ផ្សារ​ពាណិជ្ជកម្ម ចេ​ឌូ បា​យី កម្ពុជា​-​ចិន សម្ពោធ​បើក​ជា​ផ្លូវការ​ហើយ

ភ្នំពេញ​ ៖ ផ្សារ​ពាណិជ្ជកម្ម ចេ​ឌូ បា​យី កម្ពុជា​-​ចិន ដែល​មាន​ទីតាំង​ស្ថិត​នៅ​តាម​បណ្តោយ​ផ្លូវជាតិ​លេខ​៤ ចំណុច​គីឡូម៉ែត្រ​លេខ​២៣ ជិត​ផ្សារ​បែក​ចាន ស្រុក​អង្គស្នួល ខេត្តកណ្តាល បាន​សម្ពោធ​បើក​ជា​ផ្លូវការ​ហើយ​ណ​នៅ​ព្រឹក​ថ្ងៃទី​២១ ខែមិថុនា​នេះ​។

លោក ប៉ាន សូរ​សក្តិ រដ្ឋមន្ត្រីក្រសួង​ពាណិជ្ជកម្ម​ថ្លែង​ថា ថ្ងៃនេះ​ក្រុមហ៊ុន ចេ​ឌូ បា​យី គ្រឿង​សង្ហារិម​គ្រុប ដែល​ជា​ក្រុមហ៊ុន​ធំ​មួយ​មកពី​ខេត្ត​ស៊ី​ឈួន ប្រទេស​ចិន បាន​មក​វិនិយោគ​នៅ​កម្ពុជា ដើម្បី​បង្កើត​ផ្សា​រលក់ និង​បោះ​ដុំ​ផលិតផល​គ្រឿង​សង្ហា​រឹម​ប្រណិតៗ សំដៅ​ផ្គត់ផ្គង់​ទីផ្សារ​ក្នុងស្រុក ពិសេស​ឆ្លើយតប​នឹង​ការ​រីកចម្រើន នៃ​វិស័យ​សំណង់​នៅ​កម្ពុជា​។ លោក​រដ្ឋមន្ត្រី​បាន​បន្តថា ការ​បើក​ផ្សារ​នេះ​លោក Wang Xue Mao អគ្គនាយក​ក្រុមហ៊ុន ចេ​ឌូ បា​យី គ្រឿង​សង្ហា​រឹម​ហ្គ្រុ​ប នៃ​ទីក្រុង​ពាណិជ្ជកម្ម បានផ្តល់​ទីតាំង​មួយ​កន្លែង​ជូន​ក្រសួងពាណិជ្ជកម្ម​កម្ពុជា​យើង ដែលមាន​ទំហំ ២០០​ម៉ែត្រការ៉េ ក្នុង​បរិវេណ​ផ្សារ​ពាណិជ្ជកម្ម​ចេ​ឌូ បា​យី កម្ពុជា​-​ចិន​នេះ​ផងដែរ សម្រាប់​ដាក់​តាំង​ផលិតផល​កម្ពុជា ក្នុង​គោលបំណង​ស្វែងរក​ទីផ្សារ និង​ដៃគូ​ពាណិជ្ជកម្ម ដើម្បី​ជំរុញ​ការនាំចេញ​។

នេះ​ជា​ឱកាសល្អ​បំផុត​សម្រាប់​បងប្អូន​ផលិតករ និង​ប្រជាកសិករ​ខ្មែរ ក្នុងការ​ចូលរួម​ជាមួយ​ក្រសួងពាណិជ្ជកម្ម ដើម្បី​ដាក់​តាំង​ទំនិញ និង​ផលិតផល​របស់ខ្លួន ក៏ដូចជា​ស្វែងរក​ដៃគូ​ពាណិជ្ជកម្ម​មកពី​ប្រទេស​ចិន សំដៅ​ចែកចាយ និង​លក់​ទៅកាន់​ទីផ្សារ​ប្រទេស​ចិន​។ ក្នុងនាម​ក្រសួងពាណិជ្ជកម្ម នៃ​ព្រះរាជាណាចក្រ​កម្ពុជា សូម​សម្តែង​នូវ​ការ​ស្វាគមន៍​យ៉ាង​កក់ក្តៅ ចំពោះ​ការមកដល់ នៃ​ផ្សារ​ពាណិជ្ជកម្ម ចេ​ឌូ បា​យី កម្ពុជា​-​ចិន ដែលជា​ផ្សា​របោះ​ដុំ​ទំនិញ​ធំ ដូចគ្នា​នឹង​ផ្សារ​ទំនើប AEON ដែល​វិនិយោគ​ដោយ​ក្រុមហ៊ុន​មកពី​ប្រទេស​ជប៉ុន និង​ផ្សារ MACRO វិនិយោគ​ដោយ​ក្រុមហ៊ុន​មកពី​ប្រទេស​ថៃ​ផង​ដរ​។

