ភ្នំពេញ ៖ ម៉ូតូកង់បីបាញ់លាងសម្អាតផ្លូវរបស់រដ្ឋបាលខណ្ឌដូនពេញ បានចេញមកអន្តរាគមន៍ពន្លត់អគ្គិភ័យមួយកន្លែង ក្នុងសង្កាត់ស្រះចក នៅល្ងាចថ្ងៃអង្គារ ទី១២ ខែមិថុនា ឆ្នាំ២០១៨ ដោយជោគជ័យ។
បន្ទាប់ពីទទួលបានសេចក្តីរាយការណ៍ទាន់ពេលវេលាពីបងប្អូនប្រជាពលរដ្ឋ និងអាជ្ញាធរមូលដ្ឋាន លើករណីអគ្គិភ័យឆាបឆេះនៅចំណុចការដ្ឋានមួយកន្លែង ក្បាលដីលេខ៦ ផ្លូវលេខ៦៥ ភូមិ១០ សង្កាត់ស្រះចក ខណ្ឌដូនពេញ នៅថ្ងៃអង្គារ ១៤រោច ខែជេស្ឋ ឆ្នាំច សំរឹទ្ធស័ក ព.ស២៥៦២ ត្រូវនឹងថ្ងៃទី១២ ខែមិថុនា ឆ្នាំ២០១៨ វេលាម៉ោង១៧និង៥៥នាទី លោក សុខ ពេញវុធ អភិបាល នៃគណៈអភិបាលខណ្ឌដូនពេញ បានដឹកនាំកម្លាំងគណៈបញ្ជាការឯកភាពខណ្ឌដូនពេញ សហការជាមួយកម្លាំងរថយន្តពន្លត់អគ្គិភ័យរាជធានីភ្នំពេញ ចុះអន្តរាគមន៍ពន្លត់ទាន់ពេលវេលា ដោយពុំបណ្ដាលឲ្យឆេះរាលដាល របួស ឬមានស្លាប់បាត់បង់ជីវិតឡើយ ប៉ុន្តែអគ្គិភ័យខាងលើ បានបណ្តាលអោយខូចខាតសម្ភារៈសំណង់មួយចំនួនធំ។
ករណីនេះ គឺបណ្តាលមកពីឆ្លងចរន្តអគ្គិសនី ឆេះបង្គោលភ្លើង និងបន្តឆេះរាលដាលដល់ក្នុងការដ្ឋានសំណង់តែម្តង។ អគ្គិភ័យបានរលត់ទាំងស្រុងនៅម៉ោង ១៨និង២០នាទី នាថ្ងៃដដែល ដោយបានប្រើប្រាស់ម៉ូតូកង់បីបាញ់លាងសម្អាតផ្លូវរបស់រដ្ឋបាលខណ្ឌដូនពេញ អស់ចំនួន ០៣គ្រឿង និងរថយន្តពន្លត់អគ្គិភ័យរាជធានីភ្នំពេញ អស់ចំនួន ០៣ឡាន ផងដែរ៕
Source: Kampuchea Thmey Daily
0 Comments