ភ្នំពេញ ៖ តារាសម្តែងស្រស់ស្អាតសម្តីផ្អែមកញ្ញា ដេននី ក្វាន់ កាលពីថ្ងៃម្សិលមិញ បានធ្វើការLiveវីដេអូប្រកាសបើកលក់នូវសម្លៀកបំពាក់មួយៗទឹកដែលខ្លួនឈប់ស្លៀកដើម្បីប្រមូលថវិកាជូនដល់ប្រជាពលរដ្ឋខ្វះខាតនិងចាស់ជរានៅតាមសហគមន៍នៃតំបន់ដាច់ស្រយាលតាមបណ្តាខេត្តមួយចំនួន។
តារាសម្តែងកញ្ញា ដេននី ក្វាន់ បានសរសេរបង្ហោះភ្ជាប់ជាមួយការLiveវីដេអូនោះថា រៀបចំសម្លៀកបំពាក់មួយទឹករបស់នាងខ្ញុំសម្រាប់លក់នៅថ្ងៃស្អែក ដើម្បីយកលុយទៅចែកទានដល់ចាស់ក្រខ្សត់។ កញ្ញា ដេននី ក្វាន់ បានបញ្ជាក់ថា ចំពោះថវិកាដែលទទួលបានមកពីការលក់សំលៀកទាំងអស់នេះ នាងនឹងយកទៅទិញជាសម្ភារៈចែកជូនដល់ប្រជាពលរដ្ឋដែលជួបខ្វះខាត។
ជាការកត់សម្គាល់តារាសម្តែងកញ្ញា ដេននី ក្វាន់ ចាប់តាំងពីចូលប្រឡូកលើវិស័យសិល្បៈរហូតមកទល់ពេលនេះនាងតែងតែលេចធ្លោលើសកម្មភាពមនុស្សធម៌ជួយសង្គមតាមរយៈការចែកសម្ភារៈសិក្សាដល់សិស្ស ,អង្ករនិងសម្ភារៈបរិភោគ-ឧបភោគមួយចំនួនទៀតដល់ប្រជាពលរដ្ឋនិងចាស់ជរានៅតាមបណ្តាខេត្តនានាជាដើម។
តាមរយៈសកម្មភាពមនុស្សធម៌នេះ តារាស្រីកញ្ញាដេននី ក្វាន់ តែងទទួលបានការលើកសរសើរមិនដាច់ពីមាត់ ចំពោះទឹកចិត្តដ៏ល្អនេះ។ មិនតែប៉ុណ្ណោះថ្វីត្បិតតែកន្លងត្រូវបានក្រសួងដាក់បម្រាមលើអាជីពសិល្បៈមានរយៈពេល១ឆ្នាំក៏ពិតមែន ប៉ុន្តែតារាស្រីរូបនេះនៅតែទទួលបានការគាំទ្រនិងរក្សាបានប្រជាប្រិយភាពនៅដដែល។
គិតមកទល់ពេលនេះតារាសម្តែងកញ្ញាដេននី ក្វាន់ក៏ត្រូវបានដល់ពេលកំណត់និងត្រូវបានក្រសួងវប្បធម៌និងវិចិត្រសិល្បៈដកបម្រាមនិងបើកឱកាសឲ្យលេចវត្តមានសម្តែងនៅលើវិស័យសិល្បៈជាថ្មីឡើងវិញ។ ខណៈថ្មីៗនេះនាង ក៏ទើបបង្ហាញវត្តមានសម្តែងឈុតកាយវិការខារ៉ាអូខេបទ មនុស្សចាស់ក៏មានបេះដូង ដែលជាសំនៀងរបស់តារាចចម្រៀងជើងចាស់លោកគ្រូ ហួរ ឡាវី និងជាការដឹកនាំសម្តែងដោយគូស្នេហ៍របស់នាងគឺលោក ចាន់ មករា ផងដែរ៕
Source: Kampuchea Thmey Daily
0 Comments