ប្រទេសរុស្ស៊ីកាលពីថ្ងៃអង្គារបានច្រានចោលការអំពាវនាវនៅ UN ដើម្បីឲ្យខ្លួនទទួលយកការទទួលខុសត្រូវចំពោះការធ្លាក់ជើងហោះហើរ MH17 លើប្រទេសអ៊ុយក្រែនបន្ទាប់ពីការស៊ើបអង្កេតមួយបានរកឃើញថា មីស៊ីលរបស់កងទ័ពរុស្ស៊ីត្រូវបានប្រើនៅក្នុងការវាយប្រហារនោះ។
នៅក្នុងកិច្ចប្រជុំរបស់ក្រុមប្រឹក្សាសន្តិសុខស្តីពីអ៊ុយក្រែន, រដ្ឋមន្ត្រីការបរទេសហូឡង់លោក Stef Blok បានអំពាវនាវឲ្យក្រុងមូស្គូទទួលយកការរកឃើញដែលថា យន្តហោះនេះត្រូវបាញ់ទម្លាក់ដោយមីស៊ីល BUK ដែលផលិតនៅប្រទេសរុស្ស៊ី។
ឯកអគ្គរដ្ឋទូត Vassily Nebenzia បានប្រាប់កិច្ចប្រជុំក្រុមប្រឹក្សាថា “យើងមិនអាចទទួលយកការសន្និដ្ឋានគ្មានមូលដ្ឋានរបស់ JIT ដែលជាក្រុមស៊ើបអង្កេតរួមដឹកនាំដោយហូឡង់បានទេ”។
មនុស្សទាំងអស់២៩៨នាក់នៅលើជើងហោះហើររបស់ក្រុមហ៊ុនអាកាសចរណ៍ម៉ាឡេស៊ីមួយនេះខណៈធ្វើដំណើរពីទីក្រុងអាំស្ទើដាំទៅទីក្រុងគួឡាឡាំពួរគឺត្រូវបានសម្លាប់នៅពេលគ្រាប់មីស៊ីលបានវាយប្រហារយន្តហោះអំឡុងពេលវាហោះលើដែនដីដែលកាន់កាប់ដោយពួកឧទ្ទាមគាំទ្ររុស្ស៊ីនៅប្រទេសអ៊ុយក្រែនខាងកើតកាលពីខែកក្កដាឆ្នាំ២០១៤។
ឆ្លើយតបទៅនឹងលោក Nebenzia, រដ្ឋមន្ត្រីការបរទេសហូឡង់បាននិយាយថា អំណះអំណាងរបស់គាត់គឺគ្មានអ្វីថ្មីទេហើយលោកបានជំរុញម្តងទៀតឲ្យរុស្ស៊ីធ្វើការជាមួយហូឡង់និងអូស្ត្រាលីដើម្បីកំណត់ជនល្មើស។
ទន្ទឹមនេះដែរ ឯកអគ្គរដ្ឋទូតអាមេរិកលោកស្រី Nikki Haley បានសម្តែងការគាំទ្រយ៉ាងខ្លាំងក្លាចំពោះការអំពាវនាវរបស់ហូឡង់និងអូស្ត្រាលីដែលឲ្យរុស្ស៊ីទទួលស្គាល់តួនាទីរបស់ខ្លួននៅក្នុងសោកនាដកម្មនេះនិងជួយនាំខ្លួនអ្នកទទួលខុសត្រូវចំពោះការបាញ់ប្រហារនេះ។
លោកស្រី Haley បាននិយាយថា “ថ្វីបើមានការបដិសេធយ៉ាងច្បាស់លាស់ក៏ដោយ វាគ្មានអ្វីត្រូវសង្ស័យនោះទេដែលថា ប្រទេសរុស្ស៊ីកំពុងជំរុញឲ្យមានជម្លោះនៅអ៊ុយក្រែន”។
គួរបញ្ជាក់ថា មនុស្សជាង១ម៉ឺននាក់ត្រូវបានសម្លាប់ចាប់តាំងពីការបះបោរដែលគាំទ្រដោយក្រុងមូស្គូបានផ្ទុះឡើងនៅក្នុងខែមេសាឆ្នាំ២០១៤បន្ទាប់ពីរុស្ស៊ីកាត់យកឧបទ្វីប Crimea ពីប្រទេសអ៊ុយក្រែន៕
Source: Kampuchea Thmey Daily
0 Comments