បាត់ដំបង៖ ជនសង្ស័យម្នាក់ដែលជាមុខសញ្ញាទី៣ ក្នុងការស្រាវជ្រាវរបស់សមត្ថកិច្ចត្រូវបានឃាត់ខ្លួនហើយ ដោយអនុវត្តទៅតាមដីកាចាប់ខ្លួនរបស់តុលាការ ពាក់ព័ន្ធនឹងករណីឆបោកនាពេលកន្លងមក បន្ទាប់ពីសមត្ថកិច្ចបានឃាត់ខ្លួនជនសង្ស័យចំនួន ២ នាក់ ក្រោយពេលធ្វើសកម្មភាព។
ដោយអនុវត្តន៍តាមការណែនាំផ្ទាល់ពីលោក ឧត្តមសេនីយ៍ទោ អ៊ុច សុខុន ស្នងការនគរបាលខេត្តបាត់ដំបង ក៏ដូចជាលោកឧត្តមសេនីយ៍ត្រី ជេត វណ្ណនី ស្នងការរងទទួលផែនយុត្តិធម៌ ទើបនៅថ្ងៃទី២៩ ខែឧសភា ឆ្នាំ២០១៨ វេលាម៉ោង ៨ និង ០៥ នាទី កម្លាំងដែលដឹកនាំដោយលោក ឈឿង គឹមសុង នាយរងការិយាល័យព្រហ្មទណ្ឌកម្រិតស្រាល បានចុះទៅកាន់ចំណុចក្រសាំងភ្នៅ ស្ថិតក្នុងភូមិ សំឡាញ ឃុំក្រពើពីរ ស្រុកវាលវែង ខេត្តពោធិ៍សាត់ ដោយក្នុងនោះក្រុមអន្តរាគមន៍បង្ការ បង្ក្រាប បានចុះសហការជាមួយកម្លាំងនគរបាលខេត្តពោធិ៍សាត់ និងកម្លាំងអធិការដ្ឋាននគរបាលស្រុកវាលវែង ដើម្បីអនុវត្តតាមដីកាចាប់ខ្លួនលេខ ២៣៩៥ ត.ព្រ ចុះថ្ងៃទី២៤ ខែឧសភា ឆ្នាំ២០១៨ របស់ចៅក្រមស៊ើបសួរខេត្តបាត់ដំបង រ័ត្ន ស៊ីថា។
គួរបញ្ជាក់ដែរថា កាលពីថ្ងៃទី១១ ខែឧសភា ឆ្នាំ២០១៨ ត្រង់ចំណុចភូមិអូរពងមាន់ ឃុំតាគ្រាម ស្រុកបាណន់ ខេត្តបាត់ដំបង មានករណីឆបោកមួយបានកើតឡើង ដែលប្រព្រឹត្តដោយមនុស្សចំនួន ៣ នាក់ ក្នុងការច្នៃក្រវិលកំប៉ុងដើម្បីបើករង្វាន់ពីក្រុមហ៊ុនស្រាបៀរមួយចំនួន ហើយក៏ត្រូវបានសមត្ថកិច្ចឃាត់ខ្លួនបានភ្លាមៗចំនួន ២ នាក់រួចហើយដែរ យោងតាមពាក្យបណ្តឹងរបស់ក្រុមហ៊ុន ដោយឡែកជនសង្ស័យម្នាក់ទៀតដែលជាអ្នកកែច្នៃផ្ទាល់ដៃ បានគេចខ្លួនបាត់ស្រមោល។
បន្ទាប់ពីបានធ្វើការស្រាវជ្រាវអស់មួយរយៈរួចមក កម្លាំងបានចុះឃាត់ខ្លួនជនសង្ស័យម្នាក់ឈ្មោះ ម៉ៅ តាក់ ភេទប្រុស អាយុ ២៣ ឆ្នាំ មានស្រុកកំណើត នៅភូមិបោះខ្នុរ ឃុំចែងមានជ័យ ស្រុកបាណន់ ខេត្តបាត់ដំបង បច្ចុប្បន្នស្នាក់នៅចំណុចខាងលើ ដោយបច្ចុប្បន្នក្រុមអន្តរាគមន៍បង្ការ បង្ក្រាប បានប្រគល់មុខសញ្ញារូបនេះអោយទៅការិយាល័យជំនាញ ដើម្បីចាត់ការតាមនីតិវិធី៕
Source: Kampuchea Thmey Daily
0 Comments