កីឡា​កាយសម្ព័ន្ធ​កម្ពុជា​ ទទួលបាន​លទ្ធផល​ល្អ ក្នុង​ការ​បោះ​ជំរំ​នៅ​ប្រទេស​ថៃ

លោក​ណ​យ​ផា​ណា អគ្គលេខាធិការ​សហព័ន្ធ​កីឡា​កាយ សម្ព័ន្ធ​កម្ពុជា​បាន​ប្រាប់​ឲ្យ​ដឹង​ ថា ប្រទេស​ចំនួន​១១​ក្នុង​តំបន់​អាស៊ី​ បាន​បញ្ជូន​កីឡាករ​វ័យក្មេង និង គ្រូបង្វឹក គ្រូ​ជំនួយ ទៅ​ចូល​រួម​ក្នុង​ព្រឹត្តិការណ៍​ការបោះ​ជំរំ​ហ្វឹកហាត់ នៅ​ប្រទេស​ថៃ “ Training Camp MAG Coaches Bangkok”​នេះ។​លោក​បញ្ជាក់ថា មាន​គ្រូបង្វឹក​ចំនួន​៣០​រូប បាន​ចូលរួម​ក្នុង​ព្រឹត្តិ ការណ៍​នេះ ក្នុងនោះ​ក៏មាន​កម្ពុជា​ផងដែរ​។​
​
លោក​ណ​យ​ផា​ណា បាន​អោយដឹងទៀតថា កម្ពុជា​បាន​បញ្ជូន គ្រូ​ជំនួយ​២​រូប និង កីឡាករ​កាយសម្ព័ន្ធ​មួយរូប ទៅ​ចូលរួម​ការ​បោះ​ ជំរំ​ហ្វឹកហាត់ ​នៅ​ប្រទេស​ថៃ “ Training Camp MAG Coaches Bangkok” នេះ តាំងពី​ថ្ងៃ​ទី​១០ ​មិថុនា មក​ម្ល៉េះ ហើយ​ពេលនេះ​បាន​ត្រឡប់ ​មកដល់​កម្ពុជា​វិញ​ហើយ​។
​
​គ្រូ​ជំនួយ​ទាំង​២​រូប​នោះ មាន​លោក​វាស សារិទ្ធ និង​លោក​សោ​សុ​ផេង រួមជាមួយ កីឡាករ​អៀ សៀវ​ម៉ី ដែល​បាន​ទៅ​ចូលរួម​ក្នុង​ព្រឹត្តិការណ៍​“ Training Camp MAG Coaches Bangkok” នេះ។​

លោក​អគ្គលេខាធិការ​សហព័ន្ធ​កីឡា​កាយសម្ព័ន្ធ​កម្ពុជា បញ្ជាក់ថា ​ជាមួយនឹង ការចូលរួម​ក្នុង​វគ្គ​នេះ គ្រូ​ជំនួយ​កម្ពុជា​ទាំង ២ រូប​រួមជាមួយ​គ្រូ​មកពី​ហ្វីលីពីន មួយរូប បានទទួល​សញ្ញាប័ត្រ​បញ្ចប់​វគ្គ​Academy Level-1​កម្រិត​អន្តរជាតិ ដែលជា​វគ្គ​មួយ លំ បាក​ក្នុងការ​ប្រជែង​យក ជាទីបំផុត។

គ្រូ​ជំនួយ​លោក​វាស សារិទ្ធ និង សោ​សុ​ផេង គឺជា​ជនកម្ពុជា​ដំបូង​គេ ដែល​បានទទួល ការទទួល ស្គាល់​ពី​សហព័ន្ធ​អាស៊ី និង​សហព័ន្ធ​កាយសម្ព័ន្ធ​ថៃ។ ចំពោះ​កីឡាករ​វ័យក្មេង​កម្ពុជា ដែល​ចូលរួម​ក្នុង​ព្រឹត្តិការណ៍​នេះ ក៏បាន​ទទួលបាន​នូវ​ការកោតសរសើរ ពី​សហព័ន្ធ​តំបន់ និង ទ្វីបអាស៊ី​ដែរ​។​
​
សូមបញ្ជាក់ថា វគ្គ​នេះ​ត្រួតពិនិត្យ​ដោយ​អ្នកជំនាញការ​ជាន់ខ្ពស់ មកពី​ទ្វីបអាស៊ី​ដែល ជា​ជនជាតិ​កូរ៉េខាងត្បូង​៕



Source: Kampuchea Thmey Daily