តាកែវ ៖ ជនសង្ស័យជួញដូរសារធាតុញៀន ដោយខុសច្បាប់២នាក់ ត្រូវបានកម្លាំងការិយាល័យជំនាញកងរាជអាវុធហត្ថខេត្តតាកែវ សហការជាមួយកម្លាំងជំនាញកងរាជអាវុធហត្ថ ខេត្តកណ្តាលតាមប្រមាញ់រហូតក្របួចបានជាមួយវត្ថុតាងយ៉ាងក្រាស់ក្រែល។
ហេតុការណ៍សមត្ថកិច្ចសហការគ្នាបង្ក្រាបការជួញដូរសារធាតុញៀនរហូតឃាត់ខ្លួនជនសង្ស័យនេះធ្វើឡើងនៅវេលាម៉ោង១២និង០០នាទី ថ្ងៃ១២ ខែមិថុនា ឆ្នាំ២០១៨ នៅចំណុចលំនៅដ្ឋានមួយកន្លែងស្ថិតក្នុងភូមិ ថ្មី ឃុំរវៀង ស្រុកសំរោង ខេត្តតាកែវ។
ក្នុងប្រតិបត្តិការនោះ សមត្ថកិច្ច បានឃាត់ខ្លួនជនសង្ស័យ ដែលពាក់ព័ន្ធចំនួន២នាក់ ដែលមានឈ្មោះ ៖ ទី១ឈ្មោះ ហុង រដ្ឋា ភេទប្រុស អាយុ៣១ឆ្នាំ និងទី២ឈ្មោះ អៀ អ៊ីលីង ភេទស្រី អាយុ១៩ឆ្នាំ។ ក្រោយឃាត់ខ្លួន សមត្ថកិច្ច ដកហូតវត្ថុតាងមាន ៖ ម្សៅក្រាមសថ្លាចំនួន០៣កញ្ចប់ធំ និង០២តូច ដែលមានទម្ងន់ស្មើ២០០,៩៥ក្រាម ជញ្ជីងថ្លឹងថ្នាំញៀនចំនួន២ អាវុធខ្លីK54 ចំនួន០២ដើម គ្រាប់k54 ១៧គ្រាប់ គ្រាប់k59 ១២គ្រាប់ និងគ្រាប់ប៉ារ៉ាស់១៤គ្រាប់ សម្ភារៈវេចខ្ចប់ និងសេពគ្រឿងញៀនមួយចំនួន ប្រាក់រៀល២៨ម៉ឺនរៀល ប្រាក់ដុល្លា១០០ដុល្លា និងម៉ូតូ១គ្រឿង។
បច្ចុប្បន្នក្រោយការឃាត់ខ្លួន ជនសង្ស័យនិងវត្ថុតាង ត្រូវបានបញ្ជូនទៅឲ្យការិយាល័យជំនាញកងរាជអាវុធហត្ថខេត្តកណ្តាលចាត់ការតាមនីតិវិធី៕
Source: Kampuchea Thmey Daily
0 Comments