ប៉ោយប៉ែត ៖ ប្រាសាទកំពូលបី ដែលមានទីតាំងនៅច្រកទ្វារអន្តរជាតិប៉ោយប៉ែត ត្រូវបានអាជ្ញាធរចាប់ផ្ដើមរុះរើចេញពីចំណុចចាស់ ដោយគ្រោងយកទៅដាក់នៅចំណុចរង្វង់មូលវិញម្ដងតាមការគ្រោងទុក។ ប៉ុន្តែគេសង្កេតឃើញមានមហាជនជាច្រើននាក់ នាំគ្នាសោកស្តាយយ៉ាងខ្លាំងទាក់ទិននឹងការរុះរើប្រាសាទ ដែលធ្លាប់តែឃើញនៅច្រកទ្វារអន្តរជាតិកន្លងទៅនោះ។
ចំពោះសកម្មភាពកាត់ស្ទូចយកប្រាសាទកំពូលបីចេញពីកន្លែងចាស់នោះ គឺកើតមាននៅវេលាម៉ោង៩និង៤០នាទីព្រឹក ក្នុងថ្ងៃទី១៨ ខែមិថុនា ឆ្នាំ២០១៨នេះ នៅចំណុចច្រកទ្វារអន្តរជាតិប៉ោយប៉ែត ដែលប្រឈមជាមួយនឹងច្រកទ្វារអន្តរជាតិខ្លងឡឹកថៃ ស្ថិតក្នុងស្រុកអារញ្ញប្រាថេត ខេត្តស្រះកែវ ប្រទេសថៃ។
គួររំលឹកដែរថា កាលពីថ្ងៃទី២៣ ខែកុម្ភៈ ឆ្នាំ២០១៨នេះ អាជ្ញាធរក្រុងនិងខេត្ត បានធ្វើពិធីបញ្ចុះបឋមសិលានៅចំណុចរង្វង់មូលច្រកទ្វារអន្តរជាតិប៉ោយប៉ែត ក្រោមអធិបតីភាពលោកជំទាវម៉ៅម៉ាល័យកែគឹមយ៉ាន ដើម្បីរៀបចំដាក់ប្រាសាទកំពូលបីនៅទីនោះតែម្តង។
តាមការសង្កេតឃើញនៅកន្លែងប្រាសាទកំពូលបីខាងលើនោះផងដែរ គេបានសម្គាល់ឃើញប្រជាពលរដ្ឋខ្មែរជាច្រើននាក់រួមទាំងភ្ញៀវជាតិ និង អន្តរជាតិផងដែរ បាននាំគ្នាលាន់មាត់ថា មហាជនជាច្រើនមានការសោកស្តាយខ្លាំងណាស់ ក្រោយពីគេបានឃើញមានកម្មភាពស្ទូចយកប្រាសាទកំពូលបីចេញពីកន្លែងចាស់ ដែលធ្លាប់តែពួកគេបានចេញពីប្រទេសថៃមកឃើញមានប្រាសាទកំពូលបីដែលជានិមិត្តរូបឲ្យជាតិសាសនានៃប្រទេសកម្ពុជាយើង។
ពលរដ្ឋបានបន្តទៀតថា ចាប់ពីពេលនេះតទៅពួកគាត់លែងបានឃើញប្រាសាទកំពូលបីនៅច្រកទ្វារអន្តរជាតិប៉ោយប៉ែតទៀតហើយ ព្រោះអីកន្លងទៅភ្ញៀវជាតិនិងអន្តរជាតិជាច្រើននាក់ ដែលធ្វើដំណើរចេញពីប្រទេសរបស់ខ្លួនឆ្លងកាត់តាមប្រទេសថៃហើយឆ្លងកាត់មកចូលដីខ្មែរគេបានឃើញរូបប្រាសាទកំពូលបីនៅច្រកទ្វារអន្តរជាតិជាប្រចាំ ឥឡូវនេះគឺលែងបានឃើញហើយ។
លោកសាន ស៊ានហូ អភិបាលក្រុងប៉ោយប៉ែតបានប្រាប់អ្នកយកព័ត៌មាននៅកន្លែងកើតហេតុថា ថ្ងៃនេះគឺយើងបានអនុវត្តគម្រោងដែលយើងបានគ្រោងទុកជាយូរណាស់មកហើយ ជាពិសេសគឺយើងត្រូវតែរើយកប្រាសាទកំពូលបីនេះចេញដោយខានមិនបានចាប់ពីពេលនេះតទៅ ហើយការរៀបចំស្ទូចយកប្រាសាទខាងលើនោះ គឺអាជ្ញាធរបានចំណាយអស់ថវិកាចំនួន ១៦ម៉ឺនដុល្លារឯណោះ។
លោកអភិបាលក្រុងរូបនោះបានបន្តទៀតថា យើងត្រូវគិតគូររួចហើយថា នឹងត្រូវចំណាយថវិកាជាង៤០ម៉ឺនដុល្លារបន្ថែមទៀត សម្រាប់រៀបចំកែលម្អប្រាសាទនៅចំណុចរង្វង់មូលនេះបន្ថែមទៀត។ លោកបានបញ្ជាក់ទៀតថា ការរៀបចំប្រាសាទកំពូលបីនៅរង្វង់មូលនេះ គឺត្រូវបញ្ចប់នៅក្នុងឆ្នាំ ២០១៩ ខាងមុខនេះជាស្ថាពរតែម្ដង រឿងមូលហេតុនៃការយឺតយ៉ាវក្នុងការរើប្រាសាទចេញនេះ គឺបណ្ដាលមកពីខាងអាជ្ញាធរជាប់រវល់ធ្វើផ្លូវជូនប្រជាពលរដ្ឋជាច្រើនខ្សែនៅក្នុងសង្កាត់និមិត្ត ក្រោយពេលបានធូរដៃខ្លះហើយ លោកក៏ដាក់វិធានការឲ្យស្ទូចយកប្រាសាទក្នុងថ្ងៃនេះចេញតែម្តង៕
Source: Kampuchea Thmey Daily
0 Comments