ទឹកភ្នែកឪពុកម្ដាយ! កូនប្រុស ត្រូវគេកាប់ស្លាប់ ជនល្មើស៥នាក់រស់នៅក្រៅសំណាញ់ច្បាប់យ៉ាងមានសេរីភាព

កណ្ដាល ៖ ឪពុកម្ដាយ រៀបរាប់ទាំងទឹកភ្នែកប្រាប់ក្រុមអ្នកសារព័ត៌មាន ថា កូនប្រុសត្រូវគេកាប់សម្លាប់យ៉ាងព្រៃផ្សៃ តែទីបំផុតជនល្មើស៥នាក់ ដែលពាក់ព័ន្ធ កំពុងរស់នៅក្រៅសំណាញ់ច្បាប់យ៉ាងមានសេរីភាព។ ពួកគេទាំងពីរនាក់ក្នុងនាមដើមបណ្ដឹង ស្នើដល់ថ្នាក់ដឹកនាំ ជួយរកយុត្តិធម៌ និង សូមឱ្យតុលាការខេត្តកណ្ដាល ពន្លឿននីតិវិធីឱ្យបានឆាប់រហ័ស។

សាលាដំបូងខេត្តកណ្ដាល នៅថ្ងៃទី១៩ ខែមិថុនា ឆ្នាំ២០១៨ នេះ បានសម្រេចលើកពេលសវនាការជាលើកទី៣ ដែលធ្វើឱ្យប្តីប្រពន្ធ ជាដើមបណ្តឹង សម្តែងការមិនពេញចិត្តជាខ្លាំង។

ឯកសារទទួលបានបង្ហាញថា សំណុំរឿងព្រហ្មទណ្ឌលេខ១២០៥ អ.ក ចុះថ្ងៃទី២៤ ខែកញ្ញា ឆ្នាំ២០១៧ មានជនជាប់ចោទ៥នាក់ ៖ ទី១៖ឈ្មោះផេង ណារ័ត្ន ភេទប្រុស អាយុ១៦ឆ្នាំ រស់នៅភូមិភ្នុំដោលឃុំតាំងក្រាំងស្រុកបាធាយខេត្តកំពុងចាម (ក្រៅឃុំ) ទី២៖ឈ្មោះយ៊ិន វាសនា ហៅ កែម វាសនា ភេទប្រុស អាយុ១៩ឆ្នាំ រស់នៅភូមិភ្នុំដិល ឃុំតាំងក្រាំង ស្រុកបាធាយ ខេត្តកំពង់ចាម(គេចខ្លួន) ទី៣ ៖ ឈ្មោះថាំង ម៉េងហួយ ហៅម៉ៅ ភេទប្រុស អាយុ១៧ឆ្នាំ រស់នៅភូមិតាបែក ឃុំឃុំសំបូ ស្រុកបាធាយ ខេត្តកំពង់ចាម (ក្រៅឃុំ) ទី៤៖ឈ្មោះឈុន រតនៈ ហៅ មឿន ណាក់ ភេទប្រុស អាយុ១៨ឆ្នាំ រស់នៅភូមិស្លែង ឃុំជ្រៃវៀន ស្រុកព្រៃឈរ ខេត្តកំពង់ចាម (ក្រៅឃុំ) ទី៥៖ឈ្មោះចន ភស្ត្រា ភេទប្រុស អាយុ២០ឆ្នាំ រស់នៅភូមិបែកពាង ឃុំជាលា ស្រុកបាធាយ ខេត្តកំពង់ចាម (គេចខ្លួន)។

ជនជាប់ចោទទាំង៥នាក់ ត្រូវបានចោទប្រកាន់ពីបទ"ហិង្សាដោយចេតនាមានស្ថានទម្ងន់ទោសដោយសារមរណភាពនៃជនរងគ្រោះ"ប្រព្រឹត្តនៅភូមិក្រងស្វាយ ឃុំស្វាយអំពារ ស្រុកមុខកំពូល ខេត្តកណ្ដាល កាលពីថ្ងៃទី២១ ខែកញ្ញា ឆ្នាំ២០១៧ តាមមាត្រា២២៤នៃក្រមព្រហ្មទណ្ឌ។ ជនរងគ្រោះក្នុងសំណុំរឿងនេះ ឈ្មោះ មឿន រ៉ូហ្សា ភេទប្រុស អាយុ២២ឆ្នាំ។

លោកសុខ វណ្ណនី និង ប្រពន្ធ ប្រាប់ក្រុមអ្នកសារព័ត៌មាន ថា កូនប្រុសត្រូវបានក្រុមជនល្មើសកាប់សម្លាប់យ៉ាងព្រៃផ្សៃ តែរហូតមកទល់ពេលនេះ គ្មានជនល្មើសណាមួយត្រូវបានចាប់ខ្លួនដើម្បីផ្តន្ទាទោសតាមច្បាប់ទេ៕