រដ្ឋមន្ត្រី​ក្រសួង​កសិកម្ម អនុញ្ញាត​ឲ្យ​ក្រុមហ៊ុន នាំចូល និង​ដេប៉ូ​ផ្គត់ផ្គង់​ចែកចាយ ថ្នាំ​កសិកម្ម​ឡើងវិញ

ភ្នំពេញ​ ៖​ លោក វេ​ង សាខុន រដ្ឋមន្ត្រី​ក្រសួងកសិកម្ម រុក្ខាប្រមាញ់ និង​នេសាទ បានអនុញាត​ឲ្យ ក្រុមហ៊ុន ធ្វើ​ពាណិជ្ជកម្ម​ថ្នាំ​កសិកម្ម និង​ដេប៉ូ​ផ្គត់ផ្គង់​ចែកចាយ​ថ្នាំ​កសិកម្ម ដំណើរការ​នាំចូល និង​ផ្គត់ផ្គង់​ចែកចាយ​ថ្នាំ​កសិកម្ម​ឡើងវិញ ស្របតាម​ច្បាប់​ស្តីពី​ការគ្រប់គ្រង​ថ្នាំ​កសិកម្ម និង​ជី​កសិកម្ម និង​បទបញ្ញត្តិ​ពាក់ព័ន្ធ​ផ្សេងទៀត​។​

​ការ​អនុញាត​ឲ្យ ដំណើរការ​​ លក់​និង នាំចូល ថ្នាំ​កសិកម្ម ធ្វើឡើង បន្ទាប់ពី​ក្រសួង​កសិកម្ម​ប្រកាស​ផ្អាក ក្រោយពី​មាន​ករណី​ពុល ប្រជាពលរដ្ឋ​នៅ ភូមិ​ស្រែ​នន ឃុំ​កន្ទួត ស្រុក​ចិត្រ​បូរី ខេត្តក្រចេះ ដែល​សង្ស័យ​លើ​ការប្រើប្រាស់​ថ្នាំ កសិកម្ម ខុសច្បាប់​បណ្តាល​ឲ្យ​មនុស្ស ១៣​នាក់​បាន​ស្លាប់​និង ប្រមាណ​ជា​២០០​នាក់​ទៀត​បាន​ជួយសង្គ្រោះ​បាន​ទាន់ពេល​។​

​យោងតាម​សេចក្តី ជូនដំណឹង​របស់​ក្រសួងកសិកម្ម រុក្ខាប្រមាញ់ និង​នេសាទ ចុះហត្ថលេខា​ដោយ លោក វេ​ង សាខុន រដ្ឋមន្ត្រី​ក្រសួងកសិកម្ម រុក្ខាប្រមាញ់ និង​នេសាទ កាលពី ព្រឹក​ថ្ងៃទី​១២ ខែមិថុនា ឆ្នាំ​២០១៨​ម្សិលមិញ​ បាន​ចាត់​ឱ្យ​អគ្គនាយកដ្ឋាន​កសិកម្ម នាយកដ្ឋាន​នីតិកម្ម​កសិកម្ម និង​មន្ទីរ​កសិកម្ម រុក្ខាប្រមាញ់ និង​នេសាទ រាជធានី​-​ខេត្ត ចុះ​ធ្វើការ​ស្រាវជ្រាវ និង​ណែនាំ​ដល់​បណ្តា​ក្រុមហ៊ុន និង​ដេប៉ូ​ផ្គត់ផ្គង់​ចែកចាយ និង​អ្នកប្រើប្រាស់​ទាំងអស់​អនុវត្ត ឱ្យបាន​ត្រឹមត្រូវ​តាម​វិធាន​បច្ចេកទេស​ក្នុងការ​គ្រប់គ្រង និង​ប្រើប្រាស់​ថ្នាំ​កសិកម្ម ស្របតាម​ច្បាប់​ស្តីពី​ការគ្រប់គ្រង​ថ្នាំ​កសិកម្ម និង​ជី​កសិកម្ម​ឱ្យមាន​ប្រសិទ្ធភាព​ខ្ពស់​។​

