អ្នកប្រដាល់ជើងខ្លាំងរបស់កម្ពុជា ២ រូប គឺ ឈុត សេរីវ៉ាន់ថង និង យុគ យក្សផ្លែ នឹងត្រូវជួបប្រកួតជាមួយថៃ នៅក្នុងការចាប់ផ្តើមថ្ងៃដំបូង នៃព្រឹត្តិការណ៍ប្រដាល់ដណ្តើមខ្សែក្រវាត់ខារ៉ាបាវរដូវកាលទី៦ ទម្ងន់ ៥៧ គីឡូក្រាម នារសៀលថ្ងៃសៅរ៍ ទី០២ មិថុនា ២០១៨ នៅសង្វៀន SEATV ។
ព្រឹត្តិការណ៍ប្រដាល់ដណ្តើមខ្សែក្រវាត់ខារ៉ាបាវរដូវកាលទី៦នេះ មានអ្នកប្រដាល់ជើងខ្លាំងកម្ពុជា៤រូប អ្នកប្រដាល់ជើងខ្លាំងថៃ៤រូប ដើម្បីវាយដណ្តើមយកខ្សែក្រវាត់របស់ភេសជ្ជៈខារ៉ាបាវ ២០១៨ ដែលមានទឹកប្រាក់រង្វាន់ ៥.០០០ ដុល្លារ សម្រាប់អ្នកជាប់ជាជើងឯក។
ឈុត សេរីវ៉ាន់ថង និង យុគ យក្សផ្លែ អ្នកប្រដាល់ជើងខ្លាំងរបស់កម្ពុជា ត្រូវឡើងប្រកួតជាមួយអ្នកប្រដាល់ថៃមុនគេ។ ឈុត សេរីវ៉ាន់ថង អ្នកប្រដាល់វ័យក្មេងនៃក្លិបរាហ៊ូកីឡាខេត្តបាត់ដំបង ត្រូវជួបប្រកួតជាមួយអ្នកប្រដាល់ថៃឈ្មោះ Kamlay Youk ។ សេរីវ៉ាន់ថង ជាអ្នកប្រដាល់វ័យក្មេង គេមានប្រវត្តិប្រកួតចំនួន៥៤លើក ឈ្នះ៤៧លើក ចាញ់០៦លើក និងស្មើ០១លើក ហើយធ្លាប់ផ្តួលដៃគូអោយសន្លប់ចំនួន ១៨ លើក។ គេប្រកួតលើកចុងក្រោយនេះ បានវាយឈ្នះអ្នកប្រដាល់ថៃ Ory Sayam ក្នុងទឹកទី៤ នៅលើសង្វៀន SEATV នេះ។ ដូច្នេះជួប Kamlay Youk នេះប្រហែលជាមិនពិបាកក្នុងការយកឈ្នះនោះទេ។ ឈុត សេរីវ៉ាន់ថង គេវាយល្អនិងខ្លាំង ពិសេសនោះគឺស្នៀតជង្គង់ និងកណ្តាប់ដៃរបស់គេ។
ទោះជាបែបនេះក៏ដោយក៏ ឈុត សេរីវ៉ាន់ថង មិនអាចមើលងាយ Kamlay Youk នោះដែរ ព្រោះអ្នកប្រដាល់ថៃគេមានកម្លាំងខ្លាំង កណ្តាប់ដៃរហ័ស។ ចាំមើលលើកនេះ សេរីវ៉ាន់ថង អាចយកឈ្នះ Kamlay Youk បានដែរឬអត់នោះ?។ Kamlay Youk គេជាអ្នកប្រដាល់ដែលមានកំណត់ត្រាប្រកួតចំនួន៨៩លើក ឈ្នះ៧០លើក ចាញ់១៨លើក និងស្មើ០១លើក។ អ្នកប្រដាល់ថៃរូបនេះ មានកម្ពស់ទាបជាង ឈុត សេរីវ៉ាន់ថង ដោយគេមានកម្ពស់ ១,៦៤ ម៉ែត្រ ហើយ សេរីវ៉ាន់ថង ១,៦៨ ម៉ែត្រ ដែលបញ្ហានេះជាផលវិបាកមួយសម្រាប់ Kamlay Youk ក្នុងការយកឈ្នះលើ ឈុត សេរីវ៉ាន់ថង នោះ។
ចំពោះ យុគ យក្សផ្លែ អ្នកប្រដាល់ក្លិបបូរីរាជសីហ៍មានរិទ្ធ នឹងត្រូវជួបប្រកួតជាមួយអ្នកប្រដាល់ថៃ TO TO សម្រាប់ការប្រកួតជម្រុះជុំដំបូងនេះដែរ។ អ្នកប្រដាល់ថៃ TO TO នេះ គេជាអ្នកប្រដាល់ជើងខ្លាំងមួយរូបដែរនៅស្រុកថៃ តែគេមិនធ្លាប់មកប្រកួតនៅស្រុកខ្មែរនោះទេ។ នេះបើតាមលោក ញាណ សុធី អ្នកចាត់ចែងកម្មវិធីប្រដាល់ SEA TV អោយដឹងនោះ។
លោក ញាណ សុធី បានបង្ហើបថា TO TO ជាជើងខ្លាំងនៅស្រុកថៃ។ អ្នកប្រដាល់ថៃរូបនេះមានកំណត់ត្រាប្រកួត៥៥លើក ឈ្នះ៤៤លើក ចាញ់១១លើក។ ទោះជាយ៉ាងណា អ្នកប្រដាល់ថៃរូបនេះមិនដឹងថា អាចយកឈ្នះ យុគ យក្សផ្លែ បានឬអត់នោះទេ ក្នុងការជួបគ្នាជុំដំបូងនេះ។ យក្សផ្លែ ជើងខ្លាំងរបស់កម្ពុជានេះ ធ្លាប់ប្រកួតជាមួយថៃច្រើននាក់ហើយ ។ យក្សផ្លែគេមានបទពិសោធន៍ច្រើនក្នុងការប្រកួត។ គេមានស្នៀតទាត់ល្អ ពិសេសកណ្តាប់ដៃខ្លាំង ដោយវាយចេញចូលរហ័ស ហើយជង្គង់ កែង ក៏ល្អផងដែរ។
ទោះជាបែបនេះក្តី មិនទាន់ហ៊ានសន្និដ្ឋានថា យុគ យក្សផ្លែ ជួបសំណាងល្អនៅក្នុងការប្រកួតជាអ្នកប្រដាល់ថៃ TO TO នេះឡើយ?។ យក្សផ្លែ មានប្រវត្តិប្រកួតចំនួន១៥៥លើក ឈ្នះ១៣០លើក ចាញ់២១លើក និងស្មើ០៤លើក។ ចាំមើល យុគ យក្សផ្លែ អាចយកឈ្នះ TO TO បានឬអត់?៕
Source: Kampuchea Thmey Daily
0 Comments