ប្រធាន​ផ្នែក​កម្សាន្ត​របស់​អារ៉ាប៊ីសាអ៊ូឌីត​ ត្រូវ​បណ្តេញចេញ ​បន្ទាប់ពី​មាន​កំហឹង​ជុំវិញ​ការ​សម្តែង​សៀក

ប្រព័ន្ធ​ផ្សព្វផ្សាយ​រដ្ឋ​បាន​និយាយ​ថា កាលពី​ថ្ងៃ​ចន្ទ ប្រទេស​អារ៉ាប៊ីសាអ៊ូឌីត​ បាន​បណ្ដេញ​ប្រមុខ​អាជ្ញាធរ​ផ្នែក​កម្សាន្ត​របស់​ខ្លួន ​បន្ទាប់​ពី​មានប្រតិកម្ម​យ៉ាងខ្លាំង​ប្រឆាំងនឹង​ការសម្តែង​សៀក​មួយ​ ដែល​បង្ហាញ​អំពី​ស្ត្រី​ស្លៀក​សំលៀកបំពាក់​រឹប​រាង។

ដោយ​ដកស្រង់​ព្រះរាជក្រឹត្យ​ដោយ​គ្មាន​ការផ្តល់​ហេតុផល​, ទីភ្នាក់ងារសារព័ត៌មាន​អារ៉ាប៊ីសាអ៊ូឌីត (SPA) បាន​រាយការណ៍​ថា “​លោក Ahmad al-Khatib ដែលជា​ប្រធាន​អាជ្ញាធរ​កម្សាន្ត​ទូទៅ​របស់​អារ៉ាប៊ីសាអ៊ូឌីត​ត្រូវបាន​ដកចេញ​ពី​តំណែង​របស់គាត់​”​។​
​
គេហទំព័រ​ព័ត៌មាន Sabq ដែល​គាំទ្រ​រដ្ឋាភិបាល​បាន​រាយការណ៍​ថា លោក Khatib ត្រូវបាន​បណ្តេញចេញ​ដោយសារ​ការសម្តែង​សៀក​ដ៏​ចម្រូងចម្រាស​នៅ​ទីក្រុង​រី​យ៉ា​ដដែល​រួមមាន​ស្ត្រី​ស្លៀកពាក់ “​ខោអាវ​មិន​សមរម្យ​”​។​
​
ខ្សែ​វីដេអូ​មួយ​ដែល​ចែករំលែក​លើ​បណ្តាញ​សង្គម​បានបង្ហាញ​ពី​អ្នក​សម្តែង​ស្រី​ម្នាក់​នៅក្នុង​សំលៀកបំពាក់​ពណ៌​ផ្កាឈូក​ដ៏​រឹប​ដែល​បង្ក​ឲ្យ​មាន​កំហឹង​ពី​សំណាក់​អ្នក​អភិរក្ស​អារ៉ាប៊ីសាអ៊ូឌីត​។​
​យ៉ាងណាក្តី មន្ត្រី​អារ៉ាប៊ីសាអ៊ូឌីត​មិនបាន​ឆ្លើយតប​នឹង​សំណើសុំ​អត្ថាធិប្បាយ​របស់ AFP ទេ​។​
​
ការបណ្តេញចេញ​របស់​លោក Khatib គឺ​ស្ថិតនៅ​ចំ​កណ្តាល​នៃ​ការធ្វើ​សេរីភាវូបនីយកម្ម​ដ៏​ធំធេង​របស់​ព្រះអង្គម្ចាស់ Mohammed bin Salman ដែល​បានបញ្ចប់​ការហាមឃាត់​ជាច្រើន​ទសវត្ស​លើ​ស្ត្រី​បើកបរ​និង​ចូល​មើល​កុន​ហើយ​បានអនុញ្ញាត​ឲ្យ​មានការ​ប្រគំ​តន្ត្រី​ចម្រុះ​មួយចំនួន​។​
​
លោក Khatib បាន​ដឹកនាំ​គំនិត​ផ្តួចផ្តើម​ទឹកប្រាក់​រាប់ពាន់​លាន​ដុល្លារ​ដើម្បី​បង្វែរ​ប្រទេស​វាល​ខ្សាច់​ដ៏​តឹងរ៉ឹង​មួយ​នេះ​ឲ្យ​ទៅជា​មជ្ឈមណ្ឌល​វប្បធម៌​និង​កម្សាន្ត​។​
​
ប្រតិកម្ម​យ៉ាង​ខ្លាំងក្លា​ប្រឆាំងនឹង​អ្វីដែល​ត្រូវបាន​គេ​កំណត់​យ៉ាង​ទូលំទូលាយ​តាម​អ៊ី​ន​ធើ​ណិ​ត​ថា​ជា “​សៀក​របស់​រុស្ស៊ី​” មួយ​នេះ​គឺ​បាន​គូសបញ្ជាក់​ពី​បញ្ហា​ប្រឈម​ដែល​ព្រះមហាក្សត្រ​ត្រូវ​ដោះស្រាយ​ខណៈពេលដែល​ទ្រង់​ចង់​ធ្វើ​ទំនើបកម្ម​ប្រទេសមួយ​នេះ​។​
​
រដ្ឋ​អភិរក្ស​សម្បូរ​ប្រេងកាត​មួយ​នេះ​មាន​ការដាក់​កម្រិត​យ៉ាង​តឹងតែង​បំផុត​នៅលើ​ពិភពលោក​លើ​ស្ត្រី​ដែល​ត្រូវបាន​តម្រូវ​ឲ្យ​ស្លៀកពាក់​រ៉ូ​ប​បិទ​ខ្លួនប្រាណ​ជិត​នៅក្នុង​ទីសាធារណៈ​។​
​កាលពី​ខែមេសា អាជ្ញាធរ​កីឡា​អារ៉ាប៊ីសាអ៊ូឌីត​បាន​បិទ​មជ្ឈមណ្ឌល​កាយសម្បទា​ស្ត្រី​មួយ​នៅ​ទីក្រុង​រី​យ៉ា​ដ​ដោយសារតែ​វីដេអូ​ផ្សព្វផ្សាយ​មាន​ភាពចម្រូងចម្រាស​ដែល​បង្ហាញ​ឲ្យ​ឃើញ​ស្ត្រី​ម្នាក់​ស្លៀក​សំលៀកបំពាក់​ហាត់ប្រាណ​រឹង​រាង​៕ AFP

​

Source: Kampuchea Thmey Daily