ព្រះសីហនុ ៖ សម្តេចវិបុលសេនាភក្តី សាយ ឈុំ ប្រធានព្រឹទ្ធសភានៃព្រះរាជាណាចក្រកម្ពុជា កាលពីព្រឹកថ្ងៃទី២៩ ខែឧសភា ឆ្នាំ ២០១៨ នេះ បានអញ្ជើញជាអធិបតីដ៏ខ្ពង់ខ្ពស់ក្នុងពិធីសម្ពោធបញ្ចុះកាត់ឫសសីមាព្រះវិហារ និងឆ្លងសមិទ្ធផលថ្មីនានានៅក្នុងវត្តសារាយអណ្តែត ស្រុកព្រៃនប់ ខេត្តព្រះសីហនុ ដើម្បីប្រគេនព្រះសង្ឃ និងដាក់ជូនពុទ្ធបរិស័ទគោរពបូជា និងចូលទៅធ្វើបុណ្យទានតាមប្រពៃណីទំនៀមទម្លាប់ព្រះពុទ្ធសាសនា។
លោក យន្ត មីន អភិបាលខេត្តព្រះសីហនុ បានអានបារាយណ៍សាងសង់ឲ្យដឹងថា ស្រុកព្រៃបន់ គឺជាស្រុកមួយក្នុងចំណោមស្រុកទាំងបីនៃខេត្តព្រះសីហនុ មានប្រជាពលរដ្ឋរស់នៅចំនួនជាង ២០ ម៉ឺននាក់ ដែលភាគច្រើនប្រកបមុខរបរលើវិស័យកសិកម្ម នេសាទ និងអាជីវករលក់ដូរ។ ព្រះវិហារ និងសមិទ្ធផលថ្មីខាងលើនេះ ចាប់ផ្តើមសាងសង់ឡើងវិញនៅឆ្នាំ ២០០៩ រហូតមកដល់បច្ចុប្បន្ន ដែលមានបណ្តោយប្រវែង ២៤ ម៉ែត្រ ទទឹង ១២ ម៉ែត្រ និងកម្ពស់ ១៣.៦០ ម៉ែត្រ ចំណាយថវិកាអស់ចំនួន ៣៤៨៦០០ ដុល្លារ ដែលផ្តួចផ្តើមកសាងឡើងដោយព្រះចៅអធិការ គណៈកម្មាធិការ អាចារ្យ ពុទ្ធបរិស័ទ និងសប្បុរសជនជិតឆ្ងាយចូលរួមកសាង។
មានប្រសាសន៍ក្នុងពិធីនោះ សម្តេចវិបុលសេនាភក្តី សាយ ឈុំ ប្រធានព្រឹទ្ធសភានៃព្រះរាជាណាចក្រកម្ពុជា បានអោយដឹងថា ការកសាងព្រះវិហារ គឺជាទឹកចិត្តរបស់សប្បុរសជនគ្រប់មជ្ឈដ្ឋានក្នុងការកសាង ដែលចំណាយទាំងធន់ធាន និងសម្ភារៈ ជាទង្វើនាំមកនូវបុណ្យកុសលទាំងបច្ចុប្បន្ននិងទៅអនាគត ក៏ដូចជាការរួមចំណែកកសាងសង្គមជាតិ ក្រោមការដឹកនាំរបស់រាជរដ្ឋាភិបាលនៃព្រះរាជាណាចក្រកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ទើបធ្វើឲ្យប្រទេសជាតិឆ្ពោះទៅរកវឌ្ឍនភាពដ៏រុងរឿង ដូចនេះកត្តាសន្តិភាពពិតជាមានសារសំខាន់ សម្រាប់ការអភិវឌ្ឍន៍ប្រទេសជាតិឲ្យមានការរីកចម្រើនលើគ្រប់វិស័យ ទាំងផ្នែកពុទ្ធចក្រ និងអាណាចក្រ មានន័យថា បើគ្មានសន្តិភាពក៏គ្មានការអភិវឌ្ឍន៍ទាំងនេះ គឺជាកត្តាសត្យានុម័តដែលយើងទាំងអស់គ្នាមិនអាចប្រកែកបានឡើយ។ យើងទាំងអស់គ្នាត្រូវតែខិតខំចូលរួមថែរក្សាសន្តិភាពដ៏ល្អផូរផង់ ដែលយើងទទួលបានដោយលំបាកជាទីបំផុតនេះ ឲ្យបានស្ថិតស្ថេរគង់វង្សយូរអង្វែងដល់កូនចៅជំនាន់ក្រោយៗទៀត កុំឲ្យជួបវិបត្តិទុក្ខភ័យមហន្តរាយនានាដែលកើតឡើងដោយសារសង្គ្រាមកើតឡើងបន្តទៀត។
សម្តេចបានបញ្ជាក់បន្ថែមថា ដើម្បីរក្សាសុខសន្តិភាព និងចូលរួមចំណែកអភិវឌ្ឍន៍ប្រទេសជាតិ ជាពិសេសផ្នែកព្រះពុទ្ធសាសនា និងលើកកម្ពស់វិស័យព្រះពុទ្ធសាសនា ហើយចាត់ទុកជាសាសនារបស់រដ្ឋ និងដោយជំរុញឲ្យមានការអភិវឌ្ឍកែលំអនៅតាមបណ្តាវត្តអារាមនានាក្នុង ស្រុក ក្រុង ខេត្ត មានការរីចម្រើន ហើយក្នុងពិធីនោះក៏មានការបំពាក់មេដាយគ្រឿងឥស្សរិយយសជូនដល់ព្រះសង្ឃ និងសប្បុរសជននានាផងដែរ៕ 
Source: Kampuchea Thmey Daily
0 Comments