​លោក Wang Xue Mao អគ្គនាយក​ក្រុមហ៊ុន ចេ​ឌូ បា​យី គ្រឿង​សង្ហា​រឹម​ហ្គ្រុ​ប នៃ​ទីក្រុង​ពាណិជ្ជកម្ម​ថ្លែងថា ក្រុមហ៊ុន Bayi Group ជា​ក្រុមហ៊ុន​ផលិត​គ្រឿង​សង្ហា​រឹម និង​សម្ភារៈ​សំណង់ ដែល​ល្បីល្បាញ​បំផុត​នៅក្នុង​ប្រទេស​ចិន ដោយ​បាន​បង្កើត​ឱកាស​សម្រាប់​ដំណាក់កាល​ទីមួយ នៃ​មជ្ឈមណ្ឌល​ពាណិជ្ជកម្ម​ចិន​-​កម្ពុជា​។

លោក​បន្ត​ថា មាន​ក្រុមហ៊ុន​ជាង ៤០​ក្រុមហ៊ុន​បាន​មក​ចូលរួម​ការតាំង​ពិព័រណ៍​ទំនិញ​គ្រឿង​សង្ហា​រឹម គ្រឿង​ម៉ាស៊ីន និង​គ្រឿងចក្រ មកពី​ខេត្ត​ស៊ី​ឈួន ប្រទេស​ចិន​ក្នុងថ្ងៃនេះ​។ ជឿជាក់​ថា​ការ​តាំងពិព័រណ៍​នេះ​នឹង​បើកទ្វារ​សម្រាប់​កិច្ចសហប្រតិបត្តិការ​ពាណិជ្ជកម្ម​រវាង​ចិន និង​កម្ពុជា​។



លោកស្រី Zhang Ying អនុប្រធាន​មន្ទីរ​ពាណិជ្ជកម្ម​ខេត្ត​ស៊ី​ឈួន ប្រទេស​ចិន បាន​បញ្ជាក់ដែរថា ខេត្ត​ស៊ី​ឈួន ដែល​ជា​ចំណុច​សំខាន់ នៃ​គោលនយោបាយ​ខ្សែក្រវាត់​មួយ វិថី​មួយ និង​ជា​របៀង​ចរាចរ​សំខាន់​នៅក្នុង​តំបន់​អាស៊ីអាគ្នេយ៍​មាន​ដី​ស្នូល​ទីផ្សារ​ទូលំទូលាយ ក៏ដូចជា​មាន​សមត្ថភាព​ឧស្សាហកម្ម​យ៉ាង​ខ្លាំង​ក្លា បាន​ធ្វើ​ការ​ចាក់គ្រឹះ​ដ៏​រឹងមាំ​សម្រាប់​តំបន់​ទាំងពីរ ដើម្បី​ធ្វើការ​បំពេញ​ឲ្យ​គ្នា​ទៅវិញទៅមក​សម្រាប់​ការអភិវឌ្ឍ​ផង​ដែរ​។ នៅក្នុង​ឆ្នាំ​២០១៧ បរិមាណ​នាំចូល ក៏ដូចជា​ការនាំចេញរ​វាង​ខេត្ត​ស៊ី​ឈួន និង​ប្រទេស​កម្ពុជា គឺមាន​ចំនួន ១១០​លាន​ដុល្លារ​ផង​ដែរ​។

