ភ្នំពេញ ៖ ស្ត្រីមេតុងទីនម្នាក់ ត្រូវបានព្រះរាជអាជ្ញាអមសាលាដំបូងរាជធានីភ្នំពេញ សម្រេចចោទប្រកាន់ពីបទរំលោភលើទំនុកចិត្ត ពាក់ព័ន្ធករណីប្រមូលលុយតុងទីនចំនួន២លាន៦សែនដុល្លារមិនសងមកអ្នកលេងជាមួយវិញ។
ជនជាប់ចោទឈ្មោះ លី គឹមហួរ ភេទស្រី អាយុ៣៣ឆ្នាំ មានទីលំនៅផ្ទះលេខ៣៧ Ceo E1 ផ្លូវលេខ៣៥៨ ភូមិ៤ សង្កាត់ទួលស្វាយព្រៃ១ ខណ្ឌចំការមន។
លី គឹមហួរ ត្រូវបានសមត្ថកិច្ចចាប់ខ្លួនបញ្ជូនមកសាលាដំបូងកាលពីថ្ងៃទី២៣ ខែមិថុនា ឆ្នាំ២០១៨ ក្នុងនោះក្រោយពីបានសាកសួររួច លោកហ៊ឹង ប៊ុនថន ព្រះរាជអាជ្ញារងអមសាលាដំបូងរាជធានីភ្នំពេញបានសម្រេចចោទប្រកាន់ពីបទរំលោភលើទំនុកចិត្តតាមមាត្រា ៣៩១ មាត្រា៣៩២ នៃក្រមព្រហ្មទណ្ឌ និងដាក់អោយស្ថិតក្រោមការត្រួតពិនិត្យតាមផ្លូវតុលាការ និងស្នើអោយចៅក្រមស៊ើបសួរចេញដីកាឃុំខ្លួនដាក់ពន្ធនាគារជាបណ្ដោះអាសន្ន។ រហូតមកដល់ថ្ងៃទី២៤ ខែមិថុនា ឆ្នាំ២០១៨ចៅក្រមស៊ើបសួរឈ្មោះ កូយ សៅ មិនទាន់សម្រេចបែបណាទេ។
ពាក់ព័ន្ធការចាប់ខ្លួន និងចោទប្រកាន់មេតុងទីនឈ្មោះ លី គឹមហួរ ប្រភពព័ត៌មានពីសាលាដំបូងបានអោយដឹងថា កាលពីឆ្នាំ២០១៤ ឈ្មោះ តាំង គឹមហួង ហៅចែស្រួយ ឈ្មោះកែវ មួយលី និងឈ្មោះ លី គឹមហួរ បានលួងលោមឈ្មោះ ប៊ុន សុភាព ភេទស្រី អោយលេងតុងទីនជាមួយពួកគេចំនួន១៥ក្បាល ដោយពួកគេជាអ្នកធ្វើមេតុងទីននោះរហូត ដោយលើកទី១តុងទីនក្បាល ៣០០ដុល្លារ ចាប់ប្រមូលថ្ងៃទី១៩ ខែមេសា ឆ្នាំ២០១៤មួយខែដេញម្ដង មានកូន៤២នាក់។
លើកទី២ ក្បាល៥០០ដុល្លារ មានគ្នា៤២នាក់។ លើកទី៣តុងទីនក្បាល៣០០ដុល្លារ មានគ្នា ៥៤នាក់។ លើកទី៤ តុងទីនក្បាល៣០០ដុល្លារ មានគ្នា៥៤នាក់។ លើកទី ៥ តុងទីនក្បាល២០០ដុល្លារ មានកូន៦២នាក់។ លើកទី ៦ តុងទីនក្បាល៥០០ដុល្លារ មានគ្នា៥៤នាក់។ លើកទី៧ តុងទីនក្បាល ២០០ដុល្លារ មានគ្នា៦៦នាក់។ លើកទី៨ តុងទីនក្បាល ៥០០ដុល្លារ មានគ្នា៤៤នាក់។ លើកទី ៩ តុងទីនក្បាល ៣០០ដុល្លារ មានគ្នា ៥៤នាក់។ លើកទី១០ តុងទីនក្បាល ៣០០ដុល្លារ មានគ្នា៤២នាក់។ លើកទី១១ តុងទីនក្បាល ២០០ដុល្លារ មានគ្នា៥៧នាក់។ លើកទី ១២ តុងទីនក្បាល ៥០០ដុល្លារ មានគ្នា៥៣នាក់។ លើកទី ១៣ តុងទីនក្បាល ៣០០ដុល្លារ មានគ្នា ៤៤នាក់។ លើកទី១៤ តុងទីនក្បាល ២០ដុល្លារមានគ្នា១៣៤នាក់ ដេញរាល់ថ្ងៃ។ លើកទី ១៥ តុងទីនក្បាល ២០ដុល្លារ មានគ្នា១៣៨នាក់ ដេញរាល់ថ្ងៃ។
ចាប់តាំងពីលេងតុងទីននោះមកឈ្មោះប៊ុន សុភាព បានបង់លុយអោយឈ្មោះ តាំង គឹមហួង ឈ្មោះកែវ មួយលី និងឈ្មោះ លី គឹមហួរ សរុបជាទឹកប្រាក់ចំនួន ២ ៦០០ ០០០ ដុល្លារ លុះដល់ពាក់កណ្ដាលខែមីនា ឆ្នាំ២០១៧ ឈ្មោះតាំង គឹមហួង និងឈ្មោះកែវ មួយលី បានលួចរត់ចេញទៅក្រៅបរទេសមិនអោយអ្នកលេងតុងទីនទាំងអស់ដឹងឡើយ ដោយទុកអោយកូនឈ្មោះ លី គឹមហួរ នៅដើរប្រមូលលុយតុងទីនយកទៅទុករហូត ហើយនៅពេលដែលអ្នកលេងតុងទីនទៅទារយកលុយមកវិញស្រាប់តែពួកគេគេចមុខមិនព្រមជួបទើបឈ្មោះប៊ុន សុភាពដាក់ពាក្យប្ដឹងអោយសមត្ថកិច្ចចាប់ខ្លួនតែម្ដង។
ក្នុងពាក្យបណ្ដឹងរបស់ជនរងគ្រោះបានទាមទារប្រាក់ដើមចំនួន២ ៦០០ ០០០ដុល្លារ និងជំងឺចិត្តចំនួន៥០ម៉ឺនដុល្លារ៕
Source: Kampuchea Thmey Daily
0 Comments