អ្នកប្រដាល់ ឈួន រិទ្ធី សមាគមកីឡាប្រដាល់ក្រសួងការពារជាតិ ត្រូវគេផ្គូផ្គងឲ្យជួបប្រកួតជាមួយ វង្ស វិឆ័យ អ្នកប្រដាល់ក្លិបកងពលតូចទ័ពឆ័ត្រយោង៩១១ នារសៀលថ្ងៃទី០២ ខែមិថុនា ឆ្នាំ២០១៨ នេះនៅលើសង្វៀនបាយ័នស្ទឹងមានជ័យ។
ឈួន រិទ្ធី អតីតអ្នកប្រដាល់វាយក្នុងទ្រុង បានលេចមុខមកសាជាថ្មីម្តងទៀត ក្រោយពីចាញ់ក្រោមកណ្តាប់ដៃ ឯម ឡេងលី ក្លិបថ្មគោលពោធិសែនជ័យ ដោយពិន្ទុ កាលពីថ្ងៃទី១៣ ឧសភា ២០១៨ កន្លងទៅនេះ។ រិទ្ធី ជាអ្នកប្រដាល់ម្នាក់ដែលមានថ្វីដៃល្អ វាយខ្លាំង ពិសេសកណ្តាប់ដៃ និងកែងរបស់គេ។ ប៉ុន្តែជាមួយនឹងមានថ្វីដៃល្អ ឈួន រិទ្ធី មានចិត្តប្រដាល់តូចទៅវិញ។
ទោះជាយ៉ាងណា ជួបប្រកួតជាមួយ វង្ស វិឆ័យ លើកនេះ ឈួន រិទ្ធី ក៏រឹតតែពិបាកក្នុងការសង្ឃឹមឈ្នះ វិឆ័យ ដែរ ព្រោះថា វង្ស វិឆ័យ ជាអ្នកប្រដាល់ជើងខ្លាំងស្រករក្រោយ មានបទពិសោធន៍និងល្បិចកលប្រកួតច្រើន។ ការប្រកួតចុងក្រោយរបស់ វង្ស វិឆ័យ (០៤ កុម្ភៈ ២០១៨) ក៏វាយចាញ់ ឯម ឡេងលី ដោយពិន្ទុដែរ។ សម្រាប់ការជួបគ្នារវាង ឈួន រិទ្ធី និង វង្ស វិឆ័យ នេះគេមិនហ៊ានទាយថា នរណាឈ្នះ នរណាចាញ់នោះឡើយ?។ ពួកគេពីរនាក់នេះប្រកួតគ្នាក្នុងប្រភេទទម្ងន់ ៧០ គីឡូក្រាម។
លន បញ្ញា អ្នកប្រដាល់ស្រករក្រោយនៃក្លិបមហិទ្ធរិទ្ធតាដំបងដែក នឹងជួបសាកកណ្តាប់ដៃជាមួយជើងចាស់ ឯម សុធី អ្នកប្រដាល់ក្លិបថ្មគោលពោធិសែនជ័យ ដោយប្រកួតក្នុងទម្ងន់ ៥៧ គីឡូក្រាម។ ពីរនាក់នេះក៏មិនធ្លាប់ដែលជួបគ្នាដែរកន្លងមក។
អ្នកប្រដាល់ស្រករលោយ លន បញ្ញា នេះជាអ្នកប្រដាល់ដែលមានកណ្តាប់ខ្លាំង និងមានកម្លាំងស៊ុហ្វរឹងមាំ។ គេប្រកួតចុងក្រោយនេះវាយចាញ់ ធន មករា អ្នកប្រដាល់សមាគមកីឡាប្រដាល់ក្រសួងការពារជាតិដោយពិន្ទុ។ ទោះជាយ៉ាងណា ជួបជាមួយ ឯម សុធី ដែលជាអ្នកប្រដាល់ជើងចាស់នោះ លន បញ្ញា រាងយ៉ាប់ដែរ។ ប៉ុន្តែ ឯម សុធី ក៏មិនសូវទៀងទាត់ប៉ុន្មានដែរ ដែលការប្រកួតរបស់គេ ជួនល្អ ជួនអន់។ សុធី ប្រកួតចុងក្រោយវាយចាញ់ ផាន ផាត់យុទ្ធ អ្នកប្រដាល់ក្លិបសាលវ័ន្តកីឡាដោយពិន្ទុ។ សម្រាប់ការជួបប្រកួតជាមួយ លន បញ្ញា លើកនេះ ពុំដឹងថា ឯម សុធី អាចវាយឈ្នះ លន បញ្ញា បានឬអត់នោះទេ ?។
ងួន គា អ្នកប្រដាល់ក្លិបរាជសីហ៍ខេត្តរតនគិរី ត្រូវគេផ្គូអោយជួបប្រកួតជាមួយ ឆាយ មាស អ្នកប្រដាល់ក្លិបសំរោងកោងកីឡាខេត្តបាត់ដំបង ដោយប្រកួតក្នុងទម្ងន់ ៦០ គីឡូក្រាម។ អ្នកប្រដាល់ពីរនាក់នេះ ពុំធ្លាប់ដែលប៉ះគ្នាទេពីមុនមក។ឆាយ មាស ជាអ្នកប្រដាល់ចាស់វស្សាហើយ គេមានក្បាច់គុនល្អ ទិចនិកប្រកួតច្រើន តែគេអន់កម្លាំងស៊ុហ្វ ដោយសារគេមានវ័យច្រើនហើយ។ ការប្រកួតចុងក្រោយនេះ ឆាយ មាស វាយចាញ់ក្មេងស្រករក្រោយ គឺ ម៉ឺន មេឃ ក្លិបអេភូថងកីឡាដោយពិន្ទុ កាលពីថ្ងៃទី១៩ ឧសភា កន្លងមកនេះ។
ចំណែកការប្រកួតចុងក្រោយរបស់ ងួន គា វិញគេក៏វាយចាញ់ក្មេងស្រករក្រោយដែរគឺ ចាន់ សាន់ អ្នកប្រដាល់ក្លិបនិរោធមានជ័យដោយពិន្ទុ។ យ៉ាងណា ងួន គា នេះមិនងាយចាញ់ដោយស្រួលៗនោះឡើយ។ ងួន គា គេវាយខ្លាំងមិនចេះញញើតអ្នកណានោះឡើយ បើសិនជាជួបដៃគូខ្លាំង នោះ ងួន គា នឹងហ៊ានប្តូរមិនខាន។ ចាំមើលរវាង ងួន គា និង ឆាយ មាសនេះ តើនរណាជាអ្នកឈ្នះក្នុងការប្រកួតនេះ។
ចាន់ សុខៃ អ្នកប្រដាល់ក្លិបនិរោធមានជ័យ នឹងត្រូវជួបប្រកួតជាមួយ វុត្ថា លាន់លិញ អ្នកប្រដាល់ក្លិបអង្គរធំគុនខ្មែរ ដោយជួបគ្នាក្នុងទម្ងន់ ៥៧ គីឡូក្រាម។ ពួកគេទាំងពីរនេះជាអ្នកប្រដាល់ស្រករក្រោយដូចគ្នា។ ដូច្នេះសម្រាប់ការជួបគ្នានេះ មិនដឹងថានរណាឈ្នះនោះទេ?៕
Source: Kampuchea Thmey Daily
0 Comments