ក្រុមណាហ្គាវើល ដណ្តើមបានកៅអីកំពូលតារាងនៃពានរង្វាន់លីគកំពូលកម្ពុជា Metfone Cambodian League 2018 ឡើងវិញ ក្រោយឆ្លងកាត់១០ប្រកួតមកនេះរកបាន២៣ ពិន្ទុច្រើនជាងគេ ពោលគឺច្រើនជាងក្រុមលេខ២ បឹងកេត មានត្រឹម២២ពិន្ទុ។ ប្រកួតចុងក្រោយថ្មីៗនេះណាហ្គាវើល បានយកឈ្នះក្រុមបាតតារាងវេស្ទើនភ្នំពេញ ១០ទល់១។
លោក មាស ចាន់ណា គ្រូបង្វឹកប្រចាំក្រុមណាហ្គាវើល បានលើកឡើងថា ៖«យើងសប្បាយចិត្តដោយសារពួកគាត់ធ្វើបានល្អច្រើន។ តាមពិតមិនចាំបាច់ឈ្នះដល់១០គ្រាប់ទេ ឈ្នះត្រឹមពីរឬបីគ្រាប់ក៏យើងសប្បាយចិត្តដែរ ព្រោះទី១យើងបានឡើងលេខ១វិញ ទី២ពាក់ព័ន្ធទម្រង់លេងរបស់កីឡាករយើង។ វាជាអ្វីដែលយើងសប្បាយចិត្ត។ នៅចុងម៉ោងយើងបានប្ដូរខ្សែការពារកណ្ដាលបរទេសចេញ ដាក់ខ្សែការពារខ្មែរជំនួសដើម្បីមើលថាគាត់អាចធ្វើបានក្នុងកម្រិតណា។ យើងធ្វើបានល្អនៅលើទីលានផងនិងតេស្ដប្រព័ន្ធការពារកណ្ដាលរបស់យើងនៅខាងក្រោមផង»។
១០ប្រកួតមកនេះណាហ្គាវើល បានយកឈ្នះលើក្រុមអគ្គីសនីកម្ពុជា ៥ទល់១ ឈ្នះអង្គរថាយហ្គឺរ ៣ទល់០ ឈ្នះភ្នំពេញក្រោន ១ទល់០ ឈ្នះអាស៊ីអឺរ៉ុប ឈ្នះសូលទីឡូអង្គរ ៤ទល់១ ស្មើគ្នាជាមួយព្រះខ័នរាជស្វាយរៀង ១ទល់១ ឈ្នះក្រសួងការពារជាតិ ២ទល់០ ចាញ់វិសាខា ៣ទល់០ ឈ្នះអគ្គស្នងការដ្ឋាននគរបាលជាតិ ៤ទល់២ និងឈ្នះវេស្ទើន ១០ទល់០។ សម្រាប់ប្រកួតបន្ទាប់ក្រុមណាហ្គាវើល ត្រូវប៉ះក្រុមជើងឯកឆ្នាំចាស់ បឹងកេត នៅវេលា៦:៣០នាទីល្ងាចថ្ងៃអាទិត្យ ទី២៤ ខែ មិថុនាឆ្នាំ២០១៨ លើទីលានពហុកីឡដ្ឋានជាតិ។
គិតត្រឹមដឹកនាំក្រុមណាហ្គាវើល ពីឆ្នាំ២០១៥ មកលោក មាស ចាន់ណា តែងតែបង្ហាញថា ក្រុមខ្លួនជាបេក្ខជនមួយដែលមិនអាចរំលងបានក្នុងការប្រជែងយកជើងឯក។ ជាក់ស្តែងគឺឆ្នាំ២០១៥ ទទួលបានជើងឯករងលីគកំពូលកម្ពុជា ក្រោយចាញ់បឹងកេត នៅវគ្គផ្តាច់ព្រ័ត្រដោយបាល់ប៉េណាំងទីកាត់សេចក្តី៣ទល់២ និងជើងឯករងពានរង្វាន់សម្តេចតេជោ ក្រោយចាញ់ព្រះខ័នរាជស្វាយរៀង។ ឆ្នាំ២០១៦ ណាហ្គាវើល ឈរចំណាត់ថ្នាក់លេខ៣ ព្រមទាំងមានឱកាសទៅលេងវគ្គជម្រុះបឋមនៃពានរង្វាន់ AFC Cup 2017 ផងដែរ។ ឆ្នាំ២០១៧ ណាហ្គាវើល បានត្រឹមលេខ៣ក្រោយចាញ់ក្រសួងការពារជាតិ នៅវគ្គជម្រុះលីគកំពូលកម្ពុជា ខណៈពានរង្វាន់សម្តេចតេជោ ក្រុមនេះបានត្រឹមជើងឯករងក្រោយចាញ់ព្រះខ័នរាជស្វាយរៀង នៅវគ្គផ្តាច់ព្រ័ត្រ។
បើក្រឡេកមើលលទ្ធផលកាលពីរដូវកាលចាស់របស់ក្រុមណាហ្គាវើល បានបញ្ចប់ទៅដោយក្នុងរដូវកាលលីគកំពូលកម្ពុជា ឈរចំណាត់ថ្នាក់លេខ៤ ក្នុងចំណោមសមាជិកទាំង១២ក្រុម ខណៈកីឡាករជនជាតិរ្វ៉ាន់ដា Kipson ឈ្នះស្បែកជើងមាសប្រចាំរដូវកាលក្នុងនាមជាអ្នករកគ្រាប់បាល់បញ្ចូលទីបានច្រើនជាងគេ។ ចំណែកក្នុងពានរង្វាន់សម្តេចតេជោ ហ៊ុន សែន វិញ ណាហ្គាវើលបានត្រឹមជើងឯករងក្រោយចាញ់ក្រុមព្រះខ័នរាជស្វាយរៀង នៅវគ្គផ្ដាច់ព្រ័ត្រ៕
Source: Kampuchea Thmey Daily
0 Comments