ភ្នំពេញ ៖ កិច្ចប្រជុំគណៈកម្មាធិការអចិន្ត្រៃយ៍ព្រឹទ្ធសភា ក្រោមអធិបតីភាពដ៏ខ្ពង់ខ្ពស់សម្តេចវិបុលសេនាភក្តី សាយ ឈុំ ប្រធានព្រឹទ្ធសភា នៃព្រះរាជាណាចក្រកម្ពុជា នាព្រឹកថ្ងៃទី២៦ ខែមិថុនា ឆ្នាំ២០១៨នេះ បានសម្រេចកំណត់យកថ្ងៃទី២៧ ខែមិថុនាស្អែកនេះ បន្តសម័យប្រជុំលើកទី១ ព្រឹទ្ធសភា នីតិកាលទី៤ ដើម្បីពិនិត្យ និងឲ្យយោបល់លើសេចក្តីព្រាងច្បាប់ចំនួនពីរ ទៅតាមការស្នើឡើងរបស់រាជរដ្ឋាភិបាលទុកដូចជាការប្រញាប់។
សេចក្តីព្រាងច្បាប់ចំនួនពីរនោះរួមមាន ទី១-ការពិនិត្យ និងឲ្យយោបល់លើសេចក្តីព្រាងច្បាប់ស្តីពី ការអនុម័តយល់ព្រមលើការធានាទូទាត់របស់រាជរដ្ឋាភិបាល នៃព្រះរាជាណាចក្រកម្ពុជា ឲ្យក្រុមហ៊ុន ស្នេថេក ខូ អិលធីឌី។ និង២-ការពិនិត្យ និងឲ្យយោបល់លើសេចក្តីព្រាងច្បាប់ស្តីពី ការអនុម័តយល់ព្រមលើការធានាទូទាត់របស់រាជរដ្ឋាភិបាល នៃព្រះរាជាណាចក្រកម្ពុជា ឲ្យក្រុមហ៊ុន ខេមបូឌា អ៊ិនធើរណេស្យូណល អ៊ិនវេស្តមែន ឌីវើឡុបមែន គ្រុប។
សូមបញ្ជាក់ថា សេចក្តីព្រាងច្បាប់ស្តីពីការធានាទូទាត់ទាំងពីរខាងលើនេះ ត្រូវបានសម័យប្រជុំរដ្ឋសភាលើកទី១០ នីតិកាលទី៥ កាលពីថ្ងៃទី១៩ ខែមិថុនា ឆ្នាំ២០១៨ អនុម័តដោយសំឡេងគាំទ្រ ១០៤ លើ១០៤ នៃអង្គសភាទាំងមូល៕
Source: Kampuchea Thmey Daily
0 Comments