សៀមរាប ៖ សមត្ថកិច្ចខេត្តសៀមរាបបានឲ្យដឹងថា មានការភ្ញាក់ផ្អើលមួយ បានកើតឡើង ដោយសារពលរដ្ឋ បានប្រទះឃើញសពបុរសវ័យចំណាស់ម្នាក់ ចងកធ្វើអត្តឃាតជាមួយនឹងខ្សែនីឡុង ដោយចងជាប់នឹងមែកស្វាយកម្ពស់ប្រហែល ៣.៥០ ម៉ែត្រ អង្គុយបត់ជើងនៅនឹងដី។
ហេតុការណ៍នេះ កើតឡើងនៅវេលាម៉ោង ៦ និង ៣០ នាទី ថ្ងៃទី៣០ ខែឧសភា ឆ្នាំ២០១៨ ស្ថិតនៅចំណុច ក្រុមទី១៤ ភូមិកន្ត្រក សង្កាត់ស្វាយដង្គំ ក្រុងសៀមរាប។
លោកអនុសេនីយ៍ឯក សូ វ៉ាន់ដេត នាយប៉ុស្តិ៍រដ្ឋបាលសង្កាត់ស្វាយដង្គំ បានឲ្យដឹងថា សាកសពឈ្មោះ ប៉ុក ហម ភេទប្រុស អាយុ៥១ឆ្នាំ មុខរបរធ្វើស្រែ មានទីលំនៅបច្ចុប្បន្ន ភូមិកន្ត្រក សង្កាត់ស្វាយដង្គំ ក្រុងសៀមរាប ខេត្តសៀមរាប។ លោកបន្តថា សពបុរសវ័យចំណាស់ម្នាក់ចងកធ្វើអត្តឃាតជាមួយនឹងខ្សែនីឡុង ពណ៌ខៀវ ដោយចងជាប់នឹងមែកស្វាយ ដែលមានកម្ពស់ប្រហែល ៣.៥០ ម៉ែត្រ អង្គុយបត់ជើងនៅនឹងដី។យោងតាមការពិនិត្យសាកសពដោយនគរបាលជំនាញបានឲ្យដឹងថា ពុំមានស្លាកស្នាមអ្វីដែលពាក់ព័ន្ធនឹងបទល្មើសឡើយ។ លោកបញ្ជាក់ថា មូលហេតុអាចមកពីខូចចិត្តខ្លួនឯងដែលមានជំងឺរបេងរ៉ាំរ៉ៃ។ ក្រោយពិនិត្យរួចរាល់សពបានប្រគល់ឲ្យកូនយកទៅធ្វើបុណ្យតាមប្រពៃណី៕
Source: Kampuchea Thmey Daily
0 Comments