ភ្នំពេញ ៖ ក្រោមកិច្ចសហការជាមួយធនាគារអេស៊ីលីដា ភីអិលស៊ី រដ្ឋបាលរាជធានីភ្នំពេញ នឹងដាក់ឲ្យដំណើរការ ការទូទាត់ប្រាក់តាមរយៈQR Code ជាមួយកម្មវិធីអេស៊ីលីដាទាន់ចិត្តលើរថយន្តក្រុងរបស់រដ្ឋបាលរាជធានីភ្នំពេញ នាពេលដ៏ខ្លីខាងមុខនេះ។
តាមរយៈកិច្ចប្រជុំជាមួយតំណាងធនាគារអេស៊ីលីដា កាលពីរសៀលថ្ងៃទី៣១ឧសភា លោកកើត ឆែ អភិបាលរងរាជធានីភ្នំពេញ បានជំរុញឲ្យផ្នែកពាក់ព័ន្ធធ្វើការងារដាក់ប្រព័ន្ធទូទាត់ប្រាក់បែបទំនើប(QR Code)តាមរយៈទូរស័ព្ទដៃនេះ ត្រូវធ្វើឲ្យបានលឿនដើម្បីសម្រួលដល់ការទូទាត់ប្រាក់សម្រាប់សេវាជិះរថយន្តដឹកជញ្ជូនសាធារណៈរថយន្តក្រុងរបស់រដ្ឋបាលរាជធានីភ្នំពេញ។
លោកអ៊ានសុឃីម អភិបាលរដ្ឋាករស្វយ័តដឹកជញ្ជូនសាធារណៈរថយន្តក្រុងបានឲ្យដឹងដែរថា គោលបំណងសំខាន់របស់រដ្ឋបាលរាជធានីភ្នំពេញគឺ ការធ្វើកិច្ចសហការជាមួយកម្មវិធីអេស៊ីលីដាទាន់ចិត្តដោយដាក់ប្រព័ន្ធQR codeលើទូរស័ព្ទដៃsmartphoneដើម្បីសម្រួលដល់ការបង់ថ្លៃសេវាជិះរថយន្តក្រុងដល់ប្រជាពលរដ្ឋយើងឲ្យកាន់តែងាយស្រួល។
លោកអ៊ាន សុឃីម បន្តទៀតថា សព្វថ្ងៃនេះរដ្ឋាករស្វយ័តដឹកជញ្ជូនសាធារណៈរថយន្តក្រុង បានប្រើប្រាស់ជម្រើស២រួចហើយក្នុងការបង់ថ្លៃសេវារថយន្តក្រុងនេះគឺទី១ ទិញសំបុត្របង់ជាសាច់ប្រាក់សុទ្ធ,ទី២ បង់តាមរយៈម៉ាស៊ីនទូទាត់អេឡិចត្រូនិកNFDរបស់ក្រុមហ៊ុនWing ហើយនៅពេលនេះយើងនឹងដាក់ឲ្យដំណើរការការបង់ថ្លៃសេវាតាមរយៈQR Codeដែលនឹងដាក់ឲ្យដំណើរការឆាប់ៗនេះ។
លោកបានឲ្យដឹងទៀតថា បច្ចុប្បន្ននេះ រដ្ឋាករស្វយ័តដឹកជញ្ជូនសាធារណៈរថយន្តក្រុងបានដាក់ឲ្យដំណើរការរថយន្តក្រុងចំនួន១៥៥គ្រឿង រត់លើតម្រាយផ្លូវចំនួន៨ខ្សែក្នុងរាជធានីភ្នំពេញ ហើយតាមការពិនិត្យជាក់ស្តែងឃើញថា បងប្អូនប្រជាពលរដ្ឋយើងបានងាកមកចាប់អារម្មណ៍ជិះឡានក្រុងរបស់រដ្ឋបាលរាជធានីភ្នំពេញកើនឡើងជាលំដាប់ដែលមានពី២ម៉ឺនទៅ២១០០០នាក់ក្នុង១ថ្ងៃ ហើយប្រជាពលរដ្ឋក៏បានសំណូមពរឲ្យរដ្ឋបាលរាជធានីភ្នំពេញដាក់បន្ថែមរថយន្តឲ្យបានច្រើនថែមទៀតនឹងឲ្យបានច្រើនផ្លូវក្នុងទីក្រុង។
លោកអ៊ាន សុឃីម បញ្ជាក់ថា ក្រោមជំនួយឥតសំណង រាជរដ្ឋាភិបាលជប៉ុននឹងផ្តល់ជំនួយរថយន្តក្រុងថ្មីចំនួន៨០គ្រឿងដល់រាជធានីភ្នំពេញក្នុងឆ្នាំ២០១៨នេះ។ ក្នុងនោះក្នុងខែមិថុនានេះនឹងមកដល់ចំនួន២០គ្រឿង,ខែកញ្ញាមកដល់៣០គ្រឿង និងខែធ្នូមកដល់៣០គ្រឿងទៀត។
ក្រោមការគិតគូដ៏ខ្ពង់ខ្ពស់របស់សម្តេចអគ្គមហាសេនាបតីតេជោហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា គឺបងប្អូនកម្មករកម្មការិនី,កីឡាករកីឡាការិនីអាជីព,ព្រះ សង្ឃ,សិស្សនិស្សិត,ជនពិការ លោកគ្រូអ្នកគ្រូ គឺទទួលបានការអនុគ្រោះជិះរថយន្តក្រុងរបស់រដ្ឋាករស្វយ័តដឹកជញ្ជូនសាធារណៈរថយន្តក្រុងដោយមិនបង់ប្រាក់រយៈពេល២ឆ្នាំ៕
Source: Kampuchea Thmey Daily
0 Comments