ព្រៃវែង ៖ របរចិញ្ចឹមកង្កែប បានជួយកាត់បន្ថយនូវភាពក្រីក្ររបស់ពលរដ្ឋ ដោយសារទីផ្សារកង្កែបមានកម្រិតខ្ពស់ អ្នកពិសាចូលចិត្តយកទៅឆាគ្រឿង ឬលីងគល់ស្លឹកគ្រៃ ឬក៏ងៀតកង្កែប សម្រាប់យកទៅហូប ក្លែម ឆ្ងាញ់ពិសាគ្រប់ពេលវេលា។ កត្តានេះហើយទើបកសិករឈ្មោះ រស់ ផល្លា នៅភូមិស្ពាន ឃុំកោះចេក ស្រុកពាមជរ៍ ខេត្តព្រៃវែង ជ្រើសរើសរបរចិញ្ចឹមកង្កែបលក់ទាំងកូនកង្កែប និងកង្កែបសាច់។
កសិករបានបង្ហាញពីវិធីភ្ញាស់កូនកង្កែបថា ការចិញ្ចឹមកង្កែបយកកូន គឺក្នុងមួយម៉ែត្រការ៉េទឹកត្រូវដាក់មេ១ ឈ្មោល១ ហើយវាអាចបង្ហូរពងបានចាប់ពី ៣០០០ ទៅ ៨០០០ ពង ប៉ុន្តែត្រូវជ្រើសរើសពូជអោយបានត្រឹមត្រូវ យកមេ ឬក៏ឈ្មោលមកពីតំបន់ផ្សេងៗគ្នា ជៀសវាងសំបុកតែមួយ គឺវាអាចកូនចេញមកមិនបានច្រើន និងងាយងាប់ ចិញ្ចឹមមិនធំ។
កសិករបន្តថា កង្កែបមេពូជ និង កង្កែបឈ្មោល ចាប់ពីអាយុ១ឆ្នាំ វាបានកង្កកំណើតល្អ ហើយវាពងចាប់ពីខែមិថុនា រហូតដល់ខែវិច្ឆិកា ក្នុងចន្លោះពេលហ្នឹងវាអាចបង្ហូរពងបាន ៣ ទៅ ៤ ដង បែបពាក់កណ្ដាលធម្មជាតិ ឬហៅថាតាមបែបសម្ព័ន្ធមិត្ត វាឲ្យផលច្រើនលើសពីរបួនដងក្នុងមួយឆ្នាំ ខុសពីវាពាក់គ្នា ឬស្គាល់គ្នាញាស់តាមធម្មជាតិនៅតាមវាលដោយវាញាស់ម្តង ឬពីរដងប៉ុណ្ណោះក្នុងមួយឆ្នាំ។
កសិករបន្តថា ពេលពងចេញមកក្រៅរបស់កង្កែបមានរយៈពេល៨ម៉ោងនឹងញាស់ ហើយក្រោយពីញាស់វាមានអាហារបម្រុងជាប់នឹងខ្លួនវា វាអាចស៊ីបាន៣ថ្ងៃ បន្ទាប់មកបានយើងដាក់ពងទាដែលស្ងោអោយឆ្អិន ឆ្កឹះយកតែពងក្រហមអោយកូនកង្កែបវាស៊ី ហើយពេលកូនកង្កែបនៅតូចយើងមិនអាចកំណត់បានទេថាវាស៊ីអស់ពងទាប៉ុន្មានក្នុងមួយថ្ងៃ តែយើងអាចចំណាំថា ដាក់តិចល្មមកុំអោយតែសល់។
កសិករបន្ថែមទៀតថា កូនកង្កែបអាចលក់ចេញបានអាយុវាចាប់ពី ៤០ ថ្ងៃទៅ ហើយក្នុងមួយក្បាលលក់ចេញបានតម្លៃ ៥០០៛។ ចិញ្ចឹមរយៈពេល ៤ ទៅ ៦ ខែយើងអាចចាប់លក់បាន ដោយកង្កែប ៨ ទៅ ១០ ក្បាល បានមួយគីឡូក្រាម ដែលតម្លៃជាមធ្យមមួយគីឡូក្រាម ៨,០០០ រៀល ហើយតាមរយៈការចិញ្ចឹមកង្កែប មួយខែៗអាចរកចំណូលបានជាង ៣ លានរៀល ជួយកាត់បន្ថយនូវភាពក្រីក្រមួយកម្រិតធំ៕ 
Source: Kampuchea Thmey Daily
0 Comments