ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីបានអំពាវនាវឲ្យធនាគារឯកទេសនៃវិស័យឯកជននៅកម្ពុជាចូលរួមចំណែកអភិវឌ្ឍន៍ធនធានមនុស្សតាមរយៈការផ្តល់ប្រាក់កម្ចីមានការប្រាក់ទាបដល់និស្សិតដែលចង់សិក្សាលើវិស័យទេសចរណ៍ ខណៈដែលវិស័យទេសចរណ៍នៅកម្ពុជាកំពុងទាក់ទាញភ្ញៀវអន្តរជាតិប្រមាណ៦លាននាក់នៅឆ្នាំ ២០១៨នេះ។
ប្រមុខរាជរដ្ឋាភិបាលកម្ពុជាបានអំពាវនាវបែបនេះ នៅក្នុងពិធីបិទសន្និសីទអន្តរជាតិលើកទី២ ស្តីពី «កិច្ចព្រមព្រៀងទទួលស្គាល់គ្នាទៅវិញទៅមកលើអ្នកជំនាញទេសចរណ៍អាស៊ាន» នៅសណ្ឋាគារសុខារ៉េស៊ីដង-ភ្នំពេញ ស្ថិតក្នុងសង្កាត់ ជ្រោយចង្វារ ខណ្ឌជ្រោយចង្វារ រាជធានីភ្នំពេញ នៅរសៀលថ្ងៃទី២១ ខែមិថុនា ឆ្នាំ២០១៨។
សម្តេចតេជោនាយករដ្ឋមន្ត្រីបានលើកឡើងថា កិច្ចព្រមព្រៀងទទួលស្គាល់អ្នកជំនាញទេសចរណ៍អាស៊ាន ពិតជាយន្តការធ្វើឲ្យកាន់តែប្រសើរឡើងនូវប្រព័ន្ធបណ្តុះបណ្តាលជំនាញទេសចរណ៍ ចូលរួមកាត់បន្ថយនូវគម្លាតចំណេះដឹងនិងជំនាញរវាងអ្នកជំនាញដូចគ្នាក្នុងតំបន់ សម្រួលការផ្លាស់ប្តូរបទពិសោធន៍ក្នុងការអភិវឌ្ឍជំនាញរវាងប្រទេសសមាជិកទាំងអស់។ ដូច្នេះស្ថាប័នរដ្ឋ ឯកជន អង្គការជាតិ-អន្តរជាតិ និងដៃគូអភិវឌ្ឍនានាគួរផ្តល់កិច្ចសហការ និង គាំទ្របន្ថែមទៀតសំដៅចូលរួមអនុវត្តស្មារតីកិច្ចព្រមព្រៀងអាស៊ាននេះ ឲ្យកាន់តែមានប្រសិទ្ធភាព និង សម្រេចគោលដៅរួមរបស់អាស៊ាន។
សម្តេចតេជោនាយករដ្ឋមន្ត្រីបានមានប្រសាសន៍ថា “ខ្ញុំចង់អំពាវនាវទៅកាន់ធនាគារឯកទេសទាំងឡាយ នៃវិស័យឯកជនសូមចូលរួមចំណែកអភិវឌ្ឍធនធានមនុស្សតាមរយៈការផ្ដល់ប្រាក់កម្ចីដែលមានការប្រាក់ទាបសម្រាប់និស្សិត ដែលចង់រៀននៅក្នុងវិស័យទេសចរណ៍នេះ”។
សម្តេចតេជោបានបន្តថា យើងបានឃើញហើយថា កំណើននៃទេសចរណ៍ចូលមកកាន់ប្រទេសកម្ពុជាយើងកាន់តែច្រើន ហើយភាពប្រទាក់ក្រឡារវាងកម្ពុជា ជាមួយនឹងបណ្ដាប្រទេសនៅក្នុងក្របខណ្ឌអាស៊ានក៏ដូចជាលោកកំពុងប្រព្រឹត្តទៅក្នុងក្នុងល្បឿនមួយយ៉ាងលឿន។ ដូច្នេះនៅក្នុងពេលវេលានេះតម្រូវការបណ្ដុះបណ្ដាលធនធានមនុស្សកាន់តែច្រើននៅពេលដែលនិស្សិតរបស់យើងចង់ចូលរៀន តែពួកគេខ្វះលទ្ធភាពដូច្នេះរដ្ឋមិនមានតួនាទីណាមួយនៅក្នុងការដាក់ចេញនូវទុនសម្រាប់ការបណ្ដុះបណ្ដាលក្រៅពីសាលាដែលខ្លួនមាននោះទេ។ ក៏ប៉ុន្តែយើងក៏សូមអំពាវនាវឲ្យធនាគារឯកទេសទាំងឡាយនៅក្នុងវិស័យឯកជនដែលអាចរួមចំណែកផ្ដល់នូវប្រាក់កម្ចីសម្រាប់និស្សិតដែលមានការប្រាក់ទាប។ ដូច្នេះសុំឲ្យលោក រដ្ឋមន្ត្រីក្រសួងទេសចរណ៍ ធ្វើទំនាក់ទំនងជាមួយនឹងធនាគារឯកទេសនៃវិស័យឯកជន សម្រាប់រៀបចំបែបបទនិងពិភាក្សាទាក់ទងទៅនឹងអត្រាការប្រាក់ តើត្រូវធ្វើបែបណានោះដើម្បីឲ្យពួកគេមានលទ្ធភាពសង់លុយទៅធនាគារវិញ នៅពេលដែលពួកគេបញ្ចប់ការសិក្សា និង មិនធ្វើឲ្យធនាគារមានការខាតបង់ នោះទេ ហើយធនាគារមានប្រាក់ចំណេញផងដែរពីប្រាក់កម្ចីដែលបានផ្តល់ឲ្យនិស្សិតផងដែរ៕
Source: Kampuchea Thmey Daily
0 Comments