បាត់ដំបង៖ យុវជនម្នាក់ បានដេកស្តូកស្តឹងស្ថិតក្នុងដង្ហើមចង្រិត ដែលត្រូវបានប្រជាពលរដ្ឋនាំគ្នាជួយលើកចេញពីលើទ្រូងថ្នល់ ព្រមទាំងបានដឹកបញ្ជូនទៅកាន់មន្ទីរពេទ្យដើម្បីសង្គ្រោះផងដែរ ខណៈដែលបានបើកបរម៉ូតូហើយមានការប៉ះទង្គិចជាមួយនឹងរថយន្តធុនធ្ងន់យ៉ាងពេញទំហឹងរួចមក រហូតដល់ម៉ូតូមើលលែងយល់តែម្តង។
ករណីគ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង ១០ ព្រឹក ថ្ងៃទី៣០ ខែឧសភា ឆ្នាំ២០១៨ លើកំណាត់ផ្លូវជាតិលេខ៥ ក្នុងភូមិអណ្តូងចេញ សង្កាត់អូរចារ ក្រុងបាត់ដំបង ខេត្តបាត់ដំបង រវាងម៉ូតូម៉ាកឌ្រីម ពណ៌ខ្មៅ ពាក់ស្លាកលេខ បាត់ដំបង 1H-5437 ជាមួយនឹងរថយន្តធុនដឹកជញ្ជូនប្រភេទក្លាដឺហ្វម ដោយក្បាលរថយន្តពាក់ស្លាកលេខ តាកែវ 3A-1839 រីឯកន្ទុយរថយន្តពាក់ស្លាកលេខ ព្រះសីហនុ 4A-1938 ក្នុងទិសដៅច្រាស់គ្នា។
បើតាមសាក្សីមួយចំនួនបាននិយាយថា នៅមុនពេលកើតហេតុគេសង្ស័យថា យុវជនដែលជាអ្នកបើកបរម៉ូតូអាចប្រើប្រាស់ល្បឿនលឿន ហើយសង្ស័យឡើងជែងទៅនឹងអ្វីមួយដែលនៅពីមុខ ទើបមានការប៉ះទង្គិចគ្នាយ៉ាងខ្លាំងរហូតធ្វើអោយម៉ូតូមើលលែងយល់ ដោយស្លាកស្នាមគឺម៉ូតូបានឆ្លងគំនូសលឿងចូលទៅខាងឆ្វេងទៅហើយ។
ភ្លាមៗនោះគេសង្កេតឃើញថា អ្នកបើកបររថយន្តបានព្យាយាមបើករត់ប្រហែល១គីឡូម៉ែត្រ រួចគេក៏បានចតរថយន្តទុកចោលនៅត្រង់ទឹកដី ភូមិពពាលខែ ឃុំជ្រៃ ស្រុកថ្មគោល ហើយបានរត់គេចខ្លួនបាត់ស្រមោល ដោយរថយន្តនេះមានរូបសញ្ញាត្បូងពេជ្រ ដែលជារបស់ក្រុមហ៊ុន ឈុន លីម ប៉ុន្តែបច្ចុប្បន្នត្រូវបានធ្លាក់មកលើកូនប្រុសវិញ ដែលជាអ្នកមើលការខុសត្រូវ គឺលោក ឈុន បូរ៉ា ព្រោះនៅពេលនោះដែរ គេឃើញលោក បូរ៉ា បើករថយន្តដ៏ទំនើបមួយគ្រឿងមកឈប់ក្បែររថយន្តធំ សង្ស័យមកពិនិត្យស្ថានការណ៍ ដោយឡែកកម្លាំងការិយាល័យចរាចរណ៍ផ្លូវគោកខេត្ត ក៏បានចុះទៅធ្វើការវាស់វែង និងនាំរថយន្តមកកាន់ការិយាល័យដើម្បីរក្សាទុកជាបណ្ដោះអាសន្ន ចំណែកជនរងគ្រោះគេនៅមិនទាន់ស្គាល់អំពីអត្តសញ្ញាណនៅឡើយទេ ដោយសារតែគ្មានអ្វីជាប់នឹងខ្លួនបន្តិចទាល់តែសោះ៕ 
Source: Kampuchea Thmey Daily
0 Comments