រតនគិរី ៖ ករណីគ្រោះថ្នាក់ចរាចរណ៍រវាងរថយន្តមួយគ្រឿងជ្រុលចង្កូតទៅបុកគោយន្តកន្ត្រៃក្នុងទិសដៅបញ្ច្រាសគ្នាយ៉ាងពេញទំហឹង បណ្ដាលឲ្យអ្នកបើកបរគោយន្តកន្ត្រៃរងរបួសធ្ងន់។
ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង៦និង២០នាទីល្ងាច ថ្ងៃទី២១ ខែមិថុនា ឆ្នាំ២០១៨ នៅចំណុចលើផ្លូវលំមួយខ្សែ ស្ថិតនៅក្នុងភូមិកាចូនលើ ឃុំកាចូន ស្រុកវើនសៃ។
នគរបាលស្រុកវើនសៃបានឲ្យដឹងថា គោយន្តកន្ត្រៃ ខណៈកំពុងបើកបរក្នុងទិសដៅពីត្បូងមកជើងដល់ត្រង់ចំណុចកើតហេតុខាងលើ ក៏រថយន្តបានជ្រុលចង្កូតទៅបុកចំពីមុខបណ្តាលឲ្យអ្នកបើកបរគោយន្តរបួសធ្ងន់។ អ្នកបើកបរគោយន្តកន្ត្រៃឈ្មោះ ងែវ ថុង ភេទប្រុស អាយុ៣៩ឆ្នាំ ជនជាតិទំពួន រស់នៅភូមិកាចូនក្រោម ឃុំកាចូន ស្រុកវើនសៃ រងរបួសធ្ងន់ត្រូវបានដឹកបញ្ជូនទៅសង្គ្រោះនៅមន្ទីរពេទ្យបង្អែកខេត្ត។ រីឯគោយន្តរងការខូចខាតយ៉ាងដំណំផ្នែកខាងមុខ។
ប្រភពបន្តថា អ្នកបើកបររថយន្តឈ្មាះ ភូ រដ្ធា ភេទប្រុស អាយុ២៦ឆ្នាំ ជនជាតិខ្មែរ រស់នៅភូមិ៤ សង្កាត់កាចាញ ក្រុងបានលុង រងរបួសស្រាល បើកបររថយន្តមួយគ្រឿងម៉ាក តូយូតា កែច្នៃ ពណ៌ស អត់ស្លាកលេខ បើកបរក្នុងទិសដៅពីជើងមកត្បូង។
ក្រោយកើតហេតុ នគរបាលមូលដ្ឋាន បានចុះមកអន្តរាគមន៍យកមធ្យោបាយទាំងពីរគ្រឿងទៅរក្សាទុកនៅប៉ុស្តិ៍រដ្ឋបាលឃុំកាចូន ជាបណ្ដោះអាសន្នដើម្បីរង់ចាំធ្វើការដោះស្រាយតាមនីតិវិធីច្បាប់៕
Source: Kampuchea Thmey Daily
0 Comments