ភ្នំពេញ ៖ យោងតាមសេចក្តីប្រកាសព័ត៌មាន របស់ធនាគារជាតិនៃកម្ពុជា ចុះថ្ងៃទី២៩ ខែឧសភា ឆ្នាំ២០១៨ បានសម្រេច បដិសេធ មិនផ្ដល់វិញ្ញាបនបត្របញ្ជាក់ការចុះបញ្ជីជាគ្រឹះស្ថាន ឥណទានជនបទចំពោះអង្គការ-សមាគមចំនួន ១២ និងបានដកហូតវិញ្ញាបនបត្របញ្ជាក់ការ ចុះបញ្ជីជាគ្រឹះស្ថានឥណទានជនបទចំនួន១១។
អង្គការ-សមាគម ដែលធនាគារជាតិនៃកម្ពុជា បដិសេធមិនផ្ដល់វិញ្ញាបនបត្របញ្ជាក់ ការចុះបញ្ជីជាគ្រឹះស្ថាន ឥណទានជនបរួមមាន៖
១៖ អង្គការកម្ពុជា ដើម្បីស្រាវជ្រាវ និងអភិវឌ្ឍន៍
២៖ អង្គការកម្ពុជា ស្ថាបនារុងរឿង
៣៖ អង្គការសង្គ្រោះ និងផ្ដល់ក្ដីសង្ឃឹមប្រជាជន
៤៖ អង្គការពន្លឺថ្មីភ្នាក់ងារ អភិវឌ្ឍន៍សេដ្ឋកិច្ចសហគមន៍
៥៖ អង្គការអភិវឌ្ឍន៍ ជីវភាពសហគមន៍
៦៖ អង្គការគ្រួសារសាមគ្គី
៧៖ អង្គការឥណទានសុវណ្ណភូមិ
៨៖ អង្គការអភិវឌ្ឍន៍ ក្រុមគ្រួសារកម្ពុជា
៩៖ សមាគមអភិវឌ្ឍន៍ ដំណាំស្រូវ
១០៖ អង្គការដារ៉ាអភិវឌ្ឍន៍
១១៖ សហគមអភិវឌ្ឍន៍កូនខ្មែរ
១២៖ សហគមកសិករយើង។
ដោយឡែកសម្រាប់ គ្រឹះស្ថានឥណទានជនបទចំនួន១១ ដែលត្រូវបានដកហូតវិញ្ញាបនបត្ររួមមាន៖
១៖ សមាគមជាតិទ្រទ្រង់កសិផល
២៖ វិទ្យាស្ថានសន្ដិភាព និងអភិវឌ្ឍន៍
៣៖ អង្គការលូថេរ៉េនបម្រើពិភពលោក (អង្គការ ជីវិតថ្លៃថ្នូរ)
៤៖ អង្គការអភិវឌ្ឍជនបទខ្មែរ
៥៖ ស៊ីខេអឹមអេហ្វជី
៦៖ អង្គការសប្បុរស
៧៖ អង្គការទ្រទ្រង់សហគមន៍បង្កើនការអភិវឌ្ឍន៍
៨៖ អង្គការជោគជ័យ
៩៖ អង្គការឥណទានកម្ពុជា (អាយខេ ហ្វាយនែន)
១០៖ អង្គការច័ន្ទសុខសាន្ដ
១១៖ សមាគមអភិវឌ្ឍន៍កសិកម្ម និងទេសចរណ៍។
ការសម្រេចខាងលើនេះ ត្រូវបានមហាជនអបអរសាទរ ត្បិតសេចក្តីសម្រេចហាក់ផ្តល់ប្រយោជន៍វិជ្ជមានដល់ប្រជាពលរដ្ឋទូទៅ ដែលកំពុងតែរងគ្រោះ ដោយសារតែ ស្ថាប័នហិរញ្ញវត្ថុមួយចំនួន តូចដែល រកស៊ីអារ កពួកគាត់ទាំងរស់ តាមរយៈការដំឡើងការប្រាក់ខ្ពស់កប់ពពក មិនគោរពតាម ការកំណត់របស់ធនាគារជាតិនោះទេ។