ក្រសួងកសិកម្ម រុក្ខាប្រមាញ់ និង​នេសាទ បានធ្វើការ ណែនាំ​ដូច​ខាង​ក្រោម ​៖ ​១៖ អនុញ្ញាត​ឲ្យ​ក្រុមហ៊ុន ធ្វើ​ពាណិជ្ជកម្ម​ថ្នាំ​កសិកម្ម និង​ដេប៉ូ​ផ្គត់ផ្គង់​ចែកចាយ​ថ្នាំ​កសិកម្ម ដំណើរការ​នាំចូល និង​ផ្គត់ផ្គង់​ចែកចាយ​ថ្នាំ​កសិកម្ម​ឡើងវិញ ស្របតាម​ច្បាប់​ស្ដីពី​ការគ្រប់គ្រង​ថ្នាំ​កសិកម្ម និង​ជី​កសិកម្ម និង​បទបញ្ញត្តិ​ពាក់ព័ន្ធ​ផ្សេងទៀត។ ២ ​៖​ អាជ្ញាធរ​ មាន​សមត្ថកិច្ច​ពាក់ព័ន្ធ​ប្រចាំការ នៅ​មាត់ច្រក​ព្រំដែន​អន្តរជាតិ ច្រក​ទ្វេភាគី ច្រករបៀង និង​ច្រក​ចេញ​ចូល​ផ្សេងៗ​ទៀត មាន​សមត្ថកិច្ច​ជួយ​សម្របសម្រួល​ដល់​ការ​ធ្វើ​ពាណិជ្ជកម្ម​ថ្នាំ​កសិកម្ម និង​ជី​កសិកម្ម​ឱ្យ​បាន​ល្អប្រសើរ និង​ជួយ​ទប់ស្កាត់​នូវ​ករណី​រត់ពន្ធ​ខុសច្បាប់​ឱ្យមាន​ប្រសិទ្ធភាព​។​

៣៖ នាយកដ្ឋាន​នីតិកម្ម​កសិកម្ម និង​មន្ទីរ​កសិកម្ម រុក្ខាប្រមាញ់ និង​នេសាទ រាជធានី​-​ខេត្ត ត្រូវ​ជំរុញ​ពង្រឹង​ការ​ផ្សព្វផ្សាយ​បច្ចេកទេស និង​លើកកម្ពស់​ការ​យល់ដឹង​ដល់​ពាណិជ្ជករ និង​អ្នកប្រើប្រាស់​ថ្នាំ​កសិកម្ម​ទាំងអស់​ឱ្យបាន​យល់ដឹង​ពី​ហានិភ័យ​ដែល​បង្កឡើង​ដោយ​ថ្នាំ​កសិកម្ម​។​

៤៖ ក្នុងករណី​មាន​បទល្មើស​នាំចូល​ថ្នាំ​កសិកម្ម​ខុសច្បាប់ មន្ទីរ​កសិកម្ម រុក្ខាប្រមាញ់ និង​នេសាទ រាជធានី​-​ខេត្ត​ត្រូវ​រួម​សហកម្ម​ការ​ជាមួយ​នាយកដ្ឋាន​នីតិកម្ម​កសិកម្ម ចុះ​ទប់ស្កាត់​បង្ក្រាប​ឱ្យទាន់​ពេលវេលា និង​មាន​ប្រសិទ្ធភាព​ខ្ពស់​ជៀសវាង ការបង្ក​ផលប៉ះពាល់​ដល់​ការងារ​បងកបង្កើនផល​របស់​ប្រជាកសិករ​នា​រដូវវស្សា​ខាង​នេះ​។​

​ក្រសួង​បញ្ជាក់ថា ក្រោយពី​ទទួលបាន​សេចក្តីជូនដំណឹង​នេះហើយ គ្រប់​អង្គភាព​ពាក់ព័ន្ធ​ ក្រោម​ឱវាទ ក្រសួងកសិកម្ម មន្ទីរ រាជធានី​ខេត្ត ក្រុមហ៊ុន ដេប៉ូ ផ្គត់ផ្គង់ ចែកចាយ ថ្នាំ​កសិកម្ម និង​សមត្ថកិច្ច​ពាក់ព័ន្ធ​ទាំងអស់ ត្រូវ​អនុវត្តិ ឲ្យ​មាន​ប្រសិទ្ធភាព៕



Source: Kampuchea Thmey Daily