ការប្រកួតប្រដាល់ដណ្ដើមខ្សែក្រវាត់ជើងឯកTV5 Knosk Out Series by K.Cement ទម្ងន់៦០គីឡូក្រាម លើសង្វៀនTV5 ព្រែកកំពឹស នៅថ្ងៃសៅរិ៍ទី២១ ខែកក្កដា ឆ្នាំ២០១៨នេះ ជាការប្រកួតលើកទី៧ ក្នុងជម្រុះដំណាក់កាលទី១ ដែលមានអ្នកប្រដាល់៤រូប ដើម្បីដណ្តើម យកកៅអីសម្រាប់ដំណាក់កាលទី២ បន្តទៀត ។
សម្រាប់ការប្រកួតជម្រុះលើកទី៧នេះ ផង់ សាមាឡេអ្នកប្រដាល់ក្លិបនាគរាជមានជ័យ នឹងជួបប្រកួតជាមួយសំ ភក្តី អ្នកប្រដាល់ក្លិបរ៉ាហាប់ស្វាយប៉ាក ។ រវាងផង់ សាមាឡេ និងសំ ភក្តី នេះ ពួកគេមិនធ្លាប់ជួបគ្នាទេកន្លងមក។
ផង់ សាមាឡេ ជាអ្នកប្រដាល់ជើងចាស់វស្សាហើយ ឯ សំ ភក្តី ជាអ្នកប្រដាល់ថ្មីស្រករក្រោយ តែអ្នកប្រដាល់ទាំង២ មានកម្រិតសមត្ថភាពបច្ចេកទេសប្រហាក់ប្រហែលគ្នា ។
សម្រាប់ការជួបគ្នារវាងផង់ សាមាឡេ និង សំ ភក្តីនេះ មិនដឹងថាអ្នកណាជាអ្នកមានសំណាងបានឡើងទៅប្រកួតបន្តទៀតទេ ។ ចាំមើល តើ ផង់ សាមាឡេអាចយកឈ្នះសំ ភក្តីបានឬអត់? សម្រាប់ការជួបគ្នាក្នុងជម្រុះខ្សែក្រវាត់ជើងឯកTV5 Knoc k Out Series ទម្ងន់៦០គីឡូក្រាមដំណាក់កាលទី១នេះ។
សូមបញ្ជាក់ថា ការប្រកួតក្នុងដំណាក់ទី១នេះ ប្រកួតតែបីទឹកទេហើយអ្នកដែលឈ្នះបានឡើង និងអ្នកដែលចាញ់ត្រូវជ្រុះធ្លាក់ត្រឹមនេះ។
ចំពោះការប្រកួតមួយគូទៀតនោះ ជាការជួបគ្នារវាងអ្នកប្រដាល់ស្រករក្រោយ ឡុង ឡា ក្លិបអប់រំកាយកីឡាស្រុកអន្លង់វែងខេត្តឧត្តរមានជ័យនិង កុយ ចាន់តូ អ្នកប្រដាល់ជើងចាស់ក្លិបគីសែមានរិទ្ធ។ ពីរនាក់នេះ ក៏មិនធ្លាប់ប៉ះគ្នាដែរកន្លងមក។
សម្រាប់ការជួបគ្នាលើកនេះ មិនដឹងថាជើងចាស់កុយ ចាន់តូ អាចយកឈ្នះឡុង ឡា បានឬអត់នោះទេ ? ព្រោះថាឡុងឡា គេពិតមែនតែគេស្គាល់រេញក្រោយចាន់តូ ប៉ុន្តែគេក៏ល្អនិងខ្លាំងគួរសមដែរ ។ យ៉ាងណា កុយ ចាន់តូ គឺមិនអាចធ្វេសប្រហែសឬមើលស្រាលឡុង ឡាបានដែរ ។ ចាំមើល រវាងឡុង ឡា និងកុយ ចាន់តូ តើនរណានៅ នរណាដើរចេញពីការប្រកួតនេះ ?។