ពាក់ព័ន្ធចំណាត់ការក្តៅចំពោះ គ្រឹះស្ថានឥណទាន ជាង ២០ខាងលើនេះ ពលរដ្ឋមួយក្រុម ដែលជាដើមបណ្តឹង ប្តឹង "អង្គការឥណទានប្រសិទ្ធ" ទៅកាន់ ធនាគារជាតិនៃកម្ពុជា អគ្គនាយកដ្ឋានពន្ធដា និងទំព័រហ្វេសប៊ុក របស់សម្តេចតេជោ ពាក់ព័ន្ធ បញ្ហា ភាពមិនប្រក្រតី នៃការផ្តល់ ឥណទានដល់ពលរដ្ឋនោះ បានថ្លែងថា ពួកគាត់នៅមិនទាន់ឃើញ មានចំណាត់ការអ្វីសោះ ចំពោះស្ថាប័នមួយនេះ។
យោងតាម ពាក្យបណ្តឹងដែលដាក់ ជូនឯកឧត្តម ជា ចាន់តូ ទេសាភិបាល នៃធនាគារជាតិកម្ពុជា ចុះថ្ងៃទី១២ ខែមីនា ឆ្នាំ២០១៨ បានស្នើសុំ ឲ្យស្ថាប័នជាតិមួយនេះ ដកវិញ្ញាបនបត្រ របស់ អង្គការឥណទានប្រសិទ្ធ ដោយហេតុថា ស្ថាប័ននេះ បានយកការប្រាក់ពីពលរដ្ឋខ្ពស់ ខុសពីគោលការរបស់ធនាគារជាតិ យកសេវាក្រៅបន្ថែមច្រើន និងតម្រូវឲ្យពលរដ្ឋ ដាក់ឯកសារច្បាប់ ដែលពលរដ្ឋត្រូវការជាចាំបាច់ប្រចាំថ្ងៃ ដូចជាសៀវភៅគ្រួសារ ឬអត្តសញ្ញាណប័ណ្ណជាដើម។
បើគិតមកដល់ពេលនេះ មានរយៈពេលជាង ៣ខែ ហើយដែលពលរដ្ឋបាន ប្តឹងអង្គការឥណនទាន ប្រសិទ្ធ ដែលមានទីតាំងផ្ទះលេខ១១បេ ផ្លូវលូ៥ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ទៅកាន់ ធនាគារជាតិនៃកម្ពុជា ប៉ុន្តែនៅពលរដ្ឋនៅមិនទាន់មានឃើញចំណាត់ការ ឬការឆ្លើយតបពីស្ថាប័នធនាគារនៃកម្ពុជា នៅឡើយទេ មកទល់ពេលនេះ។
ពលរដ្ឋសង្ឃឹមថា ស្ថាប័នធនាគារជាតិនៃកម្ពុជា នឹងយកចិត្តទុកដាក់ ចំពោះពាក្យបណ្តឹង និងព្យាយាមដោះស្រាយ ចំពោះបញ្ហាដែលពួកគាត់ ជួបប្រទះ និងបានស្វែងរកកិច្ចអន្តរាគមន៍ពីស្ថាប័នជាតិមួយនេះ ឲ្យបានឆាប់ៗផងដែរ ដើម្បីកុំឲ្យស្ថាប័នមួយនេះ ចេះតែបន្តសកម្មភាពរកស៊ីកេងប្រវ័ញ្ចញើសឈាមប្រជាពលរដ្ឋខ្លាំងពេក។
ពាក់ព័ន្ធ ករណីពលរដ្ឋប្តឹង អង្គការ ឥណទានប្រសិទ្ធ នេះ យើងព្យាយាមសុំការបញ្ជាក់ពី អគ្គនាយកដ្ឋានត្រួតពិនិត្យ ធនាគារជាតិនៃកម្ពុជា ប៉ុន្តែទូរស័ព្ទហៅចូលគ្មានអ្នកទទួល៕
Source: Kampuchea Thmey Daily
0 Comments