សៀមរាប ៖ កម្លាំងនគរបាលក្រុងសៀមរាប បានធ្វើការឃាត់ខ្លួនជនសង្ស័យម្នាក់ ដែលជាប់ពាក់ព័ន្ធ នឹងករណីជក់គ្រឿងញៀន រួចបញ្ចេញកំហឹងវ៉ៃប្រពន្ធរហូតទ្រមខ្លួន។
លោកអនុសេនីយ៍ឯក ចែម ចំណាន អធិការរងនគរបាលក្រុងសៀមរាប ទទួលបន្ទុកគ្រឿងញៀន បានឲ្យដឹងនៅរសៀលថ្ងៃទី២១នេះថា ក្រោមការដឹកនាំផ្ទាល់របស់លោកវរសេនីយ៍ឯក ទេព ចាន់ណា អធិការនគរបាលក្រុងសៀមរាប បានឲ្យកម្លាំងនគរបាលប៉ុស្តិ៍សាលាកំរើក និងកម្លាំងនគរបាលព្រហ្មទណ្ឌក្រុង ព្រមទាំងកម្លាំងនគរបាលប្រឆាំងគ្រឿងញៀនក្រុង ចុះទៅឃាត់ខ្លួនជនសង្ស័យម្នាក់ ឈ្មោះ សៅ រតនា ភេទប្រុស អាយុ២៦ឆ្នាំ ជនជាតិខ្មែរ មុខរបរជាងឡាន រស់នៅក្រុមទី១ ភូមិជន្លង់ សង្កាត់សាលាកំរើក ក្រុងសៀមរាប។
លោកបន្តថា ដំណើររឿង នៅម៉ោង១៥និង៣០នាទីរសៀលថ្ងៃទី២០ ខែមិថុនា ឆ្នាំ២០១៨ នៅចំណុចក្នុងបន្ទប់ដេកក្នុងរោងជួសជុលរថយន្តហួរ ម៉េងគ្រី ក្នុងក្រុមទី១ ភូមិជន្លង់ ឈ្មោះ សៅ រតនា ភេទប្រុស បានធ្វើសកម្មភាពប្រើហិង្សាវ៉ៃតប់ទៅលើប្រពន្ធរបស់គេ ឈ្មោះ នូ ចរិយ៉ា ភេទស្រី អាយុ២១ឆ្នាំ ដោយបានក្តាប់ដៃដាល់ទៅលើផ្ទៃមុខ បណ្តាលឲ្យមានស្នាមជាំលើរង្វង់ភ្នែកទាំងសងខាងហើម និងមានហូរឈាមតាមច្រមុះ។ ក្រោយពេលកើតហេតុភ្លាមៗឈ្មោះ នូ ចរិយ៉ា ត្រូវជាប្រពន្ធ បានមកដាក់បណ្តឹងឲ្យសមត្ថកិច្ចចំណាត់ការតាមនីតិវិធីច្បាប់។
លោកចែម ចំណាន បន្ថែមថា បន្ទាប់មកនៅម៉ោង១៦និង៣០នាទីថ្ងៃដដែល សមត្ថកិច្ចយើងបានទៅនាំយកឈ្មោះ សៅ រតនា នោះមកសួរនាំ ទើបឈ្មោះ សៅ រតនា បានឆ្លើយសារភាពថា ខ្លួនពិតជាបានប្រើហិង្សាវាយតប់ទៅលើប្រពន្ធខ្លួនឈ្មោះ នូ ចរិយ៉ា នោះប្រាកដមែន។
ដោយមានព័ត៌មានពាក់ព័ន្ធនឹងការប្រើប្រាស់គ្រឿងញៀនខុសច្បាប់បន្ថែម យើងបានធ្វើការពិនិត្យទឹកនោមរបស់ឈ្មោះ សៅ រតនា ក៏ឃើញមាន សញ្ញាវិជ្ជមានផ្ទុកនូវសារធាតុញៀនខុសច្បាប់មែន ហើយឈ្មោះសៅ រតនា បានឆ្លើយសារភាពថា ខ្លួនគេពិតជាបានប្រើប្រាស់គ្រឿងញៀនប្រាកដមែន។
បច្ចុប្បន្ន កម្លាំងនគរបាលជំនាញកំពុងរៀបចំសំណុំរឿងដើម្បីបញ្ជូនខ្លួនជនសង្ស័យទៅតុលាការចាត់ការតាមផ្លូវច្បាប់៕
Source: Kampuchea Thmey Daily
0 Comments