ភ្នំពេញ ៖ ស្ត្រីជាកម្មការិនីរោងចក្រម្នាក់ បានមកកាន់ប៉ុស្តិ៍រដ្ឋបាលចោមចៅ៣ ទាំងទឹកភ្នែកហូរសស្រាក់ ដើម្បីសុំឲ្យជួយអន្តរាគមន៍ បន្ទាប់ពីចាញ់ល្បិចក្រុមទម្លាក់យោងល្បួងបញ្ឆោតដោះ យកគ្រឿងអលង្ការមាសអស់៧ជី ខ្សែដៃប្លាទីនទម្ងន់៤ជី និង លុយអស់ជាង៧០០ដុល្លារ ហើយក្រុមជនសង្ស័យនាំគ្នាគេចខ្លួនបាត់អស់ កាលពីវេលាម៉ោង៩និង៣០នាទីព្រឹក ថ្ងៃទី១៨ ខែមិថុនា ឆ្នាំ២០១៨ ស្ថិតនៅតាមផ្លូវបេតុងច្រកចូលរោងចក្រក្រដាស កែង ផ្លូវមុខផ្សារព្រៃទា ភូមិត្រពាំងជ្រៃសង្កាត់កាកាប២ ខណ្ឌពោធិ៍សែនជ័យ។
ស្ត្រីរងគ្រោះមាន ឈ្មោះ យ៉ែម ស្រីពៅ អាយុ៣៥ឆ្នាំ មុខរបរកម្មការិនីរោងចក្រ ស្នាក់នៅផ្ទះជួល ភូមិជម្ពូវ័ន សង្កាត់ចោមចៅ៣ ខណ្ឌពោធិ៍សែនជ័យ មានស្រុកកំណើតឃុំ ពោធិ៍អង្គ្រង ស្រុកបរសេធ ខេត្តកំពង់ស្ពឺ។ សម្ភារៈដែលបានបាត់បង់ទាំងនោះមាន គ្រឿងអលង្ការចិញ្ចៀន ខ្សែក ក្រវិល សរុបទម្ងន់៧ជីមាស ខ្សែដៃប្លាទីនទម្ងន់៤ជី លុយដុល្លារជាង៧០០ដុល្លារ និងអត្តសញ្ញាណប័ណ្ណផ្ទាល់ខ្លួន កាតការងារ និងឯកសារមួយចំនួនទៀតក្នុងកាបូប។
ដោយឡែកសម្ភារៈដែលបានមកវិញ គ្រាប់កង់មួយកញ្ចប់ ខ្ចប់យ៉ាងស្អាត ដាក់ក្នុងកាបូប ទុកឲ្យជនរងគ្រោះកាន់ រក្សាទុកជាអនុស្សាវរីយ៍ដ៏ជូរចត់និងទឹកភ្នែក។
យោងតាមការរៀបរាប់ពីស្ត្រីរងគ្រោះបានឲ្យដឹងថា មុនកើតហេតុគាត់ដើរចេញពីបន្ទប់ជួលបានជួបស្ត្រីជនសង្ស័យម្នាក់ មាឌធំធាត់ខ្មៅស្រអែមមកសួរថា មានឃើញកាបូបគេជ្រុះបាត់មុននេះដែរអត់ ក្នុងនោះមានមាសលុយជាច្រើនគ្រាន់តែឆ្លើយថា អត់ដឹងផងមិនទាន់ផុតពីមាត់ផងក៏លេចមុខស្ត្រីសង្ស័យម្នាក់ទៀត សម្បុរ ស ស្គម ចំណាស់ ជិះម៉ូតូឌុបដោយបុរសម្នាក់ មកប្រាប់ថា កុំមាត់គេរើសបានយើងទុកចែកគ្នាថាហើយបើកកាបូបឲ្យមើលឃើញសុទ្ធតែក្រដាសដុល្លារ និងលោហៈក្រហមច្រាល ក៏បបួលគាត់ជាជនរងគ្រោះឡើងជិះម៉ូតូ២គ្រឿង ចេញពីមុខរោងចក្រ៣ជាន់ផ្លូវQMI ទៅដល់ខាងមុខច្រកចូលរោងចក្រក្រដាសទល់មុខផ្សារព្រៃទា ក្នុងភូមិត្រពាំងជ្រៃ សង្កាត់កាកាប២ ខណ្ឌពោធិ៍សែនជ័យ ក៏ឈប់ម៉ូតូបើកកាបូបឲ្យមើលម្តងទៀតប្រាប់ថា រង់ចាំទៅដូរចែកគ្នា តែកុំមាត់និយាយប្រាប់គេ ថាហើយក៏ហុចកាបូបមួយឲ្យជនរងគ្រោះកាន់ រួចក្រុមជនសង្ស័យ ចាប់ដោះយកគ្រឿងអលង្កាពីជនរងគ្រោះ និងឆក់យកកាបូបរបស់ជនរងគ្រោះ ប្រាប់ឲ្យនៅចាំ ហើយជនសង្ស័យប្រុសស្រី២នាក់ ជិះម៉ូតូចាកចេញទៅបាត់ ដោយប្រាប់ថា ទៅដូរលុយ។
ប្រភពបន្តទៀតថា លុះចាំមួយសន្ទុះមិនឃើញមកវិញ ជនសង្ស័យប្រុសស្រី២នាក់ទៀត ប្រាប់ថា ទុកឲ្យពួកគេជិះទៅតាម កុំឲ្យស៊ីដាច់ ថាហើយចេញទៅបាត់ បន្សល់ទុកតែជនរងគ្រោះឈរចាំម្នាក់ឯងចេះតែងឿងឆ្ងល់ចុះទៅដូរលុយមាសយូរម្ល៉េះ លួចបង្ហើបកាបូបមើល ពុទ្ធោ នៅក្នុងកាបូប សុទ្ធតែគ្រាប់កង់ ទើបស្រែកទ្រហោយំ ដឹងថា ចាញ់បោកល្បិចក្រុមនោះហើយក៏ជិះម៉ូតូឌុបទៅប្តឹងនគរបាលប៉ុស្តិ៍ចោមចៅ៣ ដែលនៅក្បែរផ្ទះស្នាក់នោះស្រាប់។
ស្ត្រីរងគ្រោះក្រោយពីសមត្ថកិច្ចចោមចៅ៣សាកសួរហើយ រឿងហេតុកើតឡើងនៅ ទឹកដីភូមិសាស្ត្រសង្កាត់កាកាប២ ទើបប្រាប់ឲ្យជនរងគ្រោះទៅប្តឹងនៅប៉ុស្តិ៍កាកាប២វិញ ដើម្បីស្រាវជ្រាវរកមុខសញ្ញាក្រុមទម្លាក់យោងទាំងនោះមកផ្តន្ទាទោសតាមច្បាប់ តែដូចជាមិនសង្ឃឹមប៉ុន្មានទេ៕
Source: Kampuchea Thmey Daily
0 Comments