ភ្នំពេញ ៖ ជនសង្ស័យ២នាក់ ត្រូវបានកម្លាំងសមត្ថកិច្ចខណ្ឌទួលគោក សហការជាមួយកម្លាំងព្រហ្មទណ្ឌកម្រិតស្រាល នៃក្រសួងមហាផ្ទៃ ធ្វើការឡោមព័ទ្ធចាប់ខ្លួនបានជាបន្តគ្នា ខណៈធ្វើសកម្មភាពឆក់ទូរស័ព្ទដៃពីជនបរទេសម្នាក់កំពុងដើរតាមផ្លូវ។
ហេតុការណ៍នេះ បង្កឲ្យមានការភ្ញាក់ផ្អើលឡើង កាលពីវេលាម៉ោង៩និង១៥នាទីយប់ ថ្ងៃទី៣០ ខែឧសភា ឆ្នាំ២០១៨ ត្រង់ចំណុចផ្ទះ៤៥៤E0 ក្បែរនឹងស្តុបទេពផន តាមបណ្តោយផ្លូវម៉ៅសេទុង ស្ថិតក្នុងសង្កាត់ទឹកល្អក់ទី២ ខណ្ឌទួលគោក រាជធានីភ្នំពេញ។
ប្រភពព័ត៌មានពីកន្លែងកើតហេតុ បានប្រាប់ឲ្យ ដឹងថា នៅមុនពេលកើតហេតុ គេបានឃើញជនសង្ស័យ២នាក់ ជិះម៉ូតូមួយគ្រឿង ម៉ាកហុងដាឌ្រីម ស៊េរី០១៨ ពណ៌ខ្មៅ (មិនចាំស្លាកលេខ) និងមានកម្លាំងព្រហ្មទណ្ឌកម្រិតស្រាល នៃក្រសួងមហាផ្ទៃ រួមទាំងមានកម្លាំងសមត្ថកិច្ចមូលដ្ឋានជាច្រើនម៉ូតូទៀត ជិះដេញតាមពីក្រោយ រហូតមកដល់ចំណុចកើតហេតុ ជនសង្ស័យទាំងពីរនាក់ ក៏បានឈប់ម៉ូតូ ហើយជនសង្ស័យម្នាក់ ក៏បានរត់ឡើងទៅខាងលើផ្ទះកើតហេតុនោះបាត់។ ចំណែកឯជនសង្ស័យម្នាក់ទៀត ត្រូវបានកម្លាំងសមត្ថកិច្ចឃាត់ខ្លួនភ្លាមៗ។ ក្រោយមកកម្លាំងសមត្ថកិច្ចមូលដ្ឋាន និងកម្លាំងព្រហ្មទណ្ឌកម្រិតស្រាល នៃក្រសួងមហាផ្ទៃ ក៏បានធ្វើការឡោមព័ទ្ធ និងដើររុករកជនសង្ស័យម្នាក់ទៀត ដែលបានរត់ឡើងផ្ទះកើតហេតុខាងលើ អស់រយៈពេលប្រមាណជាកន្លះម៉ោង ទើបរកឃើញជនសង្ស័យខាងលើ ខណៈកំពុងសំងំលាក់ខ្លួននៅកៀនជណ្តើររបស់ប្រជាពលរដ្ឋ ទើបកម្លាំងសមត្ថកិច្ចឃាត់ខ្លួនភ្លាមតែម្តង។
សមត្ថកិច្ចបានបន្តអោយដឹងទៀតថា នៅមុនពេលកើតហេតុ កម្លាំងពួកគាត់បានជិះម៉ូតូល្បាត ដោយស្លៀកពាក់ស៊ីវិល លុះជិះមកដល់ចំណុចក្បែរ ផ្សារមាន់អាំង តាមបណ្តោយផ្លូវ៥៩២ ស្ថិតក្នុងសង្កាត់បឹងកក់ទី២ ខណ្ឌទួលគោក ក៏ប្រទះឃើញជនសង្ស័យទាំង២នាក់ ធ្វើសកម្មភាពឆក់ទូរស័ព្ទដៃ ពីជនបរទេសម្នាក់ ដែលកំពុងដើរតាមបណ្តោយផ្លូវ៥៩២ បានសម្រេច ហើយបានជិះរត់គេចខ្លួន ភ្លាមនោះកម្លាំងកម្លាំងព្រហ្មទណ្ឌកម្រិតស្រាល នៃក្រសួងមហាផ្ទៃ ក៏បានធ្វើការជិះដេញតាមពីក្រោយ និងបានសហការជាមួយកម្លាំងសមត្ថកិច្ចមូលដ្ឋានខណ្ឌទួលគោក រហូតមកដល់ចំណុចកើតហេតុ ទើបឃាត់ខ្លួនជនសង្ស័យទាំងពីរនាក់នោះបាន។
ក្រោយពេលកើតហេតុ ជនសង្ស័យទាំង២នាក់ខាងលើ រួមទាំងវត្ថុតាង ត្រូវបានកម្លាំងព្រហ្មទណ្ឌកម្រិតស្រាល នៃក្រសួងមហាផ្ទៃ នាំខ្លួនទៅកាន់ក្រសួងមហាផ្ទៃ ដើម្បីធ្វើការសាកសួរ និងកសាងសំណុំរឿងចាត់ការទៅតាមនីតិវិធីច្បាប់៕
Source: Kampuchea Thmey Daily
0 Comments