ភ្នំពេញ៖ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ រួមដំណើរជាមួយលោកអនុរដ្ឋលេខាធិការទទួលបន្ទុករដ្ឋបាលព្រៃឈើ កាលពីថ្ងៃអាទិត្យ បានចុះពិនិត្យមើលទីតាំងប្រារព្ធពិធីរុក្ខទិវា ៩ កក្កដា ឆ្នាំ២០១៨ ស្ថិតនៅក្នុងស្ថានីយដាំឈើថ្មរូងលើផ្ទៃដី ៥០ ហិកតា ស្ថិតក្នុងភូមិព្រៃកអំបិល ឃុំកោះតូច ស្រុកទឹកឈូ ខេត្តកំពត នៅតាមបណ្តោយផ្លូវជាតិលេខ ៣ ចម្ងាយប្រមាណជា ១៨ គម។
ក្រសួងបានឲ្យដឹងថា នៅព្រឹកថ្ងៃអាទិត្យ ១៣កើត ខែជេស្ឋ សំរឹទ្ធិស័ក ព.ស ២៥៦២ ត្រូវនឹងថ្ងៃទី២៧ ខែឧសភា គ.ស ២០១៨ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ រួមដំណើរជាមួយលោក ជាវ តាយ អភិបាលនៃគណៈអភិបាលខេត្តកំពត និងលោកអនុរដ្ឋលេខាធិការទទួលបន្ទុករដ្ឋបាលព្រៃឈើ រួមទំាងសហការី បានចុះពិនិត្យមើលទីតាំងប្រារព្ធពិធីរុក្ខទិវា ៩ កក្កដា ឆ្នាំ២០១៨ ស្ថិតនៅក្នុងស្ថានីយដាំឈើថ្មរូងលើផ្ទៃដី ៥០ ហិកតា ស្ថិតក្នុងភូមិព្រៃកអំបិល ឃុំកោះតូច ស្រុកទឹកឈូ ខេត្តកំពត នៅតាមបណ្តោយផ្លូវជាតិលេខ ៣ ចម្ងាយប្រមាណជា ១៨ គីឡូម៉ែត្រ។ សូមបញ្ជាក់ថា ការរៀបចំព្រះរាជពិធីរុក្ខទិវានេះ តែងតែប្រព្រឹត្តទៅនៅថ្ងៃទី ៩ ខៃកក្កដា ឆ្នាំ២០១៨។
ដោយឡែកនៅថ្ងៃដដែលនោះ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ រួមដំណើរជាមួយឯកឧត្តមអនុរដ្ឋលេខាធិការទទួលបន្ទុករដ្ឋបាលព្រៃឈើ ហើយនិងសហការី បានបន្តដំណើរចុះពិនិត្យមើលកសិដ្ឋាន ចម្ការស្វាយចន្ទី និងម្រេចធម្មជាតិ ដែលមានម្ចាស់កសិដ្ឋានឈ្មោះ លឹម ស្រេង ស្ថិតនៅក្នុង ឃុំបឹងនិមល ស្រុកឈូក ខេត្តកំពតលើផ្ទៃដី ៤០០ ហិកតា ក្នុងនេះម្រេចដាំបានចំនួន ២ ម៉ឺនជន្លុង ស្ថិតនៅតាមបណ្តោយផ្លូវជាតិលេខ ៤១។
តាមការបញ្ជាក់របស់ម្ចាស់កសិដ្ឋានបានឲ្យដឹងថា ក្នុងឆ្នាំនេះអាចនឹងទទួលផលបាន ១) ស្វាយចន្ទីប្រមាណជា ១៥០ តោន និង ២) ម្រេចបានចំនួន ៥ តោន (ការប្រមូលផលលើកទីមួយ)។ ចំពោះតម្លៃម្រេចវិញគឺមានតម្លៃថេរ គឺពី ១៥ ដុល្លារ រហូតដល់ ៣០ ដុល្លារក្នុងមួយគីឡូក្រាម ដោយសារកសិដ្ឋាននេះស្ថិតនៅក្នុងសមាគមម្រេចកំពត ដោយឡែកចំពោះផលស្វាយចន្ទីមានតម្លៃប្រមាណជាជាង ២ ដុល្លារក្នុងមួយគីឡូក្រាម៕
Source: Kampuchea Thmey Daily
0 Comments