បន្ទាយមានជ័យ ៖ មានករណីគ្រោះថ្នាក់ចរាចរណ៍មួយបានកើតឡើងរវាងរថយន្តធុនធំហ្វុយសូបើកឡើងជែងគោយន្តកន្ត្រៃសណ្តោងរ៉ឺម៉កដឹកគ្រៃមិនផុត រេចង្កូតទៅបុកម៉ូតូកង់បី និងម៉ូតូ តូបលក់អីវ៉ាន់ គោយន្តកន្ត្រៃដឹកគ្រឿងសង្ហារឹម បណ្តាលឲ្យស្លាប់ម្នាក់និងរបួសជាច្រើននាក់មានតាំងពីកូនសិស្សនៅវេលាម៉ោង៣រសៀលថ្ងៃទី១៩ ខែមិថុនា ឆ្នាំ២០១៨ លើផ្លូវជាតិលេខ៥ ត្រង់ចំណុចខាងមុខក្លោងទ្វារផ្លូវចូលវត្តកូបតូច ស្ថិតក្នុងភូមិនិមិត្ត៤ សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ។
លោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែតបានប្រាប់អ្នកយកយកព័តមានឲ្យដឹងថា នៅមុនពេលកើតហេតុនោះ មានរថយន្តធុនធំម៉ាកហ្វុយសូ ពណ៌ស ពាក់ស្លាកលេខ តាកែវ 3A-2149 អ្នកបើកមានឈ្មោះ ជី កូរ៉េ ភេទប្រុស អាយុ២៩ឆ្នាំ មុខរបរ បើកបររថយន្ត រស់នៅក្នុងភូមិជំទាវ ឃុំឫស្សីក្រោក ស្រុកមង្គលបូរី ខេត្តបន្ទាយមានជ័យ បើកពីកើតទៅលិច លុះបើកមកដល់ចំណុចកើតហេតុបានឡើងជែងគោយន្តកន្ត្រៃសណ្តោងរ៉ឺម៉កដឹកគ្រែក្នុងទិសដៅស្របគ្នា លុះជែងបានបន្តិចក៏ជ្រុលចង្កូតទៅបុកម៉ូតូកង់បី និងម៉ូតូសិស្សសាលា បន្តទៅបុកតូបលក់ឥវ៉ាន់ នៅតាមផ្លូវជាតិលេខ៥និងគោយន្តកន្ត្រៃដឹកគ្រឿងសង្ហារឹមកំពុងបើកលើផ្លូវជាតិ បណ្តាលឲ្យស្លាប់អ្នកបើកកង់បីនិងរងរួសជាច្រើននាក់មានទាំងពីរសិស្សសាលា។
លោកវរសេនីយ៍ត្រី នួន នីណារ៉ូ បានបញ្ជាក់ឲ្យដឹងទៀតថាអ្នកស្លាប់មានឈ្មោះ លឹម គារ ភេទប្រុស អាយុ៣២ឆ្នាំ មុខរបរកម្មករ រស់នៅក្នុងភូមិនិមិត្ត២ សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យជាម្ចាស់ម៉ូតូកង់បី។ លោកវរសេនីយ៍ត្រី នួន នីណារ៉ូ បានបញ្ជាក់ឲ្យដឹងទៀតថា ម៉ូតូកង់បី គោយន្តកន្ត្រៃ និងរថយន្តធុនធំ ខូចខាតធ្ងន់សមត្ថកិច្ចកំពុងស្ទូចយកទៅរក្សាទុកនៅប៉ុស្តិ៍នគរបាលនិមិត្តដើម្បីដោះស្រាយបន្តតាមនីតិវិធីច្បាប់នៅពេលក្រោយ ចំណែកសពបងប្អូនយកទៅធ្វើបុណ្យតាមប្រពៃណីនៅផ្ទះរងគ្រោះ៕
Source: Kampuchea Thmey Daily
0 Comments