ភ្នំពេញ ៖ លោកឃួង ស្រេង អភិបាលនៃគណៈអភិបាលរាជធានីភ្នំពេញកាលពីរសៀលថ្ងៃទី៣១ឧសភា បានទទួលជួបសំណេះសំណាល និងពិភាក្សាការងារជាមួយលោកយ៉ាន ឈីវហួយ អនុប្រធានក្រុមប្រឹក្សាពាណិជ្ជកម្មទីក្រុងផ្លូវសូត្រសមុទ្រដើម្បីស្វែងយល់ពីលទ្ធភាពនៃការអនុវត្តកិច្ចសហប្រតិបត្តិការវិនិយោគលើវិស័យហេដ្ឋារចនាសម្ព័ន្ធ វិស័យកាត់ដេរ ការសាងសង់សណ្ឋាគារ ការនាំចេញ.នាំចូលផ្នែកវិស័យកសិកម្មជាដើម។
ក្នុងឱកាសនោះ លោកឃួង ស្រេង បានជម្រាបជូនភ្ញៀវពីស្ថានភាពជាក់ស្តែង ក៏ដូចជាការវិវឌ្ឍរីកចម្រើនរបស់កម្ពុជាលើគ្រប់វិស័យ ក្រោយពីប្រទេសជាតិត្រូវបានរំដោះចេញពីរបបប្រល័យពូជសាសន៍ប៉ុលពត។ ពេលនេះកម្ពុជា ទទួលបានសុខសន្តិភាពដ៏ពេញលេញពេញផ្ទៃប្រទេសដែលជាមូលដ្ឋានគ្រឹះសម្រាប់ការអភិវឌ្ឍក្រោមការដឹកនាំដ៏ឈ្លៀសវៃរបស់ស្ថាបនិកសន្តិភាព គឺសម្តេចអគ្គមហាសេនាបតីតេជោហ៊ុន សែន។ ដោយឡែកសម្រាប់រាជធានីភ្នំពេញ កំពុងទទួលបានការចាប់អារម្មណ៍យ៉ាងខ្លាំងពីសំណាក់អ្នកទេសចរ និងអ្នកវិនិយោគមកពីគ្រប់តំបន់ ក្នុងនោះវិនិយោគិនចិនបានឈរនៅលំដាប់ទី១ក្នុងការដាក់ទុនវិនិយោគនៅកម្ពុជា ក៏ដូចនៅរាជធានីភ្នំពេញ ហើយរាជធានីភ្នំពេញស្វាគមន៍ជានិច្ចចំពោះអ្នកវិនិយោគទាំងក្នុងនិងក្រៅប្រទេសរួមទាំងការជួយសម្របសម្រួល និងបង្កលក្ខណៈងាយស្រួលដល់អ្នកវិនិយោគផងដែរ។
សូមបញ្ជាក់ថា គម្រោងផ្លូវសូត្រមាសដែលដាក់ចេញដោយលោកប្រធានាធិបតីចិន ស៊ី ជិនពីង គឺជាការអភិវឌ្ឍហេដ្ឋារចនាសម្ព័ន្ធដឹកជញ្ជូនទាំងផ្លូវគោក,ផ្លូវទឹកជាខ្សែបណ្តាញនៃការដោះដូរពាណិជ្ជកម្មចាប់ពីប្រទេសចិនតភ្ជាប់ទៅបណ្តាប្រទេសនានានៅអាស៊ី,អ៊ឺរ៉ុប និងអាហ្វ្រិកជាដើម៕
Source: Kampuchea Thmey Daily
0 Comments