លោកវេង សាខុន ផ្តល់ចំណងដៃថ្មីដល់ អ្នកស្រុកតំបែរ គឺ(កើត ការ និង មរណភាព) ទទួលការឧបត្ថម្ភ១០ម៉ឺនរៀល និងធ្វើសំបុត្រកំណើត អាពាហ៍ពិពាហ៍ និងមរណភាព

ភ្នំពេញ ៖ លោក វេង សាខុន ប្រធានក្រុមការងារចុះជួយ ស្រុកតំបែរ បានប្រកាសឲ្យសមាជិកក្រុមការងារថ្នាក់កណ្តាល ចុះអនុវត្តគោល នយោបាយ ក៣ (កើត ការ និងការទទួលមរណ) ដោយត្រូវជួយឧបត្ថម្ភ ១០ម៉ឺនរៀល សម្រាប់ពិធីនីមួយៗ ហើយ សុំឲ្យអាជ្ញាធរមូលដ្ឋានចុះមកធ្វើសំបុត្រកំណើត សំបុត្រអាពាហ៍ពិពាហ៍ និងសំបុត្រមរណភាពដល់ទីកន្លែងដោយគ្មានយកកម្រៃសេវាជូនប្រជាជន។

លោកវែង សាខុន ថ្លែងបែបនេះ បានធ្វើឡើង នៅក្នុងពិធី សំណេះសំណាលជាមួយ ប្រជាពលរដ្ឋចំនួន ១៧០០នាក់ ដើម្បីធ្វើការ សំណេះសំណាល សាកសួរសុខទុក្ខ និងស្តាប់នូវរាល់បញ្ហាដែលកំពុងកើតមានទាំងក្នុងការងារ បង្កបង្កើនផល និងក្នុងជីវភាពប្រចាំថ្ងៃរបស់បងប្អូន រួចព្យាយាមកែលម្អ និងដោះស្រាយជូនជាជំហានៗទៅតាមការចាំបាច់។ ពិធីនេះបានប្រារព្ធធ្វើនៅក្នុងបរិវេណវត្តខ្នុរ ភូមិខ្នុរ ឃុំនាងទើត ស្រុកតំបែរ។

លោកពូសាំង សឿន មេឃុំនាងទើត បានអានរបាយការណ៍ ដោយសង្ខេបពីសមិទ្ធផលថ្មីៗដែលរាជរដ្ឋាភិបាល បានកសាងនិងអភិវឌ្ឍក្នុងឃុំ ពិសេសដោយទទួល បានការយកចិត្តទុកដាក់ ឧបត្ថម្ភ គាំទ្រពីឯកឧត្តមប្រធានក្រុមការងារ សហការី និងអាជ្ញាធរដែនដីគ្រប់លំដាប់ថ្នាក់ធ្វើឲ្យឃុំនាងទើតមារការកែប្រែមុខមាត់ថ្មីគួរជាទីមោទនៈ។

ឆ្លៀតយកឱកាស នោះ លោក វេង សាខុន បានធ្វើការសំណេះសំណាល សាកសួរសុខទុក្ខជាមួយប្រជាពលរដ្ឋ និងសូមសម្តែងនូវអំណរសាទរ សប្បាយរីករាយដោយបានឃើញការរីកចម្រើនលើគ្រប់វិស័យទាំងពុទ្ធចក្រ និងអាណាចក្រ ក្រោមម្លប់សុខសន្តិភាពដ៏ប្រពៃដែលសម្តេចតេជោសែនបានខិតខំតស៊ូ ពុះពារគ្រប់ឧបសគ្គនាំយកមកជូនជនរួមជាតិ។ ជានិច្ចកាល ទោះឋិតក្នុងកាលៈទេសៈណាក៏ដោយ សម្តេចតែងតែគិតគូរពីសុខទុក្ខនិងបញ្ហាជីវភាពប្រចាំថ្ងៃរបស់បងប្អូនដោយមិនព្រងើយកន្តើយ ជាក់ស្តែងថ្ងៃនេះតាមរយៈលោក សម្តេចតេជោសែន ប្រធានគណបក្សប្រជាជនកម្ពុជា និងជានាយករដ្ឋមន្ត្រី និងសម្តេចកិត្តិព្រឹទ្ធបណ្ឌិតប៊ុន រ៉ានីហ៊ុនសែន ប្រធានក្រហមប្រាកកម្ពុជា បានផ្តាំផ្ញើសាកសួរសុខទុក្ខបងប្អូនដែលមាន វត្តមាននៅទីនេះ នៅទូទាំងស្រុកតំបែរ និងសូមជូនពរឲ្យទទួលបាននូវពុទ្ធិពរទាំង៤ ប្រការកុំបីឃ្លៀងឃ្លាតឡើយ។

