ឆក់​ទូរស័ព្ទ​ដៃ​បានសម្រេចតែ​រត់​មិន​រួច ខណៈ​ជនរងគ្រោះ​និង​សន្តិសុខ​ធាក់​ម៉ូតូ​ផ្តួល

ភ្នំពេញ​៖ បុរស​ម្នាក់​ត្រូវបាន​កម្លាំងនគរបាល​ប៉ុស្តិ៍​រដ្ឋបាល​ទឹកល្អក់​ទី​១ នៃ​អធិការដ្ឋាន​នគរបាល​ខណ្ឌទួលគោក​ធ្វើការ​ឃាត់ខ្លួន ខណៈដែល​បុរស​ម្នាក់នេះ ​និង​បក្ខពួក​ម្នាក់ទៀត​ជិះ​ម៉ូតូមកធ្វើ​សកម្មភាព​ឆក់​ទូរស័ព្ទ​បានសម្រេច ហើយ​ត្រូវ​ជនរងគ្រោះ​និង​សន្តិសុខ​ធាក់​ម៉ូតូ​អោយ​ដួលនោះ​។ជនសង្ស័យ​ត្រូវបាន​ឃាត់ខ្លួន​កាលពី​ព្រឹក​ថ្ងៃ​ពុធ ១​រោច ខែជេស្ឋ ឆ្នាំច សំរឹទ្ធិស័ក ព​.​ស ​២៥៦២ ត្រូវនឹង​ថ្ងៃ​ទី​៣០ ខែឧសភា ឆ្នាំ​២០១៨ វេលា​ម៉ោង​ប្រហែល ០៦ ​និង ​៣០​ នាទី​ នៅ​ចំណុច​មុខមន្ទីរពេទ្យ​ឯកជន ប៉ាស៊ីហ្វិក ភ្នំពេញ ផ្លូវ​លេខ​១១០ ក្រុមទី​២៨ ភូមិ​៨ សង្កាត់​ទឹកល្អក់​ទី​១ ខណ្ឌទួលគោក រាជធានី​ភ្នំពេញ។ ជនសង្ស័យឈ្មោះ ចំរើន ឆៃ​ឌី ហៅ ឆៃ ភេទ​ប្រុស អាយុ​១៨​ឆ្នាំ ជនជាតិខ្មែរ មុខរបរពុំ​ពិតប្រាកដ ស្នាក់នៅ​ផ្ទះជួល​គ្មាន​លេខ ​ផ្លូវលំ សង្កាត់​ទួល​សង្កែរ ខណ្ឌ​ឫស្សី​កែវ រាជធានី​ភ្នំពេញ។​
​
មន្ត្រី​ប៉ូលិស​បាន​បញ្ជាក់ថា ចំពោះ​វត្ថុតាង​ចាប់យក​រួមមាន​ ម៉ូតូ​មួយគ្រឿង​ម៉ាក Honda C125 ស៊េរី ២០១៨ ពណ៌​ខ្មៅ ពាក់​ស្លាក​លេខ ភ្នំពេញ 1GX- 6908 ដែលមាន​លេខ​តួ​ និង​លេខ​ម៉ាស៊ីន​ ៥២២៥៦៨១ និង​ទូរស័ព្ទដៃ​មួយគ្រឿង​ម៉ាក Nokia ពណ៌​ខ្មៅ (ជា​ម៉ូតូ​របស់​ជនសង្ស័យ​ជិះ​ធ្វើសកម្មភាព​ឆក់​)។ ចំណែក​ជនរងគ្រោះត្រូវបាន​គេ​ស្គាល់ ឈ្មោះ យ៉ាន់ សុផល ភេទ​ប្រុស អាយុ​៤៥​ឆ្នាំ ជនជាតិខ្មែរ មុខរបរ ទទួល​ធ្វើ​ម្ហូប​ការ ស្នាក់​នៅភូមិ​ព្រែក​រទាំង សង្កាត់​ព្រែក​កំ​ពិស ខណ្ឌដង្កោ រាជធានី​ភ្នំពេញ បាន​បាត់បង់ទូរស័ព្ទដៃ​មួយគ្រឿង​ម៉ាក ​Huawei ពណ៌​មាស។​

