សៀមរាប ៖ នៅព្រឹកថ្ងៃទី២៤ ខែមិថុនា សហព័ន្ធកម្ពុជាបង្ហាត់ជិះសេះ បានរៀបចំការប្រកួតកីឡាជិះសេះចម្ងាយឆ្ងាយអាណាចក្រអង្គរ២០១៨ ដែលមានកីឡាករកីឡាការិនីជំនាញៗចំនួន១១នាក់ចូលរួម ហើយពិធីនេះបានប្រព្រឹត្តិទៅនៅphnom krom eco resort ក្នុងភូមិភ្នំក្រោម សង្កាត់សៀមរាប ក្រុងសៀមរាប។ ក្នុងព្រឹត្តិការណ៍នេះ ក៏មានវត្តមានអាជ្ញាធរ និងសិស្សានុសិស្សជាច្រើននាក់ចូលរួមផងដែរ។
នៅក្នុងឱកាសនោះដែរ លោកស្រី ទេព ម៉ូណា ប្រធានសហព័ន្ធកម្ពុជាបង្ហាត់ជិះសេះ បានមានប្រសាសន៍ថា ទស្សនវិស័យរបស់សហព័ន្ធកម្ពុជាបង្ហាត់ជិះសេះ គឺការថែរក្សា និងសង្គ្រោះសេះកម្ពុជា គឺគិតពីសុខុមាលភាពរបស់សត្វពាហនៈនៅកម្ពុជា ជាពិសេសនោះគឺសត្វសេះ។ ចំពោះបេសកកម្មរបស់យើង គឺដើម្បីលើកទឹកចិត្តដល់អ្នកចិញ្ចឹមសត្វពាហនៈឲ្យពួកគាត់មើលថែបានត្រឹមត្រូវ។
លោកស្រីបន្តថា ចំណុចសំខាន់ដែលទាក់ទងទៅនឹងកីឡាជិះសេះរយៈចម្ងាយនេះ(Enurance) គឺចង់បង្កើតឲ្យមានព្រឹត្តិការណ៍កីឡាប្រពៃណីនេះឡើងវិញនៅក្នុងទឹកដីនៃខេត្តសៀមរាប បន្ទាប់ពីបាត់បង់យូរ ហើយក៏ត្រូវបានអតីតព្រះមហាក្សត្រ ព្រះបាទនរោត្តមសីហនុ ព្រះអង្គ សើរើ និងផ្តួចផ្តើមយកមកវិញ។ ចាប់តាំងពីឆ្នាំ២០១១មកក្រោមការផ្តួចផ្តើមរបស់លោក វ៉ាន់ សូអៀង និងក្រោមការគាំទ្រដោយរាជរដ្ឋាភិបាលនៃព្រះរាជាណាចក្រកម្ពុជា ទើបក្រុមកីឡាសហព័ន្ធកម្ពុជាបង្ហាត់ជិះសេះ បានទៅចូលរួមនៅក្នុងព្រឹត្តិការណ៍ស៊ីហ្គេមបានចំនួន៣លើកនៅតាមប្រទេសមួយចំនួនផងដែរ។ ការជិះសេះចម្ងាយ២០គីឡូម៉ែត្រទៅ៣០គីឡូម៉ែត្រ នេះវាគឺជាចម្ងាយឆ្ងាយ ហើយយើងក៏មិនអាចឲ្យសេះរត់លឿនពេកនោះទេ ដូច្នេះយើងរត់ម្តងពាក់កណ្តាលតែប៉ុណ្ណោះ។
លោកស្រីបន្តថា យើងសង្ឃឹមថា នឹងទទួលបានបទពិសោធន៍៥ឆ្នាំបន្ថែមទៀត ដែលអាចឲ្យក្រុមជម្រើសជាតិទាំងនេះ ឈានទៅប្រកួតយកមេដៃមាសនៅក្នុងឆ្នាំ២០២៣ខាងមុខនេះជូនប្រទេសជាតិយើង។
លោកស្រីបានថ្លែងអំណរគុណដល់សហព័ន្ធបង្ហាត់ជិះសេះថៃ និង សហព័ន្ធបង្ហាត់ជិះសេះអាស៊ីអាគ្នេយ៍ ដែលបានចូលរួមជាមួយសហព័ន្ធជិះសេះកម្ពុជា នៅក្នុងព្រឹត្តិការណ៍ដ៏ពិសេសនេះ។ក្នុងនោះលោកស្រីបានថ្លែងអំណរគុណចំពោះអ្នកចូលរួមឧបត្ថម្ភដល់កម្មវិធីនេះផងដែរ៕
Source: Kampuchea Thmey Daily
0 Comments