ ឬយ៉ាងណា? តើមនុស្សទាំងនោះតែងតែធ្វើឲ្យមនុស្សផ្សេងទៀតស្អប់ខ្លួន ដែរទេជាដើម។ ជាបន្ដទៀតអ្នកចូលរួមត្រូវបានសួរថា តើគេជាញឹកញាប់តែងតែរងអាការៈមានដូចជា ឈឺក្បាល ធេងធោង ឬដេកមិនលក់ដែរទេ?
ជាលទ្ធផលបានរកឃើញថា ៖
-ក្មេងប្រុសមានពី ២៩ ទៅ ៥២ ភាគរយ បានរាយការណ៍ថា គេធ្លាប់រងការសម្លុតគំរាមតែនៅពេលខ្លះតែប៉ុណ្ណោះ ខណៈដែលក្មេងស្រីវិញ មានពី ២០ ទៅ ២៩ ភាគរយ។
-មានក្មេងប្រុសពី ២៨ ទៅ ៦៧ ភាគរយ ហើយក្មេងស្រីពី ៣៧ ទៅ ៥៤ ភាគរយបាននិយាយថា ពួកគេធ្លាប់ជាជនរងគ្រោះនៃការគំរាមកំហែងតាមស្មារតីនៅពេលខ្លះ។
មានប្រមាណពី ១ ទៅ ២ ភាគរយនៃអ្នកចូលរួមពិសោធន៍ស្រាវជ្រាវ តាមរយៈការធ្វើសម្ភាសន៍ថា ពួកគេរងការសម្លុតគំរាមគ្រប់ពេលទាំងអស់៕
ករណីរងការសម្លុត គំរាម ពីវ័យជំទង់ រងបញ្ហាសុខភាពពេលពេញវ័យ
0 Comments