កំពង់ឆ្នាំង ៖ អ្នកចែកចាយគ្រឿងញៀន៤នាក់ ត្រូវបានសមត្ថកិច្ចនគរបាលប្រឆាំងបទល្មើសគ្រឿងញៀនខេត្តកំពង់ឆ្នាំង សហការជាមួយនគរបាលប្រឆាំងបទល្មើសគ្រឿងញៀនខេត្តពោធិ៍សាត់ ចាប់ខ្លួន នៅថ្ងៃទី២០ ខែ មិថុនា ឆ្នាំ២០១៨ នៅផ្ទះឈ្មោះ មិត ណុំ ភេទស្រី ក្នុងភូមិដង្កៀបក្ដាម ឃុំឈើតុំ ស្រុកក្រគរ ខេត្តពោធិ៍សាត់ ជាប់ព្រំប្រទល់ ឃុំក្ដុលសែនជ័យ ស្រុកទឹកផុស ខេត្តកំពង់ឆ្នាំង ដែលគេតែងមកចែកចាយគ្រឿងញៀននៅក្នុងខេត្តកំពង់ឆ្នាំង។
សមត្ថកិច្ចបានឲ្យដឹងថា មុននឹងធ្វើការបង្ក្រាបសមត្ថកិច្ចបានដាក់កម្លាំងតាមដានជាយូរ ទើបនៅថ្ងៃកើតហេតុសមត្ថកិច្ចសហការគ្នាចុះធ្វើការបង្ក្រាប និងចាប់បានជនសង្ស័យ៤នាក់ មាន ១.ឈ្មោះ សឿម គឹមលី ភេទប្រុស អាយុ៣១ឆ្នាំ ជនជាតិខ្មែរ ស្នាក់នៅភូមិត្រពាំងស្នូល ឃុំស្វាយស ស្រុកក្រគរ ខេត្តពោធិ៍សាត់, ២.ឈ្មោះ លី តេន ភេទប្រុស អាយុ១៩ឆ្នាំ ជនជាតិខ្មែរ ស្នាក់នៅភូមិកំរែង ឃុំស្វាយស ស្រុកក្រគរ ខេត្តពោធិ៍សាត់ ៣.ឈ្មោះ យូ ហូក ភេទប្រុស អាយុ២៧ឆ្នាំ ជនជាតិខ្មែរឥស្លាម និង៤ ឈ្មោះ ហ៊ីម កុប ភេទប្រុស អាយុ៣១ឆ្នាំ ជនជាតិខ្មែរឥស្លាម អ្នកទាំងពីរនេះ ស្នាក់នៅភូមិដង្កៀបក្ដាម ឃុំឈើតុំ ស្រុកក្រគរ ខេត្តពោធិ៍សាត់។
ក្នុងកិច្ចប្រតិបត្តិការបង្ក្រាបនេះ សមត្ថកិច្ចដកហូតបានវត្ថុតាង ថ្នាំញៀនប្រភេទICE ចំនួន០៩កញ្ចប់ (ធំ០១កញ្ចប់), ទូរស័ព្ទដៃ០៧គ្រឿង, ជញ្ជីងថ្លឹងថ្នាំញៀន០១, ខ្សែកលោហៈធាតុ០១ខ្សែ, ខ្សែដៃលោហធាតុ០២ខ្សែ, ចិញ្ចៀន០៥វង់ និង ឧបករណ៍ជក់មួយធំចំនួនទៀត។
ជនសង្ស័យទាំង៤នាក់ខាងលើ រួមនឹងវត្ថុតាង ត្រូវបានសមត្ថកិច្ចខេត្តកំពង់ឆ្នាំង ប្រគល់ជូនសមត្ថកិច្ចខេត្តពោធិ៍សាត់ នាំយកទៅកសាងសំណុំរឿងតាមនីតិវិធី ចាត់ការតាមផ្លូវច្បាប់៕
Source: Kampuchea Thmey Daily
0 Comments