អ្នកប្រដាល់ជើងចាស់របស់កម្ពុជា សូត្រ ប៊ុនធី ក្លិបបក្សីស្លាបដែក នឹងត្រូវជួបប្រកួតជាអ្នកប្រដាល់ថៃ ប្រដាល់មិត្តភាពកម្ពុជា-ថៃ នៅលើសង្វៀន Ganzberg Top Fighter នៅ SEATV នាយប់ថ្ងៃសៅរ៍ទី២៣ ខែមិថុនា ឆ្នាំ២០១៨នេះ។
សូត្រ ប៊ុនធី ត្រូវជួបជាមួយអ្នកប្រដាល់ថៃឈ្មោះChom Det ដោយជួបប្រកួតក្នុង ទម្ង ន់ ៦០ គីឡូក្រាម ។ អ្នកប្រដាល់ថៃនេះ ជាអ្នកប្រដាល់ចំណូលថ្មី មិនធ្លាប់មកប្រកួតនៅស្រុកខ្មែរទេកន្លងមក។
បើតាមលោកញាណ សុធី អ្នកចាត់ចែងកម្មវិធីប្រដាល់នៅSEATV អោយដឹងនោះថា Chom Det គេជាអ្នកប្រដាល់ដែលមានថ្វីដៃល្អ និង ខ្លាំង ដោយមានប្រវត្តិប្រកួតចំនួន៦៥លើក វាយឈ្នះ៥៥លើក ចាញ់០៩លើក និងស្មើ ០១លើក ។
ចំណែក សូត្រ ប៊ុនធី គេក៏ជាជើងខ្លាំងស្រករក្រោយរបស់កម្ពុជា ក្នុងប្រភេទទម្ងន់៦០គីឡូក្រាមនេះ ។ ក្រោយពេលឆ្លងកាត់ការប្រកួតជាមួយថៃប្រមាណជាង៣០លើក ដោយវាយឈ្នះជាង ២០ លើកនោះ បានធ្វើឲ្យគេមានបទពិសោធន៍ច្រើនក្នុងការប្រកួត ដោយគេវាយជាមួយថៃដូចវាយជាមួយខ្មែរគ្នាឯងអីចឹង គឺគ្មានញញើតខ្លាចដូចពីមុននោះឡើយ ។ ប៊ុនធី មានកណ្តាប់ដៃល្អ វាយចេញចូលរហ័ស ហើយស្នៀតទាត់ និង ជង្គង់ កែង ក៏ល្អថែមទៀត ។
សូត្រ ប៊ុនធី មានកំនត់ត្រាប្រកួតចំនួន១០៧លើក វាយឈ្នះ៨២លើក ចាញ់២១លើក និងស្មើ០៤លើក ។ កណ្ដាប់ដៃ កែង ជង្គង់និងជើងធាក់របស់ប៊ុនធី វាយចេញខ្លាំង និងមានទម្ងន់ធ្ងន់គួរសមដែរ ។ ជាអ្នកប្រដាល់ដែលមិនចេះវាយបន្ធូដៃនោះទេ អោយតែគេយល់ថាដៃគូអាចបង្ក្រាបបាន គឺគេមិនប្រោះទុកយូរទេ គេផ្តួលយកឈ្នះតែម្តង ។ និយាយពីបច្ចេកទេស និងកលល្បិចនោះ ប៊ុនធីគេមានពេញខ្លួន ។ ចាំមើល សូត្រ ប៊ុនធី គេអាចបង្ក្រាបអ្នកប្រដាល់ថៃចំណូលថ្មី Chom Det នេះបានឬអត់ ? ។
សូត្រ ប៊ុនធី គេឡើងប្រកួតជាមួយថៃ ប្រមាណ៧នាក់ជាប់ៗគ្នាចុងក្រោយនេះ គឺគេវាយឈ្នះទាំង៧នាក់តែម្តង ដោយក្នុងនោះ គេវាយឈ្នះដោយពិន្ទុ៣នាក់ និងវាយអោយសន្លប់ចំនួន០៤នាក់ ដែលការឈ្នះលើកចុងក្រោយគេនោះ គឺឈ្នះDav Oudorn ក្នុងទឹកទី៤ កាលពីថ្ងៃទី១០ មិថុនា ២០១៨កន្លងទៅនេះ ។
ចំពោះតូច ទូ អ្នកប្រដាល់សមាគមកីឡាប្រដាល់ក្រសួងការពារជាតិ ត្រូវជួបប្រកួត ជាមួយអ្នកប្រដាល់អាល់បានី Genci ដោយជួបប្រកួតក្នុងទម្ងន់៧១គីឡូក្រាម ។ Genci ធ្លាប់មកប្រកួតក្នុងស្រុកខ្មែរ១ដងហើយកន្លងមក ដោយវាយឈ្នះវ៉ែន ជីវ៉ុង ក្លិបកងកេងមានរិទ្ធ ខេត្តបាត់ដំបង ។
តូច ទូ មានកំនត់ត្រាប្រកួតចំនួន៦០លើក វាយឈ្នះ៤៥លើក ចាញ់១៣លើក និងស្មើ០២លើក ។ចំណែក Genci ទើបមានកំនត់ត្រាប្រកួត២៩លើក ឈ្នះ២៧លើក និងចាញ់២លើកប៉ុណ្ណោះ ។ ចាំមើល លើកនេះអ្នកប្រដាល់អាល់បានីGenci អាយកឈ្នះតូច ទូ បានឬអត់? ។
រីឯ ការប្រកួតរវាងខ្មែរនិងខ្មែរវិញ វៀត ប៊ុនឌឿន អ្នកប្រដាល់សមាគមកីឡាប្រដាល់ក្រសួងកសិកម្ម ដែលមានប្រវត្តិប្រកួត៧៥លើក ឈ្នះ៦១លើក ចាញ់១២លើក និងស្មើ០២លើក នឹងជួបប្រកួតជាមួយ លិញ ភារម្យ អ្នកប្រដាល់ក្លិបភារម្យគុនខ្មែរ ដែលមានប្រវត្តិប្រកួត៤៤លើក ឈ្នះ៣២លើក ឈ្នះ១០លើក និងស្មើ០២លើក ក្នុងវគ្គផ្តាច់ព្រ័ត្រដើម្បីវាយដណ្តើមប្រាក់លាន ។ អ្នកប្រដាល់ទាំងពីរនាក់នេះ ប្រកួតគ្នាក្នុងទម្ងន់៦០គីឡូក្រាម ។
ង៉ែត វុធ អ្នកប្រដាល់ក្លិបកងពលតូចទ័ពឆ័ត្រយោង៩១១ ត្រូវគេផ្គូអោយជួបប្រកួតជាមួយវ៉ាន់ វឿន អ្នកប្រដាល់ក្លិបឃ្លាំងមឿងកីឡាខេត្តពោធិសាត់ ដោយប្រកួតក្នុងទម្ងន់៥៧គីឡូក្រាម ៕
Source: Kampuchea Thmey Daily
0 Comments