ភ្នំពេញ៖ តារាកំប្លែង និងសម្តែងជើងចាស់នាយ ឆើត ក្រោយពេលធ្លាក់ខ្លួនឈឺ និងបាត់បង់ឱកាសការងារសម្តែងសិល្បៈដូចពេលមុនៗនោះ ពេលនេះបានប្រកាសឲ្យមហាជនដឹងយ៉ាងបើកចំហថា ខ្លួនលោកពិតជាមិនចង់បាត់បង់ការងារសិល្បៈនោះទេ។ ម្យ៉ាងទៀតអ្វីដែលរូបនាយចង់បាននោះ គឺសុំទស្សនិកជននៅចងចាំរូបលោកផង។
នាយ ឆើត បានរៀបរាប់ទាំងអារម្មណ៍ស្លុតចិត្តថា ឱកាសការងារសិល្បៈរបស់ខ្ញុំបានបាត់បង់ម្ដងបន្តិចៗហើយ ខ្ញុំគ្មានអ្វីក្រៅពីសុំអោយបងប្អូនទាំងអស់គ្នាចងចាំរូបខ្ញុំបាទនេះផង ដែលបានបម្រើអារម្មណ៍បងប្អូនទស្សនិកជនអស់រយៈពេលជាង ៣០ ឆ្នាំទៅហើយ រហូតមកដល់ពេលនេះ។
តារាសម្តែងធ្លាប់គ្រងតំណែងជាបងធំ នាយ ឆើយ បានបញ្ជាក់បន្ថែមថា សង្ឃឹមថាបងប្អូននឹងជួយចែករំលែកអោយអ្នកដែលស្រលាញ់ និងគាំទ្រខ្ញុំបាទបានឃើញផង សូមអគុណបងប្អូនជាទីស្រលាញ់។ ជាមួយគ្នានេះក៏មានមហាជនជាច្រើន បានសម្តែងការអាណិតអាសូរ និងលើកឡើងថា ពួកគាត់នៅតែគាំទ្រនាយ ឆើត រហូតទោះបីជាអាជីពសិល្បៈត្រូវបានបាត់បង់ឱកាសយ៉ាងណាក្តី។
សូមបញ្ជាក់ថា តារាកំប្លែង និងសម្តែងជើងចាស់ ដែលត្រូវបានមហាជនភាគច្រើនស្គាល់ច្បាស់តាមរយៈការតួសម្តែងធ្វើជាបងធំ តួរំលោភ និងតួកាចវ៉ៃកាប់ចាក់ នាយ ឆើយ បច្ចុប្បន្នកំពុងតែសម្រាកព្យាបាលនៅឯគេហដ្ឋានរបស់លោកផ្ទាល់ ខណៈដែលការព្យាបាលសព្វថ្ងៃក៏ពឹងផ្អែកលើឱសថបុរាណខ្មែរ (គ្រូខ្មែរ) គួបផ្សំនឹងវិជ្ជាសាស្ត្រពេទ្យផងដែរ។ កន្លងមកនាយ ឆើត ក៏បានធ្វើការអំពាវនាវស្នើសុំការឧបត្ថម្ភពីសប្បុរសជន ដើម្បីព្យាបាលជំងឺផងនោះ៕
Source: Kampuchea Thmey Daily
0 Comments