មន្ត្រី​ប៉ូលិស​ផ្នែក​ព្រហ្មទណ្ឌ​ខណ្ឌទួលគោក​ បានអោយដឹង​ថា នៅ​មុនពេល​កើតហេតុ​ជនរងគ្រោះឈ្មោះ យ៉ាន់ សុផល ភេទ​ប្រុស អាយុ​៤៥​ឆ្នាំ ជនជាតិខ្មែរ បាន​ជិះ​ម៉ូតូ​មួយគ្រឿង​ម៉ាក PCX ពណ៌​ក្រហម ពាក់​ស្លាក​លេខ ភ្នំពេញ 1AH- 0676 ជិះ​តែម្នាក់ឯង​ចេញពីផ្ទះ​ក្នុង​គោលបំណង​មក​ពិនិត្យ​សុខភាពនៅ​មន្ទីរពេទ្យ​ឯកជន ប៉ាស៊ីហ្វិក​ភ្នំពេញ លុះ​ពេល​ជនរងគ្រោះ​ជិះ​មកដល់​ចំណុចមុខមន្ទីរពេទ្យ​ឯកជន​ប៉ាស៊ីហ្វិក លើផ្លូវលេខ​១១០ (​សហព័ន្ធ​រុស្សី) ក្រុមទី​២៨ ភូមិ​៨ សង្កាត់ទឹកល្អក់​ទី​១ ខណ្ឌទួលគោក រាជធានី​ភ្នំពេញ ស្រាប់​តែមាន​ជនសង្ស័យ​ឈ្មោះ ចំរើន ឆៃ​ឌី ហៅ ឆៃ ភេទ​ប្រុស អាយុ​១៨​ឆ្នាំ ជនជាតិខ្មែរ និង​បក្សពួក​ឈ្មោះ នូ ភេទ​ប្រុស អាយុ​ប្រហែល​១៨​ឆ្នាំ ជនជាតិខ្មែរ បាន​ជិះ​ម៉ូតូ​មួយគ្រឿង​ម៉ាក Honda C125 ស៊េរី​​២០១៨ ពណ៌​ខ្មៅ ពាក់​ស្លាក​លេខ ភ្នំពេញ 1GX- 6908 ជិះ​មកពី​ខាងក្រោយ​ខាងឆ្វេង​ដៃ​របស់​ជនរងគ្រោះ ​រួចហើយ​ជនសង្ស័យ​ឈ្មោះ នូ ជា​អ្នកបើក​ម៉ូតូ​បាន​ជិះ​ទៅ​អែបម៉ូតូ​របស់​ជនរងគ្រោះ ​រួច​ជនសង្ស័យ​ឈ្មោះ ចំរើន ឆៃ​ឌី ហៅ ឆៃ បានធ្វើសកម្មភាពឆក់ទូរស័ព្ទដៃ​ពី​ក្នុង​ហោប៉ៅ​អាវ​ខាងលើ​ជនរងគ្រោះ។ ភ្លាមនោះ​ជនរងគ្រោះ​បានធាក់​ម៉ូតូ​របស់​ជនសង្ស័យ​ទាំងពីរ​ បណ្ដាល​វេរ​ចង្កូត​ម៉ូតូរ​កដួល​ ទើប​មានសន្តិសុខ​យាម​ពេទ្យខាងលើជួយ​ធាក់​ម៉ូតូ​ជនសង្ស័យ​បន្ថែម​ បណ្ដាល​ឲ្យ​ម៉ូតូ​ជនសង្ស័យ​ទាំងពីរ​ដួល​ ភ្លាមនោះក៏មាន​ការ​អន្តរាគមន៍​ពីកម្លាំង​សមត្ថកិច្ច​នគរបាល​ប៉ុស្តិ៍​រដ្ឋបាល​ទឹកល្អក់​ទី​១ និងប្រជាពលរដ្ឋ​នៅតាម​ផ្លូវ​ជួយ​ឃាត់ខ្លួន​ជនសង្ស័យ​បានម្នាក់​ឈ្មោះ ចំរើន ឆៃ​ឌី ចំណែកបក្ខពួកឈ្មោះ នូ បាន​រត់​គេចខ្លួនបាត់ទៅ ដោយឡែក​ទូរស័ព្ទដៃ​របស់​ជនរ​ង​គ្រោះ​បាន​ជ្រុះបាត់​នៅពេលដែលប្រជាពលរដ្ឋ​ដេញ​ជួយ​ចាប់ ហើយ​សមត្ថកិច្ច​យើង​ក៏​ឃាត់ខ្លួន​ជនសង្ស័យឈ្មោះ ចំរើន ឆៃ​ឌី ហៅ ឆៃ យកមក​កាន់​អធិការដ្ឋាននគរបាល​ខណ្ឌទួលគោក ដើម្បីចាត់ការ​តាមនីតិវិធី​ច្បាប់​តែម្ដង។
​
​បន្ទាប់ពី​ឃាត់ខ្លួន​ជនសង្ស័យ​ឈ្មោះ ចំរើន ឆៃ​ឌី ហៅ ឆៃ សមត្ថកិច្ច​យើង​បាន​យក​ទឹកនោមជនសង្ស័យ​រូបនេះ​មក​ធ្វើតេស្ត​ស្វែងរក​សារធាតុ​ញៀន ជា​លទ្ធផលមាន​ភាពវិជ្ជមាន (​មានសារធាតុ​ញៀន)។​ បច្ចុប្បន្ន ជនសង្ស័យ​ខាងលើ​កំពុង​ឃាត់ខ្លួន​ជា​បណ្ដោះអាសន្ន នៅអធិការដ្ឋាន​នគរបាល​ខណ្ឌទួលគោក ដើម្បី​ធ្វើការ​សាកសួរ កសាង​សំណុំរឿង និង​បញ្ជូនជនសង្ស័យ​ទៅ​សាលាដំបូង​រាជធានី​ភ្នំពេញ ចាត់ការ​តាម​នីតិវិធី​ច្បាប់៕

Source: Kampuchea Thmey Daily