ប្រធានក្រុមប្រឹក្សាខណ្ឌច្បារអំពៅ កោតសរសើរការប្រឹងប្រែងរបស់គណៈអភិបាលខណ្ឌ ដែលលុបបំបាត់ដេប៉ូសំរាមអនាធិបតេយ្យ

Cambodia News May 30, 2018

ភ្នំពេញ៖ ក្នុងសម័យប្រជុំសាមញ្ញលើកទី៤៨ របស់ក្រុមប្រឹក្សាខណ្ឌច្បារអំពៅ អាណត្តិទី២ ដែលប្រព្រឹត្តិធ្វើឡើងនៅព្រឹកថ្ងៃទី៣០ ខែឧសភា នេះ លោក អ៊ុំ ម៉ារ៉េត ប្រធានក្រុមប្រឹក្សាខណ្ឌ បានធ្វើការកោតសរសើរដល់គណៈអភិបាលខណ្ឌក្នុងអង្គប្រជុំផ្ទាល់ ពីការខិតខំលុបបំបាត់ដេប៉ូសំរាមក្នុងមូលដ្ឋាន។

លោក អ៊ុំ ម៉ារ៉េត បានបញ្ជាក់ជូនសមាជិក សមាជិកា ក្នុងអង្គប្រជុំថា ក្នុងអំឡុងខែឧសភានេះលោក ចេង មុនីរ៉ា អភិបាលនៃគណៈអភិបាលខណ្ឌច្បារអំពៅ បានដឹកនាំកម្លាំងដែលមានទ្រង់ទ្រាយធំ ចុះទៅធ្វើអនាម័យកើបសំអាតសំរាមតាមដេប៉ូធំៗ ដែលក្លាយទៅជាគំនរសំរាមដ៏ធំនៅតាមដីឡូត៍ដែលពុំមានម្ចាស់ស្នាក់នៅ។ លោកប្រធានបន្តថា សំរាមទាំងនេះ បើពុំបានប្រើកម្លាំងច្រើនរហូតដល់ប្រើត្រាក់ទ័រកើបដាក់រថយន្តទេនោះក៏មិនអស់ដែរ ព្រោះជាគំនរសំរាមដែលមានជាយូរឆ្នាំមកហើយ។ សកម្មភាពនេះធ្វើឲ្យប្រជាពលរដ្ឋក្នុងមូលដ្ឋាន ក៏ដូចជាក្រុមប្រឹក្សាខណ្ឌធ្វើការកោតសរសើរយ៉ាងខ្លាំង។

ក្នុងឱកាសនោះក្រុមប្រឹក្សា ក៏ដូចជាគណៈអភិបាលខណ្ឌច្បារអំពៅ សំណូមពរដល់លោកចៅសង្កាត់ និងលោកមេភូមិ សូមធ្វើការផ្សព្វផ្សាយជូនដល់បងប្អូនប្រជាពលរដ្ឋក្នុងមូលដ្ឋានដែលខ្លួនគ្រប់គ្រង ឲ្យបញ្ឈប់ការយកសំរាមមកបោះចោលតាមដងផ្លូវ និងមុខដីឡូត៍ទំនេរចាប់ពីថ្ងៃនេះតទៅ បើពុំដូច្នោះទេសំរាមនៅតែមានពាសពេញតាមដងផ្លូវដដែលជាដដែល ដោយគ្មានការចូលរួមពីសំណាក់បងប្អូនប្រជាពលរដ្ឋ៕