ផលិតផល​នាំចេញ​ចំបង​របស់​ខេត្ត​ស៊ី​ឈួន ប្រទេស​ចិន​មក​កម្ពុជា គឺជា​គ្រឿង​អេ​ឡិច​ត្រូ​និ​ច មេកានិច ឧបករណ៍​សំឡេង និង​រូបភាព គ្រឿងបន្លាស់ សមាសធាតុ​វត្ថុ​ដើម វាយនភ័ណ្ឌ ផលិតផល​គីមី ក៏ដូចជា​ផលិតផល​ដែកថែប​។ គិត​ត្រឹម​ខែធ្នូ ឆ្នាំ​២០១៧ សហគ្រាស​ស៊ី​ឈួន​បាន​ចុះបញ្ជី​សហគ្រាស​ចំនួន ៩ សម្រាប់​ការ​វិនិយោគ​នៅក្នុង​ប្រទេស​កម្ពុជា ដោយមាន​ដើមទុន​វិនិយោគ​ចំនួន ២០៥​លាន​ដុល្លារ ដែល​ទាក់ទង​នឹង​សម្ភារៈ​សំណង់ កសិកម្ម ការថែទាំ​សុខភាព​ទេសចរណ៍ រ៉ែ ក៏ដូចជា​សេវា​អាជីវកម្ម​។ ត្រឹម​ខែឧសភា ឆ្នាំ​២០១៨ គម្រោង​ថ្មី​មាន​ចំនួន ១៣ ត្រូវ​បាន​ចុះហត្ថលេខា​នៅ​កម្ពុជា ហើយ​កិច្ចសន្យា​ចំនួន​ទឹកប្រាក់​ប្រហែល ១៧​លាន​ដុល្លារ​អាមេរិក​។ ក្រោម​ក្របខណ្ឌ​ខ្សែក្រវាត់​មួយ វិថី​មួយ ខេត្ត​ស៊ី​ឈួន និង​កម្ពុ​ជាមាន​សក្តា​នុពល​យ៉ាង​ធំ សម្រាប់​កិច្ចសហប្រតិបត្តិការ​ក្នុង​វិស័យ​ទេសចរណ៍ កសិកម្ម ថាមពល​អគ្គិសនី ការ​ដឹកជញ្ជូន សម្ភារៈ​សំណង់ គីមី ក៏ដូចជា​ពាណិជ្ជកម្ម និង​ចូលរួម​លើកកម្ពស់​កិច្ច​សហប្រតិបត្តិការ​ផ្នែក​ហិរញ្ញវត្ថុ​សម្រាប់​កម្ពុជា​ផងដែរ​។

សូម​បញ្ជាក់​ថា ពិធី​សម្ពោធ​នេះ បាន​ប្រព្រឹត្តទៅ​ដោយមាន​ការ​អញ្ជើញ​ចូលរួម​ពី​លោក ប៉ាន សូរ​ស័ក្តិ រដ្ឋមន្ត្រីក្រសួង​ពាណិជ្ជកម្ម នៃ​ព្រះរាជាណាចក្រ​កម្ពុជា លោកស្រី Zhang Ying អនុប្រធាន​មន្ទីរ​ពាណិជ្ជកម្ម​ខេត្ត​ស៊ី​ឈួន កញ្ញា Guo Yi អនុព័ន្ធពាណិជ្ជកម្ម នៃ​ការិយាល័យ​សេដ្ឋកិច្ច និង​ពាណិជ្ជកម្ម​អម​ស្ថានទូត​ចិន លោក Jing Jun អនុប្រធាន​សភាពាណិជ្ជកម្ម​កម្ពុជា​ចិន និង​ជា​នាយក​ធនាគារ ICBC សាខា​ភ្នំពេញ លោក Lin Zhong Qing ប្រធាន​សមាគម​ជំរុញ​កិច្ចសហប្រតិបត្តិការ​សេដ្ឋកិច្ច ផ្លូវ​មួយ ខ្សែក្រវាត់​មួយ​របស់​ខេត្ត​ស៊ី​ឈួន​ប្រទេស​ចិន និង​លោក Wang Xue Mao អគ្គនាយក​ក្រុមហ៊ុន ចេ​ឌូ បា​យី គ្រឿង​សង្ហារិម​ហ្គ្រុ​ប នៃ​ទីក្រុង​ពាណិជ្ជកម្ម​៕

 

Source: Kampuchea Thmey Daily