ព្រឹត្តិការណ៍ប្រកួតដណ្តើមពានរង្វាន់ជើងឯកTV5 Knock Out Series ទម្ងន់៦០ គីឡូក្រាមនេះ មានអ្នកប្រដាល់ចំនួន ៣២ នាក់ចូលរួម ហើយចែកចេញជា ៤ ដំណាក់កាលនិងមានរូបមន្តប្រកួតគឺ ដំណាក់ទី១ជាការប្រកួតជម្រុះក្នុងចំណោម៣២នាក់ ទុកតែ១៦នាក់ ។ ដំណាក់ទី២ ជាការជម្រុះក្នុងចំណោម១៦នាក់ ទុក៨នាក់ ហើយដំណាក់កាលទី៣ គឺជម្រុះក្នុង៨នាក់ទុក៤នាក់ និងដំណាក់កាលទី៤និងទី៥ ជាការប្រកួតដំណាក់កាលផ្តាច់ព្រ័ត្រ គឺពាក់កណ្តាលផ្តាច់ព្រ័ត្រនិងផ្តាច់ព្រ័ត្រ។
ដោយឡែក សម្រាប់ការប្រកួតជាលក្ខណៈមិត្តភាពអន្តរជាតិវិញ ពុយ វណ្ណះ ក្លិបកងពលតូចទ័ពឆ័ត្រយោង៩១១នឹងជួបសាកកណ្តាប់ដៃជាមួយ អ្នកប្រដាល់ថៃAram Boy។ ពួកគេប្រកួតគ្នាក្នុងប្រភេទទម្ងន់៦៣,៥០០ គីឡូក្រាម។
ពុយ វណ្ណះ គេជាជើងឯកTV5 Knosk Out Series by K.Cement ទម្ងន់៦៥គីឡូក្រាម ។អ្នកប្រដាល់រូបនេះ គេល្អទាំងកណ្តាប់ដៃ ជង្គង់ និង កែង ។ វណ្ណះ ធ្លាប់ជួបប្រកួតជាមួយថៃតែ២ដងប៉ុណ្ណោះកន្លងមក ដោយវាយឈ្នះថៃក្នុងទឹកទី៤ទាំងពីរដង ដែលការប្រកួតចុងក្រោយរបស់គេនៅសង្វៀនTV5នេះ គឺវាយឈ្នះអ្នកប្រដាល់បារាំងKevin ក្នុងទឹកទី៣ កាលពីថ្ងៃទី១៧មីនា២០១៨ ។ ចាំមើល ពុយ វណ្ណះ អាចយកឈ្នះលើAram Boy បានឬអត់លើកនេះ ?។
អ្នកប្រដាល់ក្លិបកងពលតូចទ័ពឆ័ត្រយោង៩១១រូបនេះ តាំងពីដូររបៀបវ៉ៃ ដោយមិនចាំគូបដិបក្ខវាយមុននោះទេ គឺគេចូលវាយមុនតែម្តង ធ្វើអោយគេទទួលជោគជ័យជាបន្តបន្ទាប់ ក្នុងការប្រកួតជាមួយអ្នកប្រដាល់ថៃបារាំងកន្លងមកនោះ។ សម្រាប់លើកនេះ ពុយ វណ្ណះ ក៏ប្រហែលជាមិនពិបាកប៉ុន្មានដែរ ព្រោះថាAram Boy ក៏មិនជាល្អនិងខ្លាំងប៉ុន្មាននោះដែរ។
Aram Boy គេមានប្រវត្តិប្រកួត៧៦លើក ដោយវាយឈ្នះ៥៤លើក ចាញ់២០លើក និងស្មើ០២លើក ខណះដែលពុយ វណ្ណះ មានកំណត់ត្រាប្រកួត៦៧លើក ឈ្នះ៥៥លើក ចាញ់១១លើក និងស្មើ០២លើក ។ ទោះជាយ៉ាងណា ពុយ វណ្ណះគេធ្លាប់ផ្ដួលថៃពីរនាក់រួចមកហើយ។ ចាំមើល ពុយ វណ្ណះ ប៉ះជាមួយអ្នកប្រដាល់ថៃ Aram Boy នេះ តើជួបសំណាងល្អ ឬមួយជួបសំណាងអាក្រក់នោះ ?៕
Source: Kampuchea Thmey Daily
0 Comments