លោកបានជម្រាបជូនអង្គពិធីថា ក្រោយពីប្រទេសជាតិ ទទួលបានសុខសន្តិភាព ស្ថិរភាពពេញលេញ នាំឲ្យប្រទេសមានការអភិវឌ្ឍលើគ្រប់វិស័យ ជីវភាពរបស់ប្រជាពលរដ្ឋត្រូវបានកែ លម្អ ហេដ្ឋារចនាសម្ព័ន្ធសំខាន់ៗត្រូវបានអភិវឌ្ឍជា បណ្តើរៗ សេដ្ឋកិច្ចជាតិមានការរីកចម្រើន។ ទោះជាយ៉ាងនេះក្តី ក្រោមការដឹកនាំរបស់សម្តេច រាជរដ្ឋាភិបាលកំពុងខិតខំយកអស់កម្លាំងកាយចិត្ត និងរិះរកគ្រប់មធ្យោបាយ ដាក់ចេញនូវគោលនយោបាយអភិវឌ្ឍជាតិ និងគាំពារសង្គម សមស្របដើម្បីដោះស្រាយនូវរាល់បញ្ហាប្រឈម សេចក្តីត្រូវការ កំណើនសេដ្ឋកិច្ចគ្រួសារ កាត់បន្ថយភាពក្រីក្រ និងការធ្វើចំណាកស្រុក ជាជំហានៗធានាបាននូវសុខ សុវត្ថិភាព សេចក្តីថ្លៃថ្នូរ និងការរីកចម្រើនដោយនិរន្តរភាព ស្របតាម ទស្សនវិស័យនាឆ្នាំ ២០៣០ របស់រាជរដ្ឋាភិបាលគឺចង់ប្រែក្លាយប្រទេសយើងឲ្យទៅជាប្រទេសមានចំណូល មធ្យមកម្រិតខ្ពស់។ ដើម្បីសម្រេច បាននូវឆន្ទៈនេះ រាជរដ្ឋាភិបាលបានដាក់ចេញ នូវផែនការសាងសង់ហេដ្ឋរចនាសម្ព័ន្ធរូបវ័នសំខាន់ៗដូចជា ការពង្រីក គមនាគមន៍ផ្លូវទឹក ផ្លូវគោក និងអាកាស ដើម្បីបង្កលក្ខខណ្ឌល្អសម្រាប់ការវិនិយោគ ទេសចរណ៍ ការនាំចេញកសិផល បង្កើតការងារ និងបង្កើនប្រាក់ចំណូល។ ដើម្បីឈានទៅសម្រេចបាននូវគោល នយោបាយដ៏ត្រឹមត្រូវនិងច្បាស់លាស់នេះ។

លោកសូមឲ្យបងប្អូនប្រជាពលរដ្ឋគ្រប់ៗរូបត្រូវខិតខំយកចិត្តទុកដាក់ថែរក្សាសុខសន្តិភាព ស្ថិរភាព និងសមិទ្ធផលទាំងអស់ដែលយើងបានរួមគ្នាកសាងកន្លងមក។ ដូច្នេះលោកបានអំពាវនាវឲ្យប្រជាពលរដ្ឋនៅឃុំនាងទើត និងនៅទូទាំងស្រុកតំបែរសូមអញ្ជើញនាំគ្នាទៅបោះឆ្នោតជូនគណបក្សប្រជាជនកម្ពុជាដែលមាន រូបសញ្ញាទេវតាបាចផ្កា លេខរៀងទី២០ ស្រួលចាំ ស្រួលគិត និងស្រួយគូស ដើម្បីផ្តល់ជូនសម្តេចតេជោសែនធ្វើជានាយករដ្ឋមន្ត្រីបន្តដឹកនាំប្រទេសកម្ពុជានៅ អាណត្តិក្រោយៗទៀត។

ជាចំណងដៃថ្មីមួយទៀតសម្រាប់ស្រុកតំបែរ លោកបានឲ្យសមាជិកក្រុមការងារថ្នាក់កណ្តាលចុះអនុវត្តគោល នយោបាយ ក៣ (កើត ការ និងការទទួលមរណៈ) ដោយត្រូវជួយឧបត្ថម្ភ ១០ម៉ឺនរៀល សម្រាប់ពិធីនីមួយៗ ហើយ សុំឲ្យអាជ្ញាធរមូលដ្ឋានចុះមកធ្វើសំបុត្រកំណើត សំបុត្រអាពាហ៍ពិពាហ៍ និងសំបុត្រមរណភាពដល់ទីកន្លែងដោយគ្មានយកកម្រៃសេវាជូនប្រជាជន៕