ព្រះសីហនុ ៖ ជនសង្ស័យឈ្មោះ GUO PENG ភេទប្រុស អាយុ៣១ឆ្នាំ ជនជាតិចិន មុខរបរ បុគ្គលិកកាស៊ីណូ ជីន ម៉ា នារសៀលថ្ងៃទី២៩ ខែឧសភា ឆ្នាំ២០១៨នេះ ត្រូវបានសមត្ថកិច្ចប៉ូលិសការិយាល័យចរាចរណ៍ជើងគោក នែស្នងការដ្ឋាននគរបាលខេត្តព្រះសីហនុ សម្រេចកសាងសំណុំរឿងទៅសាលាដំបូងខេត្ត ពាក់ព័ន្ធករណី (បើកបរដោយគ្មានប័ណ្ណបើកបររថយន្ត) បង្កឲ្យមានមនុស្សស្លាប់ និងរបួស ដើម្បីផ្ដន្ទាទោសតាមផ្លូវច្បាប់។
គួរបញ្ជាក់ផងដែរថា ជនសង្ស័យឈ្មោះ GUO PENG ភេទប្រុស អាយុ៣១ឆ្នាំ ជនជាតិចិន មុខរបរបុគ្គលិកកាស៊ីណូ ជីន ម៉ា ខាងលើនេះ កាលពីយប់ថ្ងៃទី២៧ ខែឧសភា ឆ្នាំ ២០១៨ កន្លងទៅនេះ បានបើកបររថយន្តមួយគ្រឿងម៉ាកហាយលែនឌ័រ យ៉ាងលឿនក្នុងទីប្រជុំជន ហើយក៏បានទៅបុកជាមួយម៉ូតូមួយគ្រឿង នៅត្រង់ចំណុចមុខស្នងការដ្ឋាននគរបាលខេត្តតែម្តង បណ្តាលឲ្យជនរងគ្រោះជិះម៉ូតូជាជនជាតិវៀតណាម មានមុខរបរកម្មករសំណង់ម្នាក់រងរបួសធ្ងន់ ក្រោយមកបានបាត់បង់ជីវិតពេលបញ្ជូនទៅមន្ទីរពេទ្យ និងស្ត្រីជនជាតិចិនម្នាក់ទៀតដែលរួមដំណើរក្នុងរថយន្តរងរបួសផងដែរ ដោយជនជាប់សង្ស័យជាជនជាតិចិនខាងលើនេះ សមត្ថកិច្ចប៉ូលិសបានបញ្ជាក់ថា បើកបរដោយគ្មានប័ណ្ណបើកបររថយន្ត និងបើកល្បឿនលឿនក្នុងទីប្រជុំជន៕ 
Source: Kampuchea Thmey Daily
0 Comments