ភ្នំពេញ៖ កាលពីព្រឹកថ្ងៃទី២៩ ខែឧសភា ឆ្នាំ២០១៨ លោកបណ្ឌិត លី ឆេង អគ្គនាយកប៊ែលធីហ្គ្រុប និងជាតំណាងរាស្ត្រមណ្ឌលភ្នំពេញ បានអញ្ជើញទៅជួបសួរសុខទុក្ខ និងនាំយកថវិកាក្រុមហ៊ុនធានារ៉ាប់រងហ្វតតេ ចំនួន ៣,០០០ ដុល្លារ ជូនដល់ក្មួយប្រុស សុទ្ធ ពន្លឺបញ្ញា សិស្សសាលាប៊ែលធី អន្តរជាតិ ថ្នាក់ទី១២ ដែលជួបគ្រោះថ្នាក់ចរាចរណ៍ ព្រមទាំងផ្តល់អាហារូបករណ៍សិក្សា ១០០% ជូនដល់ក្មួយៗ ២ នាក់ ដែលត្រូវជាប្អូនស្រីរបស់ក្មួយ បញ្ញា។
ក្នុងឱកាសនោះ លោក លី ឆេង ជួបសំណេះសំណាលជាមួយក្រុមគ្រួសារ និងសួរសុខទុក្ខក្មួយប្រុស សុទ្ធ ពន្លឺបញ្ញា សិស្សថ្នាក់ទី១២ នៃសាលា ប៊ែលធី អន្តរជាតិទី១២ (ផ្សារដីហុយ) ដែលបានជួបគ្រោះថ្នាក់ចរាចរណ៍កាលពីខែវិច្ឆិកា ឆ្នាំ២០១៧ រហូតបាត់ការចងចាំ និងបានវះកាត់ប្តូរលលាដក្បាល។ លោកមានប្រសាសន៍ថា ដើម្បីជួយសម្រាលបន្ទុកក្នុងក្រុមគ្រួសារ ថ្ងៃនេះអ៊ំសូមផ្តល់អាហារូបករណ៍សិក្សា ១០០% ជូនដល់ក្មួយៗ ២ នាក់ គឺក្មួយ ស៊ឹង សួនកន្និកា និងក្មួយ អូន ដាលីនសូរិយា ដែលត្រូវជាប្អូនស្រីរបស់ក្មួយ ពន្លឺបញ្ញា ឱ្យមកបន្តការសិក្សានៅសាលា ប៊ែលធី អន្តរជាតិ ទាំងថ្នាក់ចំណេះទូទៅ និងភាសាអង់គ្លេសទូទៅ រហូតដល់ចប់ថ្នាក់ទី១២ និងកម្រិតទី១២ (Level 12)។ អ៊ំសូមលើកទឹកចិត្តក្មួយស្រីទាំងពីរ ត្រូវខិតខំសិក្សារៀនសូត្រដើម្បីតបស្នងសងគុណ ក៏ដូចជាជួយមើលថែបងប្រុស ដើម្បីសម្រាលការងាររបស់លោកឪពុកអ្នកម្តាយ។
ជាមួយគ្នានេះដែរ លោក យក់ ចំរើនប្ញទិ្ធ អគ្គនាយកក្រុមហ៊ុនធានារ៉ាប់រងហ្វតតេ ក៏បាននាំយកថរិកាសំណងចំនួន ៣,០០០ ដុល្លារ (បីពាន់ដុល្លារសហរដ្ឋអាមេរិក) តាមកិច្ចព្រមព្រៀងរវាងសាលា ប៊ែលធី អន្តរជាតិ ជាមួយក្រុមហ៊ុនធានារ៉ាប់រងហ្វតតេ (លើកទី១ ចំនួន ៣០០ ដុល្លារ) ហើយលោកក៏បានឧបត្ថម្ភថវិកាផ្ទាល់ខ្លួនចំនួន ២០០ ដុល្លារ (ពីររយដុល្លារសហរដ្ឋអាមេរិក) បន្ថែមទៀត សរុបចំនួន ៣,៥០០ ដុល្លារ (បីពាន់ប្រាំរយដុល្លារសហរដ្ឋអាមេរិក) ដើម្បីជួយសម្រាលបន្ទុកក្រុមគ្រួសាររបស់ក្មួយ ពន្លឺបញ្ញា ផងដែរ។
លោក លី ឆេង បានថ្លែងអំណរគុណចំពោះលោកអគ្គនាយកក្រុមហ៊ុនធានារ៉ាប់រងហ្វតតេ ដែលបានសហការយ៉ាងជិតស្និទ្ធក្នុងការបម្រើសេវាកម្ម ជូនដល់សិស្សានុសិស្សសាលា ប៊ែលធី អន្តរជាតិទាំងអស់ ចាប់ពីថ្នាក់ទី៩ ដល់ថ្នាក់ទី១២ ដែលសាលាបានទិញជូនប័ណ្ណធានារ៉ាប់រងនេះ ជាពិសេសបានចំណាយពេលវេលាអញ្ជើញមកសួរសុខទុក្ខ ក៏ដូចជានាំយកថវិកាមកជូនដល់ក្មួយប្រុសដោយផ្ទាល់នាពេលនេះ។ លោកបណ្ឌិត លី ឆេង ក៏សូមជូនពរឱ្យក្មួយប្រុស សុទ្ធ ពន្លឺបញ្ញា ឆាប់បានជាសះស្បើយពីជំងឺ និងមានការចងចាំឡើងវិញ ព្រមទាំងអាចបន្តការសិក្សានាពេលខាងមុខ៕
Source: Kampuchea Thmey Daily
0 Comments