បាត់ដំបង៖ អគារការិយាល័យទី៥ មួយខ្នង ត្រូវបានអគ្គិភ័យឆាបឆេះទាំងស្រុង ព្រមទាំងបានបំផ្លាញនូវសម្ភារៈអស់ជាច្រើនផងដែរ ដោយមិនអាចជួយអន្តរាគមន៍បាននោះឡើយ ដោយម្នាក់ៗបានសន្និដ្ឋានថា ការឆាបឆេះទាំងព្រឹកព្រលឹមនេះ សង្ស័យបណ្តាលមកពីការឆ្លងចរន្តអគ្គិសនី។
ករណីនេះ បានកើតឡើងនៅវេលាម៉ោង ៧ និង ៣០ នាទី ព្រឹកថ្ងៃទី៣០ ខែឧសភា ឆ្នាំ២០១៨ ទៅលើអគារការិយាល័យទី៥ មួយខ្នង របស់កងពលតូចថ្មើរជើងលេខ៥៣ ស្ថិតក្នុងភូមិកំប្រង់ ឃុំតាគ្រៃ ស្រុកកំរៀង ខេត្តបាត់ដំបង ដោយបានបំផ្លាញអស់សម្ភារៈមួយចំនួនធំផងដែរ។
អគារដែលត្រូវភ្លើងឆាបឆេះនេះ មានទំហំ ៨ x ២៤ ម៉ែត្រែ ធ្វើអំពីឈើ ប្រក់ស័ង្កសី ហើយសម្ភារៈដែលខូចខាតរួមមាន ម៉ូតូហុងដាសេ ១០០ ពណ៌ខ្មៅ ស៊េរីឆ្នាំ៩៦ ចំនួន១គ្រឿង រថយន្តម៉ាកកាមរីពណ៌ស ស៊េរីឆ្នាំ៩១ ចំនួន១គ្រឿង កុំព្យូទ័រចំនួន ២ គ្រឿង ម៉ាស៊ីនព្រីនចំនួន ២ គ្រឿង ម៉ាស៊ីនវាស់សម្ពាធឈាមចំនួន០១ ម៉ាស៊ីនបញ្ចាំងស្លាយចំនួន២ ធុងបាស អំភ្លី ម៉ិចស័រ ចំនួន១ឈុត អង្ករចំនួន ២០ ការុង ថវិកាចំនួន ២ លានរៀល និងប្រាក់ដុល្លារចំនួន ២០០ ដុល្លារ ព្រមទាំងរបស់របរផ្សេងៗមួយចំនួនធំទៀត។
ភ្លាមៗនោះដែរ កម្លាំងសមត្ថកិច្ច និងរថយន្តពន្លត់អគ្គីភ័យ នៃអធិការដ្ឋាននគរបាលស្រុកកំរៀង ក៏បានចេញប្រតិបត្តិការដើម្បីទប់ស្កាត់កុំអោយរាលដាលទៅកន្លែងដទៃ ប៉ុន្តែចំពោះអគារការិយាល័យទី៥នេះ ក៏ត្រូវឆេះទាំងស្រុងដែរ៕
Source: Kampuchea Thmey Daily
0 Comments